Date:2017/10/17 |Tuesday

वैदेशिक रोजगारीका समस्या समाधान गर्न सहकार्य आवश्यक : परराष्ट्रमन्त्री महरा

Posted on: September 01, 2017 | views: 56 |

काठमाडौँ । उपप्रधानमन्त्री कृष्णबहादुर महराले वैदेशिक रोजगारीका क्रममा देखिएको समस्या समाधान गर्न परराष्ट्र, गृह र श्रम तथा रोजगार मन्त्रालयबीच सहकार्य आवश्यक रहेको बताएका छन् । 

नेपाल वैदेशिक रोजगार व्यवसायी संघका प्रतिनिधिमण्डलसँग आज परराष्ट्र मन्त्रालयमा भएको भेटवार्तामा परराष्ट्रमन्त्री महराले भने, “वैदेशिक रोजगार सुरक्षित, मर्या्दित र व्यवस्थित बनाउनुपर्छ, यसका लागि राज्य संयन्त्र र व्यवसायी दुवैले आआफ्नो ठाउँबाट जिम्मेवारीपूर्वक भूमिका निभाउन आवश्यक छ । 

भेटमा आफूहरुले मलेसिया जाने कामदारबाट विभिन्न कम्पनीका नाममा बढी रकम असुलिएको, मागपत्र प्रमाणीकरणलाई दूतावासमा सहजीकरण गरी दिनुपर्ने, वैदेशिक रोजगारीसम्बन्धी कार्यदल र भ्रमणमा संघको प्रतिनिधिमण्डल पनि सहभागी गराइनुपर्ने विषय राखेको संघका अध्यक्ष रोहन गुरुङले जानकारी दिए । 

नेपालस्थित साउदी अरबको दूतावासले प्रवेशाज्ञा छापका लागि दिने परिचयपत्र सबै रोजगारदाता संस्थालाई दिने व्यवस्थाका लागि आवश्यक पहल गरिदिन समेत परराष्ट्रमन्त्रीको ध्यानाकर्षण गराइएको उहाँले जानकारी दिए । 

जवाफमा मन्त्री महराले विदेशस्थित नियोगमा मागपत्र प्रमाणीकरण र साउदी परिचयपत्रका सम्बन्धमा तत्काल मन्त्रालयले पहल गर्ने तथा मलेसिया जाने कामदारमाथिको ठगीका सम्बन्धमा सरोकार भएका मन्त्रालय बसेर अध्ययन गरिने बताएका थिए । रासस


Share your thoughts!


इम्प्रेसन पब्लिकेसन एण्ड मिडिया प्रा.लि.द्वारा सञ्चालित
केन्द्रीय कार्यालय – मध्यबानेश्वर काठमाडौं