17th February | 2020 | Monday | 6:18:29 AM

भोलिका तिमी हौ

रसिकदेव   POSTED ON : माघ ४, २०७६ (१०:३६ AM)

भोलिका तिमी हौ

ए ! नानी प्यारा, देशका तारा, भोलिका कर्णधार ।

बढ्नु छ तिमी दरिलो बनी भविष्य पूर्वधार ।।

काँडाको बाटो, खाल्टा र खुल्टी, नलडी हिँड्नु छ ।

हिलाम्मे तलाउ बीचबाट निस्की कमलझैँ फुल्नु छ ।।


जनकको ज्ञान, सीताको विवेक, बुद्धको निर्वाण ।

यो भूमिमाथि दिएर गए ऋषिले वरदान ।।

खोज्नु छ फेरि त्यो ज्ञान अमृत यो प्यारो देशमा ।

करुणा, विवेक, मानवता रोप सबैको हृदयमा ।।


हिजोका पुर्खा, आजका हामी, भोलिका तिमी हौ ।

हाम्रा ती गल्ती सुधार्दै बढ्ने आशाका किरण हौ ।।

संगत राम्रो, संस्कार सिक, मिहिनेत गर्दै जाऊ ।

सुसंस्कृत समाज लक्ष्य छ तिम्रो पाइला चलाऊ ।।


Views: 129