27th May | 2019 | Monday | 4:42:52 AM

हुवावेद्वारा अमेरिकी सरकारविरुद्ध मुद्दा दायर

रासस/एएफपी   POSTED ON : फाल्गुन २४, २०७५ (७:०३ AM)

हुवावेद्वारा अमेरिकी सरकारविरुद्ध मुद्दा दायर

शेनजेन । सूचना प्रविधि एवं दूरसञ्चार प्रदायक चिनियाँ कम्पनी हुवावेले आफ्ना उत्पादन अमेरिकी बजारमा बिक्री गर्न रोक लगाउने अमेरिकी कानुन खारेजी गर्न माग गर्दै मुद्दा दायर गरेको छ । हुवावेले आफ्ना उपकरणमार्फत् चीन सरकारका लागि जासुसी गरिरहेको आरोप लगाउँदै अमेरिकाले हुवावेका सामग्री खरिदमा प्रतिबन्ध लगाइरहेको छ । जासुसीको आरोप खेपिरहेको हुवावेका सामानमाथि अमेरिकासहित विश्वका धेरै देशमा प्रतिबन्ध लगाइएको छ ।

हुवावेले अमेरिकाको टेक्सासको प्लानोस्थित जिल्ला अदालतमा सन् २०१९ को अमेरिकी प्रतिरक्षा कानुनविरुद्ध मुद्दा दर्ता गरेको जनाएको छ । उक्त कानुनले सरकारी निकायले हुवावेका उपकरण, सेवा वा हुवावेका ग्राहक रहेका अरू निकायका सेवा खरिद गर्न प्रतिबन्ध लगाएको छ ।

उक्त मुद्दा दर्तासँगै चिनियाँ कम्पनी हुवावे राजनीतिक, कानुनी समेतका सबै विधि उपयोग गर्न अग्रसर भएको देखाएको छ । उच्च गतिको पाँचौं पुस्ताको दूरसञ्चार प्रविधि (फाइभ–जी) विकास गरिसकेको हुवावेले आफू विश्व बजारमा महŒवपूर्ण प्रतिस्पर्धी हुन चाहेको संकेत पनि दिएको छ । ‘हुवावेका उत्पादनमाथि प्रतिबन्ध लगाउनुपर्ने ठोस कारण र प्रमाण जुटाउन अमेरिकी कंग्रेस पटकपटक असफल भइसकेको छ । हामी कानुनी उपचार नै उपयुक्त र अन्तिम प्रयत्न हो भन्नेमा सोच्न बाध्य भएका छौं,’ हुवावेका अध्यक्ष गुओ पिङले भने, ‘कानुनी झन्झट समाप्त गर्ने हो भने हुवावेले अमेरिकामा अझ समुन्नत प्रविधि भित्र्याउने छ र उत्कृष्ट फाइभ–जी सञ्जाल निर्माणमा मद्दत गर्नेछ ।’ गुओले प्रतिबन्धका कारण भएको हानिनोक्सानीको यकिन विवरण नखुलाइएको बताए । ‘अमेरिकी सरकारले हुवावेलाई बदनाम गराउन कुनै कसर बाँकी राखेको छैन,’ शेनजेनस्थित कम्पनीको मुख्यालयमा आयोजित गुओले पत्रकार सम्मेलनमा भने । 

गुओले अमेरिकी सरकारले हुवावेको सर्भर हृयाक गरेको तथा इमेलहरू र ‘सोर्स कोड’ चोरी गरेको पनि दाबी गरे । तर उनले यस बारेमा विस्तृत विवरण दिन चाहेनन् । अमेरिकी सरकारले हुवावेबाट राष्ट्रिय सुरक्षामा गम्भीर खतरा उत्पन्न भएको जनाउँदै आएको छ । खासगरी हुवावेका संस्थापक रेन झेङफाई चिनियाँ सेनाका इन्जिनियर भएका कारण अमेरिकाले शंका जनाइआएको छ ।

हाल हुवावे विश्वकै अग्रणी दूरसञ्चार सेवा प्रदायक कम्पनी हुनुका साथै स्मार्टफोन उत्पादनमा सामसुङ र एप्पल कम्पनीलाई चुनौती दिइरहेको छ । चीनले हालै प्रयोगमा ल्याएको एक कानुनमा सबै चिनियाँ कम्पनीले राष्ट्रिय सुरक्षामा सरकारलाई मद्दत गर्नुपर्ने व्यवस्था गरिएको छ । यो कानुनी व्यवस्थाले हुवावेका बारेमा थप चासो बढेको हो । संयुक्तराज्य अमेरिकाले हुवावेका उपकरण अरू देशका गतिविधि जासुसी गर्न चीनको कम्युनिस्ट सरकारले दुरूपयोग गर्नसक्ने बताएको छ । अमेरिकाले हुवावेको सेवा प्रयोगमा नल्याउन अरू देशलाई पनि आहृवान गरेको छ ।


Views: 80