18th November | 2019 | Monday | 9:34:01 PM

इटालीमा स्टिल प्लाण्टका पाँच हजार मजदुरको रोजगारी गुम्ने खतरा

रासस/एएफपी)   POSTED ON : कार्तिक २२, २०७६ (९:४० AM)

इटालीमा स्टिल प्लाण्टका पाँच हजार मजदुरको रोजगारी गुम्ने खतरा

रोम । स्टिल उत्पादक आर्सेलोर–मित्तल कम्पनीले इटालीको आर्थिकरूपमा संघर्षरत फर्म इल्भालाई खरिद गर्ने यसअघिको सम्झौता कार्यान्वयन नगर्ने भएको छ । इटालीका प्रधानमन्त्री जियोसेप कोण्टेका अनुसार मित्तल समूहको नयाँ प्रस्तावका कारण इटालीको कम्पनीबाट पाँच हजार कर्मचारीको भविष्य अन्यौलमा परेको छ । 

विश्वकै सर्वाधिक ठूलो स्टिल उत्पादक आर्सेलोर–मित्तल कम्पनीले इटालीको इल्भा प्लाण्ट खरिद नगर्ने निर्णय गर्दै यससम्बन्धी इटाली सरकारलाई जानकारी गराएको छ । मित्तल समूहले इल्भाको सर्वाधिक प्रदूषण फैल्याउने टाराण्टो स्टिल प्लाण्ट बन्द गर्न अनुरोध गरेको थियो तर इटाली सरकारले स्थानीयको रोजगारी गुम्ने भन्दै उक्त प्लाण्ट बन्द नगर्न मित्तल समूहलाई पत्र लेखेको छ । इटालीका प्रधानमन्त्रीको भनाइ सार्वजनिक भएसँगै हजारौंको रोजगारी धरापमा परेको छ तर प्रधानमन्त्री जियोसेपले आर्सेलोर–मित्तल समूहसँगको वार्तापछि भने, ‘मित्तल समूहले लगानीबमोजिम नाफा गर्न नसकिने भएकाले पाँच हजार रोजगारी कटौती गर्ने प्रस्ताव अघि सारेको छ तर यो हाम्रा लागि स्वीकार्य छैन ।’

प्रधानमन्त्री जियोसेपले आर्सेलोर–मित्तल समूह पुनर्वार्तामा आउने र सम्झौता हुने विश्वास व्यक्त गरे । दुवै पक्षलाई स्वीकार्य प्रस्तावले मात्र समस्याको समाधान निकाल्नेछ, प्रधानमन्त्रीले भने । आर्सेलोर–मित्तलले गत वर्ष नोभेम्बरदेखि नै यो प्लाण्ट खरिद गर्ने उद्देश्यले काम थालेको थियो । कम्पनीले यस कम्पनीको पुनरुत्थानका लागि करिब २ अर्ब ७० करोड डलर लगानी गर्ने योजना बनाएको छ र सन् २०२४ सम्ममा प्रदूषण नियन्त्रणका लागि एक अर्ब २० करोड डलर खर्च गर्ने योजना छ । 

इटालीको दक्षिणमा रहेको टाराण्टो स्टिल प्लाण्ट विगतदेखि नै विवादको घेरामा तानिएको छ किनभने विज्ञहरूको भनाइमा यस प्लाण्टको वरिपरिका करिब ७ हजार ५०० मानिसको प्लाण्टबाट निस्कने घातक प्रदूषणका कारण मृत्यु भएको छ । युरोपकै ठूलो मानिएको यस प्लाण्टमा आठ हजारभन्दा बढी कामदार कार्यरत छन् । टाराण्टो दक्षिण इटालीको सर्वाधिक गरिबी र बेरोजगारी दर उच्च रहेको ठाउँ हो । इटालीका प्रधानमन्त्री कोण्टेले यसै विषयमा कुराकानी गर्न बिहीबार मजदुर युनियनसँग भेटघाट गर्ने बताएका छन् । 


Views: 51