25th May | 2019 | Saturday | 2:32:47 AM

मातृ महिमा !

सीता भण्डारी कँडेल   POSTED ON : बैशाख २२, २०७६ (३:०८ AM)

मातृ महिमा !

आमाभित्र अपार हुन्छ महिमा, को पस्न सक्छ त्यहाँ

आमामै छ विशाल शक्ति अरुमा, खोजेर मिल्छ कहाँ ?


आँधी, हुरी, प्रचण्ड ताप, दुःखका, सागरहरू छन् जति

आफैँभित्र दबाउँछ्यौ तर पनि, रोकिन्न तिम्रो गति !


 छैन केही कपट् निस्वार्थ मनले, स्नेह गर्छ्यौ तिमी

साना हुन् कि ठूला समान सबमा, बात्सल्य छर्छ्यौ तिमी


आमाभित्र छ खानी सर्वगुणको, विज्ञानको ज्ञानको

कोटि कोटि प्रणाम गर्नु सबले, आमारूपी शानको !

 

ताते–ताते गराई हात तिमीले, थाम्छ्यौ विवेकी बनी

शिक्षक हौ पहिलो सिकाइ कखरा, तोतेबोलीमै पनि


रक्षक हौ जननी छहारी मनको, ‘पीयूष’ हौ स्वादको

रश्मि हौ घरको प्रसाद जपको, आशा र विश्वासको !


 नौ महिनाभरि गर्भ बोकी, सहजै पीडा सहन्छ्यौ कति

त्यही भार बिसाउँदा धरतीमा, प्रसन्न बन्छ्यौ अति


के गर्नु र बयान खै कलमले तिम्रो अथक कर्मको

कसले बुझ्छ होला र खै धरणीमा, तिम्रो पीडा मर्मको !!




शंखमूल, नयाँबानेश्वर, काठमाडौं


Views: 240

सम्बन्धित सामग्री:

कविता : म रोएकी छैन

मुना दाहाल : बैशाख ७, २०७६ (७:१८ AM)