Date:2017/10/24 |Tuesday

डा केसीको मागका पक्षमा छुः अध्यक्ष दाहाल

Posted on: August 13, 2017 | views: 65 |

काठमाडौँ । पूर्वप्रधानमन्त्री एवम् नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले आफू सधैँ प्रा डा गोविन्द केसीले उठाएका माग र मुद्दाको पक्षमा रहेको बताएका छन् । 

एक्काइस दिनदेखि आमरण अनशनमा रहनुभएका डा केसीको जीवन रक्षाको माग गर्दै अध्यक्ष दाहाललाई भेट्न पुगेको प्रतिनिधिमण्डलसँग कुराकानी गर्दै उहाँले आफू केसीले उठाएका मागको पक्षमा रहेको बताए । भेटमा अध्यक्ष दाहालले भने, “काठमाडौँ उपत्यकामा १० वर्षसम्म नयाँ मेडिकल कलेज खोल्न नदिने र मनमोहन मेडिकल कलेजलाई सरकारले खरिद गर्नुपर्ने डा केसीको माग सकारात्मक छ, यसले मेडिकल शिक्षालाई मर्या्दित बनाउँछ भन्ने मेरो पनि ठम्याइ छ ।” 

आफू प्रधानमन्त्री हुँदा पनि डा केसीले उठाएका समस्या सम्बोधन गर्न सकारात्मक कुराकानी भएको जानकारी दिँदै उनले कतिपय कानूनी र प्रशासनिक जटिलताका कारण सबै काम सम्पन्न हुन नसकेको स्पष्ट पारे । व्यवस्थापिका–संसद्मा विचाराधीन ऐनमा ठोस व्यवस्था गरेर डा केसीलाई आश्वस्त पार्नुपर्ने र अनसन तोडाउनुपर्नेमा आफू निरन्तर छलफलमा रहेको भन्दै उनले सो बारेमा प्रधानमन्त्री शेरबहादुर देउवासँग छलफल गर्ने जानकारी समेत गराएका थिए । 

भेटमा प्रतिनिधिमण्डलले डा केसीको स्वास्थ्य अत्यन्त कमजोर हुँदै गएकाले केसीले उठाएका माग सम्बोधन गरी अनशन तोडाउन पहल गर्न अध्यक्ष दाहालसँग आग्रह गरेको थियो । रासस


Share your thoughts!


इम्प्रेसन पब्लिकेसन एण्ड मिडिया प्रा.लि.द्वारा सञ्चालित
केन्द्रीय कार्यालय – मध्यबानेश्वर काठमाडौं