22nd July | 2018 | Sunday | 10:40:49 PM

प्रधानमन्त्रीको चीन भ्रमण कार्यसूची : आठवटा नाका खोलिने

हिमालय टाइम्स   POSTED ON : Friday, 15 June, 2018 (2:21:47 PM)

प्रधानमन्त्रीको चीन भ्रमण कार्यसूची : आठवटा नाका खोलिने

काठमाडौं । प्रधानमन्त्री केपी शर्मा ओलीको यही असार ५ गते मंगलबारदेखि हुने चीन भ्रमणका क्रममा दुई देशबीच ८ वटा नाका खोल्ने बारेमा सहमति हुने भएको छ । परराष्ट्र मन्त्रालयले दिएको जानकारीअनुसार प्रधानमन्त्री ओलीको भ्रमणका बेला चीनको स्वशासित क्षेत्र (तिब्बत) का राजमार्गसम्म खाद्यान्न ढुवानीका निम्ति आठवटा सीमा नाका खोल्ने सम्बन्धी सहमतिपत्रमा हस्ताक्षर गर्ने तयारी भएको छ ।

जसअनुसार तिब्बतबाट खाद्यान्न ढुवानी गर्ने तथा नेपालबाट तिब्बततर्फ मालसामान निर्यात गर्ने प्रयोजनका निम्ति बझाङको उरिपासमा दुई, रसुवागढी, दार्चुलाको तिंकरमा दुई, ताप्लेजुङको तिप्लापासमा दुईवटा र हुम्लाको हिल्सामा एक व्यापारिक नाका खुल्नेछन् । 

साथै केरुङ–काठमाडौं रेलमार्ग निर्माण, दुई देशका परराष्ट्र मन्त्रालयबीच संयन्त्र स्थापना, रसुवागढी र सिन्धुपाल्चोकको तातोपानीमा ‘नेपाल–चीनमैत्री पुल’ निर्माणसम्बन्धी समझदारी पत्रमा समेत हस्ताक्षर हुनेछ । 

त्यस्तै, नेपालको उत्पादन क्षमता अभिवृद्धि सम्बन्धमा नेपाल र चीनका अर्थ मन्त्रालयबीच सहकार्य, ऊर्जा सहायता तथा सीमापार प्रसारण लाइन निर्माण, कृषिमा साझेदारी र सातवटै प्रदेशमा विपद् व्यवस्थापन तथा उद्धार केन्द्र निर्माणसम्बन्धी समझदारीपत्रमा हस्ताक्षर हुने भएको छ । 

भूकम्पपछि नेपालको पुनर्निर्माणका लागि चीन सरकारले उपलब्ध गराउने १६ अर्ब चिनियाँ युआन एक हजार मेघावाट क्षमताको मनाङ–मस्र्याङ्दी जलविद्युत् आयोजना, समुद्री बन्दरगाह र सुक्खा बन्दरगाहको प्रयोग, सहज एवं सर्वसुलभ सूचना तथा सञ्चार प्रवाहका निम्ति अप्टिकल फाइबर बिछ्याउनेलगायत नेपालको राष्ट्रिय हित र स्वार्थका परियोजनामा पारस्परिक सहयोगको सम्झौता हुने राससले जनाएको छ ।

परराष्ट्र मन्त्रालयमा बिहीबार आयोजित नियमित पत्रकार भेटमा परराष्ट्रमन्त्री प्रदीपकुमार ज्ञवालीले आफ्नो मंगोलिया भ्रमण, अन्तर्राष्ट्रिय, क्षेत्रीय एवं राष्ट्रिय कूटनीतिक क्षेत्रमा भएका पछिल्ला विकासक्रम एवं समसामयिक स्थिति तथा प्रधानमन्त्रीको चीन भ्रमणबारे जानकारी दिँदै भने, ‘व्यापार तथा पारवहनका साथै स्वतन्त्र व्यापार क्षेत्रका विषयमा भने द्विपक्षीय छलफल जारी छ निकट भविष्यमा नै निष्कर्षमा पुगिनेछ ।’ 

चीनका राष्ट्रपतिले अघि सारेको ‘बेल्ट एन्ड रोड इनिसिएटिभ (बिआरआई)’ अन्तर्गतका परियोजना, तिनको निर्माण तथा लगानीको ढाँचाबारे पनि बृहत् रूपमा दुवै मुलुकबीच छलफल भइरहेको जानकारी दिँदै मन्त्री ज्ञवालीले नेपालको राष्ट्रिय आवश्यकताका परियोजना नै बिआरआईअन्तर्गत निर्माण गरिने बताए ।