27th March | 2019 | Wednesday | 7:14:09 AM

डा. केसीले इलाममा सुरुआत गरे १६ औं सत्याग्रह

  POSTED ON : पुष २६, २०७५ (३:१३ AM)

डा. केसीले इलाममा सुरुआत गरे १६ औं सत्याग्रह

पशुपतिनगर । चिकित्सा क्षेत्र सुधारको माग गर्दै डा गोविन्द केसीले इलाममा १६ औँ सत्याग्रहको सुरुआत गरेका छन् ।

गत साउन १० गते सरकारसँग भएको सहमति विपरित राष्ट्रिय चिकित्सा शिक्षा विधेयक बुधबार संसदीय समितिले पारित गरेपछि डा केसीले ६ बुँदे मागसहित अर्को चरणको सत्याग्रह इलामबाट सुरुआत गरेका हुन् ।

मङ्गलबार इलाम सदरमुकाम पुगेका डा केसीले पत्रकार सम्मेलन गरी बुधबार साँझ ५ बजेदेखि इलामको फुलगाछीस्थित पुरानो सहरी विकास तथा भवन निर्माण डिभिजन कार्यालय रहेको भवनमा ६ बुँदे मागसहित सत्याग्रहमा बसेको जानकारी दिए ।

पन्ध्रौँ सत्याग्रह अन्त्य गर्ने क्रममा गत साउन १० गते सरकारसँग राष्ट्रिय चिकित्सा शिक्षा विधेयकमा आफूले उठाएको माग समेटेर संसद्बाट पास गर्ने सहमति भएको थियो । तर सहमति विपरित चिकित्सा शिक्षा विधेयक अगाडि बढाएकाले आफूले १६ औँ पटक सत्याग्रहमा बस्नुपरेको उनले बताए ।

यसैबीच बुधबार सत्तारुढ दलका सांसदले बहुमतका आधारमा राष्ट्रिय चिकित्सा शिक्षा विधेयकको प्रतिवेदन संसदीय समितिबाट पारित गराएका छन् ।

पारित प्रतिवेदनले प्राध्यापक डा. गोविन्द केसीको माग सम्बोधन नगरेको विपक्षी नेपाली कांग्रेसको दावी छ । संसदले विधेयक परिमार्जन गरेर केसीका माग सम्बोधन गर्न सक्ने ठाउँ भने बाँकी नै छ ।

डा केसीले ६ बुँदे मागमा गौरीबहादुर कार्की नेतृत्वको जाँचबुझ आयोगको प्रतिवेदनले दोषी ठहर गरेका त्रिभुवन विश्वविद्यालयका पदाधिकारीलगायतका व्यक्तिलाई बर्खास्त गर्नुपर्ने, त्रिभुवन विश्वविद्यालयका पदाधिकारीद्वारा चिकित्सा अध्ययन संस्थानका खोसिएका अधिकार संस्थानमै फिर्ता गर्नुपर्ने, कृषि तथा वन विश्वविद्यालयमा सम्बन्धन रोक्न मन्त्रिपरिद्षको निर्णयबमोजिम चोर बाटोबाट दिन लागिएको सम्बन्धन रोक्नुपर्ने लगायतका छन् ।


Views: 98