3rd June | 2020 | Wednesday | 8:41:09 AM

लकडाउनका लागि सवारी पास लिएर शानसँग सडकमा घुम्दै हुनुहुन्छ ? सावधान !

हिमालय टाइम्स   POSTED ON : चैत्र २५, २०७६ (९:४७ PM)

लकडाउनका लागि सवारी पास लिएर शानसँग सडकमा घुम्दै हुनुहुन्छ ? सावधान !

काठमाडौं । सरकारले घोषणा गरेको लकडाउनको उल्लङ्घन गरेर तपाईं विना काम सवारी चलाईरहनु त भएको छैन ? यदि छ भने सावधान ! तपाईं ट्राफिक प्रहरीको फन्दामा पर्न सक्नुहुनेछ ।
अत्यावश्यक कामबाहेक एक जिल्लाबाट अर्को जिल्लामा पुग्ने नाकाहरू, मुख्य सडकहरु तथा भित्री सडकहरूमा ट्राफिक प्रहरीले चेकजाँचमा थप कडाई गरेको छ । मंगलबारमात्रै काठमाडौं उपत्यकामा लकडाउन उल्लङ्घन गर्ने ५१० वटा २ पाङ्ग्रे र ३५ वटा ४ पाङ्ग्रे गरी जम्मा ५४५ वटा सवारी साधनलाई नियन्त्रणमा लिइएको महानगरीय ट्राफिक प्रहरी महाशाखाले जनाएको छ ।
बिहान ६ बजेदेखि दिउँसो ४ बजेसम्म उक्त संख्यामा सवारी साधन नियन्त्रणमा लिइएको महाशाखाले जनाएको छ ।
महाशाखाले दिनमा १५५ स्थान र रातमा ४५ स्थानमा चेकप्वाईन्ट राखि सवारी साधनहरू चेकजाँच गर्ने व्यवस्था मिलाएको छ । भित्री एरियाको लागि भने मोटरसाईकलमा ट्राफिक प्रहरी खटाएको छ ।
कोरोना भाईरस विश्वव्यापी महामारी फैलिएपछि नेपालमा हुने सम्भावित जोखिम रोक्न सरकारले यही चैत ११ गते बिहान ६ बजेदेखि लागू हुने गरी देश व्यापी रूपमा लकडाउनको आदेश जारी गरेकाले उल्लङ्घन गर्ने सवारी साधनहरूलाई नियन्त्रणमा लिएको र आगामी दिनमा बाहिर ननिस्कने प्रतिबद्धतासहित बेलुका उक्त सवारी साधन छाड्ने गरिएको महानगरीय ट्राफिक प्रहरी महाशाखाका प्रमुख प्रहरी वरिष्ठ उपरीक्षक भिमप्रसाद ढकालले जानकारी दिनुभयो ।
‘लकडाउन एउटा व्यक्ति वा समूहको फाईदाको लागि गरिएको नभएर तपाई हाम्रो सम्पूर्णको सुरक्षाको लागि हो,’ ढकालले भन्नुभयो ।
काठमाडौँ उपत्यकामा चैत्र ११ गतेदेखि लकडाउन उल्लङ्घन गर्ने ५,१९१ वटा सवारी साधनहरू नियन्त्रणमा लिईसकेको महाशाखाले जनाएको छ ।
पाससम्बन्धी नयाँ व्यवस्था
जिल्ला प्रशासन कार्यालय, काठमाडौँद्वारा विभिन्न मितिमा जारी भएको ७ (सात) दिनेपहेलो रङको सवारी पास अब थपिएको लक डाउन अवधिभर मान्य हुने जिल्ला प्रशासन कार्यालय, काठमाडौँले महाशाखालाई पत्राचार गरेको महाशाखाका प्रवक्ता प्रहरी उपरीक्षक जिवन कुमार श्रेष्ठले जानकारी दिनुभयो । उहाँले भन्नुभयो, ‘अन्य १ दिने, ३ दिने वा अन्यथा लेखिएका पासहरू भने आजकै मितिवाट खारेज भएको छ ।’
पास भएकालाई पनि विशेष निगरानी
पास भएर पनि शान देखाउदैँ घुम्न निस्कने, तीव्र गतिमा कुदाउने, एक व्यक्तिको नाममा भएको पास अर्को व्यक्तिलाई दिने उपर महाशाखाले विशेष निगरानी तथा चेकजाँच गरि कारबाही गर्न थालेको जानकारी प्रवक्ता एसपी श्रेष्ठले बताउनुभयो ।

Views: 144