19th February | 2018 | Monday | 5:41:24 PM

नेपाल पहिलोपटक सेमिफाइनलमा

  POSTED ON : Wednesday, 15 November, 2017 (12:12:14 PM)

नेपाल पहिलोपटक सेमिफाइनलमा

दिल तामाङ 

काठमाडौं । नेपाली युथ टोली मलेसियामा जारी एसिसी यु–१९ युथ एसिया कप क्रिकेट प्रतियोगिताको सेमिफाइनलमा प्रवेश गरेको छ । नेपालले आयोजक मलेसियालाई ८ विकेटको फराकिलो अन्तरले पराजित गरेपछि र बंगलादेशसँग भारत पराजित भएपछि नेपालले पहिलोपटक प्रतियोगिताको अन्तिम चारमा स्थान सुरक्षित गरेको हो ।

यसअघिका ६ संस्करणमा नेपालले समूह चरण पार गर्न सकेको थिएन । मंगलबार बायोमास ओभलमा वर्षाले प्रभावित बनेर करिब ५ घण्टापछि २४ ओभरमा झारिएको खेलमा नेपालले मलेसियालाई ८ विकेटले पराजित ग¥यो ।

४६ रनको लक्ष्य पछ्याएको नेपालले ५.३ ओभरमै जित हासिल गरेको हो । नेपालका लागि अनिल सिंहले अविजित २६ रन बनाए । भारतविरुद्धको खेलमा कप्तानी इनिङ्स खेलेका कप्तान दीपेन्द्र सिंह ऐरी १२ रनमा आउट भए । आसिफ सेखले ४ तथा भीम सार्कीले ३ रन जोडे ।

यसअघि टस जितेर पहिले फिल्डिङ रोजेको नेपालले मलेसियालाई ४५ रनमै अलआउट गरेको थियो । वर्षाले प्रभावित भएका कारण २४ ओभरमा झारिएको खेलमा मलेसिया १५.३ ओभरमा ४५ अलआउट हुन पुग्यो । मलेसियाका ओपनरद्वय सइद मुबारक २० र भिरन्दिप सिंह १० रनका साथ पहिलो विकेटका लागि ३३ रनको साझेदारी गर्दै बलियो सुरुवात दिलाएका थिए । उनीहरूको साझेदारी टुटेपछि खेल नेपालको पक्षमा देखियो । अन्तिम १२ रन बटुल्दा मलेसियाले सबै १० विकेट गुमायो । नेपालका लागि सन्दिप लामिछानेले ५ विकेट लिए । कप्तान दीपेन्द्र सिंह ऐरी र शाहद आलमले २–२ तथा अनिल कुमार शाहले १ विकेट लिए । मलेसियाका ६ ब्याट्सम्यान खातै नखोली पभेलियन फर्किएका थिए ।

सोमबार बंगलादेशले मलेसियालाई फराकिलो रन अन्तरमा पराजित गरेपछि नेपालले सेमिफाइनल पुग्न मंगलबार मलेसियाविरुद्ध जितमात्र नभई भारी अन्तरले पराजित गर्नुपर्ने भएको थियो । यसअतिरिक्त भारत र बंगलादेशको खेलको नतिजा पनि कुर्नुपर्ने भएको थियो । आफ्नो फराकिलो जित र अर्काे खेलमा आफूअनुकूल नतिजा आएपछि नेपालको सेमिफाइनलको बाटो सहज बन्यो ।

समूहमा बंगलादेशले शतप्रतिशत जित निकाल्यो । दुई खेल जितेको नेपाल समूह उपविजेता तथा एक खेलमात्र जितेको भारत तेस्रो तथा समूहका सबै तीनै खेलमा पराजित आयोजक मलेसिया अंकविहीन बन्यो ।

अब नेपालले आफ्नो सेमिफाइनल खेल समूह ‘ए’ को विजेता अफगानिस्तानसँग शुक्रबार खेल्ने छ । बिहीबार हुने अर्को सेमिफाइनलमा भने समूह ‘ए’को विजेता बंगलादेश र समूह ‘बी’को उपविजेता पाकिस्तान भिड्नेछन् ।

जितसँगै सेमिफाइनलमा पुग्न सफल भएपछि नेपाली टिमका प्रशिक्षक विनोद दासले राम्रो प्रदर्शनले नै टिम सफल भएको बताए । ‘हामीले प्रतियोगिताभर लगातार राम्रो प्रदर्शन गरिरहृयौँ । मिहिनेत गरेजस्तै राम्रो नतिजा पनि आइरहेको छ’, प्रशिक्षक दासले भने, ‘आजको स्थिति अलि सहज थिएन तर सबै योजनाअनुसार नै भयो ।’