11th December | 2018 | Tuesday | 7:35:00 PM

नेपालको उपाधि जित्ने लक्ष्य

मुना कार्की   POSTED ON : Wednesday, 08 August, 2018 (9:20:35 PM)

नेपालको उपाधि जित्ने लक्ष्य


भुटान । पन्ध्र वर्षमुनि उमेर समूह (यू १५)को महिला साफ च्याम्पियनसिप फुटबलमा नेपालले उपाधि जित्ने लक्ष्य लिएको छ । 

बंगलादेशमा गत वर्ष भएको पहिलो संस्करणको खेलमा अपेक्षित नतिजा निकाल्न नसकेको नेपाली किशोरी टोलीले यस पटक भने प्रतियोगितामा उत्कृष्ट खेल प्रदर्शन गर्दै उपाधि जित्ने दाउमा छन् । यो दोस्रो संस्करणको प्रतियोगिता हो । 

विगतमा भन्दा यस पटकको साफ च्याम्पियनसिपमा तयारी राम्रो भएकाले उपाधि जित्ने लक्ष्य रहेको नेपाली टोलीकी प्रशिक्षक गंगा गुरुङ बताउछिन् । उनले खेलाडीको नियमित तालीमसँगै मनोबल पनि उच्च रहेकाले प्रतियोगितामा उत्कृष्ट प्रदर्शन गर्ने बताइन् । पाकिस्तान र बंगलादेश दुवै टोली बलियो भएको टिप्पणी गर्दै प्रशिक्षक गुरुङले भनिन्, “खेल हो हार जीत त भइहाल्छ तर नेपाली चेलीले उत्कृष्ट प्रदर्शन गर्नेछन् ।” 

पहिलो संस्करणको खेलमा भने नेपालले सन्तोषजनक प्रदर्शन गर्न सकेका थिएनन् । त्यतिबेला नेपालले कुनै पनि खेलमा जीत हासिल गर्न सकेनन् । 

नेपाली टोलीकी कप्तान प्रीति राईले प्रतियोगिता तयारीका लागि अन्तर्रा्ष्ट्रिय तालीम नलिएता पनि नेपाली महिला खेलाडीले उत्कृष्ट खेल प्रदर्शन गर्ने विश्वास व्यक्त गरिन् । नेपालले यही साउन २६ गते पाकिस्तानसँग पहिलो खेल खेल्दैछ । समूह ‘बी’मा रहेको नेपालको समूहमा पाकिस्तानसँगै बंगलादेश छ । 

बंगलादेशका मुख्य प्रशिक्षक गोलोन रोब्बिनले आफ्नो टोलीले राम्रो खेल प्रदर्शन गर्ने अपेक्षा लिएको बताए । बंगलादेश गत संस्करणको उपाधि विजेता हो । 


त्यस्तै बंगलादेशको कप्तानीको जिम्मेवारी पाएकी माभी माण्डाले आफूहरुले राष्ट्रिय तथा अन्तर्रा्ष्टिय तालीम लिएकाले खेलमा कुनै किसिमको प्रेसर नहुने प्रतिक्रिया दिइन् । 

यता पाकिस्तानका प्रशिक्षक मोहम्मद रसिदले तीन वर्षपछि मात्र आफ्नो राष्ट्रले फुटबलमा सहभागिता जनाएको भन्दै प्रतियोगितामा सकेसम्म राम्रो खेल प्रदर्शन गर्ने बताए । उनका अनुसार टोलीले एक महिना मात्र बन्द प्रशिक्षणमा रही तालीम लिएका थिए । 

समूह ‘बी’मा रहेका भारत, श्रीलंका र भुटानका प्रशिक्षकहरुले प्रतियोगितामा सकेसम्म उपाधि रक्षा गर्ने दाउमा रहेको बताए । 

भोलिदेखि शुरु हुने उक्त प्रतियोगिताको उद्घाटन खेलमा भारत र श्रीलंका भिड्नेछन् भने दोस्रो खेल बंगलादेश र पाकिस्तानबीच हुनेछ । 

रासस


Views: 26