महेन्द्र पार्कमा शालिक पुर्नस्थापनाको विषयमा विवाद, प्रशासनले लगायो रोक

- पार्थ मण्डल

झापा । झापाको भद्रपुर-८ स्थित सदरमुकामको मुटुमा रहेको महेन्द्र पार्क चन्द्रगढीमा पूर्व राजा स्व. महेन्द्र शाहको अर्धकदको शालिक पुर्नस्थापनाको विषयमा विवाद देखिएको छ ।

२०६२÷०६३ को दोस्रो जनआन्दोलनको क्रममा शाही शासनको अन्त्यका लागि संयुक्त सात राजनीति दलको आ≈वानमा सदरमुकाम घेराउको क्रममा प्रर्दशनकारीहरूले महेन्द्र पार्कभित्र राखिएको महेन्द्रको शालिक तोडफोड गरी भत्काएका थिए । त्यसबेला शाही सेनाको गोली खाएर शहिद सुरज विश्वास र राजन गिरीले देशका लागि बलिदानसमेत दिनुभएको थियो ।

राजतन्त्र ढलेर मुलुकमा गणतन्त्र, लोकतन्त्र स्थापन भएपछि तत्कालीन जिल्ला विकास समिति हाल जिल्ला समन्वय समिति झापाले महेन्द्र पार्कको नाम परिवर्तन गरी शहिद पार्क नामकरण गर्याे । त्यसपछि समन्वय समितिले पार्कको जिम्मा नगरपालिकालाई लगाउने निर्णय गर्यो ।

नगरपालिकाको स्वामित्वमा आएपछि यस पार्कलाई हाल बाल उद्यम पार्क भनेर चिन्न थालिएको छ । पार्क भित्र बालबालिकाको मनोरञ्जनका लागि नगरपालिकाले स्थानीय संघसंस्थासँग सहकार्य गरी विभिन्न खेल सामाग्री राखेको छ । नगरपालिकाले पार्कभित्र विभिन्न खेल सामाग्री राखे पनि शालिक राखिएको स्थानमा नेपालको राष्ट्रिय झन्डा मात्र राखेका थिए ।

१६ वर्षपछि अहिले आएर महेन्द्र पार्कमा पुनः पूर्व राजा महेन्द्रको अर्धकदको शालिक राख्ने कार्यक्रम लगभग तय भइसकेको थियो । बिर्तामोडका जयनारायण ढुंगानाले त्यस कामको लागि आर्थिक सहयोग गर्न खोज्नुभएको थियो ।

स्थानीय सरकार र प्रशासनसँग समन्वय नगरी महेन्द्र शालिक पुर्नस्थापना समितिले यही जेठ २१ गते शनिबार शालिक पुर्नस्थापना गर्ने कार्यक्रम रहेको भनि व्यापक प्रचारप्रसार गरेपछि विवाद सतहमा पुगेको हो । शालिक पुर्नस्थापना समितिले भद्रपुर नगरपालिकासँग समन्वय नगरी पार्कभित्र प्रवेश गरी रंगरोगन र सरसफाइ गर्न सुरु गरे । नगरपालिकाले त्यो थाहा पाएपछि नगर प्रहरी लगाएर पार्कभित्रको काम तत्काल बन्द गर्न लगाए । पार्कमा शालिक पुनर्स्थापनाको विषयमा अहिले सामाजिक सञ्जालमा सकारात्मक र नकारात्मक दुवै टिप्पणी भइरहेको छ ।

शालिक पुर्नस्थापना प्रशासनले लगायो रोक

शालिक पुर्नस्थापनाको विषयमा विवाद देखिएपछि जिल्ला प्रशासन कार्यालय झापाले तत्काल शालिक पुर्नस्थापना नगर्न रोक लगाएको छ ।

जिल्ला प्रशासन कार्यालयमा बुधबार बसेको सर्वदलीय बैठकले बिना अनुमति अनधिकृत रुपमा त्यहाँ पूर्व राजा महेन्द्रको शालिक पुर्नस्थापना गर्न नदिने निर्णय गरेको प्रमुख जिल्ला अधिकारी छविलाल रिजालले जानकारी दिनुभयो । सर्वदलीय बैठकले भद्रपुर नगर क्षेत्रमा रहेका सार्वजनिक स्थल तथा पार्कहरूको संरक्षण र सौन्दर्यीकरण गरी सोको उपयोग सम्बन्धमा भद्रपुर नगरपालिकाले नगर सभाबाट निर्णय गरेर कार्यान्वयन गर्ने, नगरपालिकाबाट स्वीकृति नलिई सार्वजनिक स्थल र पार्कहरूमा अनधिकृत रुपमा संरचना निर्माण, रंगरोकन, शालिक निर्माण, अतिक्रमण जस्ता कार्य हुन नदिने सम्बन्धमा नगरपालिकालाई आवश्यक परेमा स्थानीय प्रशासनसँग समन्वय गर्ने निर्णय गरेको उहाँले बताउनुभयो । बैठकमा जनप्रतिनिधिसहित नगरस्तरीय राजनीतिक दलका प्रतिनिधि र प्रहरी, प्रशासन प्रमुखहरूको उपस्थिति रहेको थियो ।

शालिक राख्ने प्रक्रिया गलत भयो : नगरपालिका

भद्रपुर नगरपालिकाका मेयर गणेश पोखरेलले नगरपालिकाको स्वामित्वमा रहेको महेन्द्र पार्कमा शालिक पुनर्स्थापन गर्ने प्रक्रिया कानुन संम्वत नभएको बताउनुभयो । महेन्द्र पार्कलाई अघिल्लो नगर सभाले बाल उद्यमको रुपमा विकास गर्दै लैजाने भनि लिखित निर्णय गरिसकेको छ । ‘पार्क नगरपालिकाको सम्पत्ति हो, यो कुनै व्यक्ति विशेषको सम्पत्ति होइन,’ उनले भने, ‘पार्कमा के राख्ने वा नराख्ने विषयमा कार्यपालिका बैठक वा नगर सभाले कानुनलाई टेकेर पारित गर्नुपर्ने हुन्छ ।’