अनिल पोखरेल/हिटा
राजविराज । सात वर्षअघि सुरु भएको सप्तरीको खाँडो नदी नियन्त्रणको काम अहिलेसम्म पनि पूरा हुन सकेको छैन । नदीमा तटबन्ध निर्माण अधुरो रहेका कारण वर्षामा कटानको खतरा बढेको हो ।
सप्तरीमा बाढीले सबैभन्दा बढी क्षति गर्ने नदीका रूपमा खाँडो नै रहेको छ । जिल्लाका एक दर्जन जति गाउँमा खाँडोमा आउने बाढीको जोखिम रहने गरेका कारण आर्थिक वर्ष २०७२/०७३ मा राजविराजमा खाँडो नदी व्यवस्थापन आयोजनाको कार्यालय स्थापना गरी तटबन्ध निर्माण सुरु गरिएको हो ।
तिलाठी, बेल्ही, सकरपुरा, मधेपुरा, कोबर्साइन, रूपनी, दिघवा, पकरी, तोपा, विषहरिया, लौनियाँ लगायतका गाउँहरू खाँडोको बाढीको उच्च जोखिममा रहेका कारण तटबन्ध निर्माणको काम थालनी भएको थियो । काम सुरु भएयता तिलाठी कोइलाठी गाउँपालिकाको बेल्हीमा सात सय मिटर, रुपनी गाउँपालिका वडा नं. २ मा १६० मिटर तथा सोही गाउँपालिका वडा नं. ६ स्थित तेरहौतामा तीन सय मिटर तटबन्ध निर्माणको काम भएको छ । तेरहौतामा १५० मिटर काम बाँकी नै रहेका कारण यसपालिको बाढीमा कटानको जोखिम कायमै रहेको स्थानीयवासीले जानकारी दिएका छन् ।
यसैगरी, तिलाठीका स्थानीयले नदी नियन्त्रणको काम पूरा नभएका कारण यसपालिको वर्षामा पनि बाढीको जोखिम यथावतै रहेको भन्दै चिन्ता व्यक्त गरेका छन् । ६ वर्ष अघि तटबन्ध निर्माण थाल्दा अब त राति ढुक्क भई सुत्न पाइएला भन्ने लागेको थियो, उनीहरूले भने, तर काममा सोचे जस्तो गति नदेखिएका कारण राति कति बेला बाढी पसेर सखाप पार्ने हो भन्ने हाम्रो चिन्ता यथावतै छ ।
खाँडो नदी व्यवस्थापन आयोजनाका प्रमुख एकराज भट्टराईका अनुसार पर्याप्त बजेटको अभाव, जग्गासम्बन्धी विवाद, निर्माण व्यवसायी परिचालनमा कठिनाइ लगायतका समस्याका कारण काममा विलम्ब भइरहेको बताउनुभएको छ । उपभोक्ता समिति गठनमा समस्या तथा कार्यालय सञ्चालनमा पूर्वाधारको कमी लगायतका समस्याले पनि काम प्रभावित हुने गरेको उहाँको भनाइ छ ।
उपलब्ध बजेटबाट हालसम्म काम गर्दै आएकोमा नदीमा पानीको सतह बढेका कारण तत्काल काम गर्न सक्ने अवस्था नरहेको उहाँले जानकारी दिनुभयो । उहाँले वर्षाको समयमा ढुंगा अभाव, ढुवानीमा समस्या तथा नदीमा बाढी बढेका कारण तत्काल तिलाठी कोइलाठी, बेल्ही, दिघवा लगायतका स्थानमा तटबन्ध निर्माणका कार्यले अपेक्षित गति लिन नसकेको बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच