मुगु । मुगुको उत्तरी भेगमा पर्ने सोरु गाउँपालिकाको पालिका केन्द्रमै खानेपानीको समस्या छ । गाउँपालिकाको वडा नम्बर ६ का बासिन्दालाई अहिले पनि खानेपानीका लागि हाहाकार बेहोर्नु परेको हो ।
सोरु गाउँपालिकाको सोरुकोट पालिका केन्द्रका दलित र गैरदलितका करिब ५० भन्दा बढी घरधुरीका बासिन्दाहरू वर्षौदेखि पानीका लागि गतिलोसँग प्यास मेटाउन पाएका छैनन् ।
सोरुकोटमा गाउँपालिका केन्द्र भएको ६ वर्ष पुगिसकेको छ । सत्ता फेरिए पनि सोरुकोट बासीले आफ्नो अवस्था नफेरिएको गुनासो गरेका छन् ।
निर्वाचनका बेला नेताहरूले खानेपानीलाई चुनावी नारा बनाउने गरेका छन् । अहिलेसम्म पनि गाउँपालिकाको केन्द्र सोरुकोटमा आवश्यकता अनुसारको खानेपानी उपभोग गर्न नपाएको सोरुकोटमा पसल व्यवसाय गर्दै आउनुभएकी कविता शाहीले बताउनुभयो ।
सोही टोलकी कमली मल्ल घर नजिकैको धारापानीले बस्तुभाउलाई खान त परै जावस आफूहरूका लागि करिब एक घण्टा लगाएर खानेपानी उपभोग गरिरहेको सुनाउनुहुन्छ ।
करिब ५० भन्दा बढी घरधुरीले उपभोग गर्दे आइरहेको एउटा धारो छ । त्यही पनि पानी कहिले चुहिन्छ भनेर पखाइमा बस्ने गरेका छौं । धारामा पानी नआए हामीहरूलाई बिहान बेलुका छाक टार्न पनि समस्या हुन्छ, उहाँले भन्नुभयो ।
धारोमा पानी नआए एक घण्टा समय लगाएर सोरुकोट गाउँको तल पट्टी जडेपानी, धुपी गाउँ गएर पानी बोक्नुपर्ने समस्या रहेको मल्लको भनाइ रहेको छ ।
डोकोमा गाग्री बोकेर पानी ल्याउने उनीहरूको लुगा धुने नुहाउने थलो पनि त्यही एक धारा मात्रै रहेको छ । सोरुकोटमा पानी पनि बिहान ६ बजेदेखि ८ बजेसम्म आउँछ भने साँझ त्यही ५ बजेबाट एक दुई घण्टा आउँछ ।
सोरुकोट गाउँमा तीन वटा धारा छन् । तर, पानी झर्दैन । एक गाग्री पानी लिन धारामा घण्टौं कुर्नुपर्छ । त्यसमा पनि आलो कतिबेला आउँछ भन्ने निश्चित नै हुँदैन ।
नेताहरूले चुनावका बेला बाटो निर्माण, खानेपानीलगायत योजनाका कुरा गरेर जनता फकाउने मात्र काम गरेको स्थानीय बताउँछन् ।
पालिकाका अध्यक्ष धर्मबहादुर शाहीका अनुसार समग्र सोरु बासीको मुहार फेर्नको लागि बृहत् खानेपानी आयोजनाको काम भइरहेको छ । यो आयोजनाले यहाँका स्थानीयले सहजै रूपमा खानेपानी उपभोग गर्न पाउने अध्यक्ष शाहीको भनाइ छ । टेण्डर प्रक्रिया पनि अगाडी बढेको उहाँ बताउनुहुन्छ ।
सोरुकोटमा खानेपानीको हाहाकार भएपछि विशेष गरेर महिलालाई सास्ती हुने गरेको छ । सोरुकोटमा पानीको हाहाकार हुँदा महिनावारी भएको बेला महिलालाई सरसफाइदेखि लिएर लत्ता कपडा धुन पनि सास्ती हुने गरेको हो ।
महिनावारी भएको बेला समय-समयमा सरसफाइ गरी रहनुपर्छ भनेर चिकित्सकहरूले बताए पनि पानी अभावले सरसफाइमा समस्या हुने गरेको मल्लको भनाइ छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच