काठमाडौं । चीनको चेतावनीका बाबजुद अमेरिकी तल्लो सदन हाउस अफ रिप्रिजेन्टेटिभ्सकी सभामुख न्यान्सी पेलोसीले ताइवानको भ्रमण गरेपछि चीनले नेपालको समर्थन खोजेको छ ।
नेपालका लागि चिनियाँ राजदूत होउ यान्छीले आज एक विज्ञप्ति जारी गर्दै अमेरिकी सभामुखको उक्त कदमको नेपालले विरोध गर्ने विश्वास व्यक्त गर्नुभएको हो ।
‘एक चीन नीतिको पक्ष र स्वतन्त्र ताइवान पक्षधरको विरुद्धमा नेपालले लामो समयदेखि लिंदै आएको प्रतिवद्धताको चीनले उच्च प्रशंसा गर्दछ । यो नेपाल–चीन सम्बन्धको राजनीतिक आधार पनि हो,’ राजदूत यान्छीले भन्नुभएको छ, ‘हामी विश्वास गर्छौं कि नेपाल सरकार र नेपाली जनताले एक चीन नीतिको पालना गरिरहनेछन्, चीनको वैध र जायज अडानलाई बुझेर समर्थन गर्नेछन् र एकअर्काको सार्वभौमसत्ता, सुरक्षा र क्षेत्रीय अखण्डताको रक्षा गर्न चीनसँग मिलेर काम गर्नेछन् ।’
राजदूत यान्छीले नेपाल र चीन असल छिमेकी, भरपर्दो साथी र साझेदार भएको बताउनु भएको छ । दुवै देशले सार्वभौमसत्ता, सुरक्षा र क्षेत्रीय अखण्डता सम्बन्धी मुद्दामा एकअर्कालाई बुझेको र समर्थन गर्दै आएको पनि उहाँले जनाउनु भएको छ ।
अमेरिकी तल्लो सदन हाउस अफ रिप्रिजेन्टेटिभ्सकी सभामुख न्यान्सी पेलोसी मंगलबार ताइवान आउनु भएको थियो । उहाँको भ्रमणलाई लिएर चीनले कडा शब्दमा विरोध जनाएको छ । यसबैबीच राजदूत यान्छीले पेलोसीको ताइवान भ्रमण एक चीन नीति र चीन–अमेरिकाको राजनीतिक आधारको गम्भीर उल्लङ्घन भएको बताउनु भएको हो ।
पेलोसीको भ्रमणले चीनको सार्वभौमसत्ता र क्षेत्रीय अखण्डतामा गम्भीर उल्लङ्घन गरेको दाबी उहाँले गर्नुभएको छ ।
राजदूत यान्छीले विश्वमा एउटै मात्र चीन रहेको र ताइवान चीनको भूभागको अविभाज्य भाग भएको बताउनु भएको छ । यसलाई सन् १९७१ को संयुक्त राष्ट्र संघको महासभाको प्रस्ताव २७५८ ले स्पष्ट रूपमा मान्यता दिएको समेत उहाँले जनाउनु भएको छ ।
‘सभामुख पेलोसी अमेरिकी कांग्रेसको वर्तमान नेता भएकोले, उनको भ्रमण र ताइवान गतिविधिहरू जुनसुकै रूपमा र जुनसुकै कारणले गरिएको भएपनि यो राजनीतिक उत्तेजना मात्र हो । चीनले यसलाई पूर्ण रूपमा स्वीकार गर्दैन र चिनियाँ जनताले यसलाई पूर्ण रूपमा अस्वीकार गर्छन्,’ राजदूत यान्छीले भन्नुभएको छ ।
चीनको सार्वभौमसत्ता र क्षेत्रीय अखण्डताको दृढतापूर्वक रक्षा गर्न १.४ अर्ब चिनियाँ जनताको दृढ प्रतिबद्धता रहेको उहाँले जनाउनु भएको छ। मातृभूमिको पूर्ण एकीकरणलाई साकार पार्नु सबै चिनियाँ जनताको साझा आकांक्षा र पवित्र जिम्मेवारी रहेको दाबी उहाँको छ ।
‘अमेरिकी सभामुखको भ्रमणको प्रतिक्रियास्वरूप चीनले निश्चित रूपमा आफ्नो सार्वभौमसत्ता र क्षेत्रीय अखण्डताको रक्षा गर्न आवश्यक सबै उपायहरू अवलम्बन गर्नेछ । यसबाट उत्पन्न हुने सबै नतिजाहरू अमेरिकी पक्ष र ‘स्वतन्त्र ताइवान’ पृथकतावादी शक्तिहरूले वहन गर्नुपर्छ,’ राजदूत यान्छीले भन्नुभएको छ ।
उहाँले ताइवान प्रश्न विशुद्ध रूपमा चीनको आन्तरिक मामिला रहेको बताउनु भएको छ। उहाँले अमेरिकालाई चीनको आन्तरिक मामिलामा हस्तक्षेप नगर्न आग्रह गर्नुभएको छ। अमेरिकाले कुनै पनि रूपमा ‘स्वतन्त्र ताइवान’ पृथकतावादी शक्तिहरूलाई समर्थन र सहयोग गर्न बन्द गर्नुपर्ने उहाँले बताउनु भएको छ ।
-न्युज एजेन्सी
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच