सिन्धुपाल्चोक । सन्धुपाल्चोकको सदरमुकाम चौताराको टुँडिखेलमा अत्याधुनिक ‘मिनी’ रंगशाला निर्माण थालिएको तीन वर्षमा ३३ प्रतिशतमात्रै काम भएको छ । बागमती प्रदेश सरकारको गौरवको आयोजनाअन्तर्गत सार्वजनिक निर्माण कार्यान्वयन इकाई, काभ्रेमार्फत् ४१ करोड ६२ लाख लागतमा रंगशाला निर्माण सुरु गरिएको हो । निर्माण थालिएको तीन वर्षमा अपेक्षाअनुसार काम अघि बढ्न सकेको छैन ।
जिल्लामा खेलकुद गतिविधिलाई लक्षित गरेर निर्माण सुरु गरिएको रंगशालाको काम साढे दुई वर्षमा सकिने गरी सम्झौता गरिएको थियो । ठेकेदार कम्पनीको लापरबाहीले सम्झौता सकिएको पाँच महिनासम्ममा पनि जम्मा ३३ प्रतिशतमात्र काम भएको सार्वजनिक निर्माण कार्यान्वयन इकाई भैंसेपाटीका प्रमुख डा. चन्द्रप्रसाद लुईँटेलले जानकारी दिनुभयो ।
उहाँका अनुसार रंगशालाको पूर्वपश्चिम र उत्तरतर्फ दर्शक बस्ने ‘प्याराफिट’, ‘स्टेयर्स’, ‘सब्टिचुसेन एरिया’, सञ्चार क्षेत्र, ‘चेञ्जिङ रुम’, ‘फिजियोथेरापी रुम’, ‘रेफ्री रुम’ र ‘भिआइपी’ व्यक्तिका लागि विशेष रुम निर्माण गर्ने योजना रहेको छ । ठेकेदारको ढिलासुस्तीका कारण निर्माणको काम लम्बिएको छ ।
रंगशालाको हालसम्म ६ वटा प्याराफिटमा दुई निर्माणको चरणमा छ भने तीनवटा ‘प्याराफिट’को काम सुरु नै भएको छैन । प्रदेश सरकारले ६ हजार पाँच सय दर्शक क्षमता भएको रंगशाला निर्माण गर्न लागेको हो । रंगशाला निर्माणका लागि टक्सार÷शान्तिदेवी जेभीले ठेक्का पाएको छ ।
समयमै रंगशालाको निर्माण सम्पन्न हुन नसक्दा सुन्दर टुँडिखेल कुरूप बनेको स्थानीय होटल व्यवसायी रामचन्द्र नेपालले बताउनुभयो । उहाँका अनुसार निर्माणका क्रममा निस्किएको माटोले पानी पर्दा टुँडिखेल हिलाम्मे हुने गरेको छ ।
जिल्ला फुटबल संघ अध्यक्ष अमृतमान श्रेष्ठले समयमै ठेकेदारले काम सम्पन्न नगर्दा खेलकुद गतिविधि आयोजनामा समस्या भएको गुनासो गर्नुभयो । यसअघि जिल्लास्तरका खेलकुद यही खेलमैदानमा हुने गरेको बताउँदै अध्यक्ष श्रेष्ठले भन्नुभयो, ‘अहिले केही खेलकुद गर्नुपरे लामोसाँघु पुग्नुपर्छ ।’ चौतारा नजिकै दरबारडाँडामा अर्को खेलमैदान भए पनि डाँडामा भएकाले बल हराएर गेम खेल्नै समस्या हुने गरेको उहाँले बताउनुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच