नवौं राष्ट्रिय खेलकुद : पुनः ‘च्याम्पियन’ बन्ने सेनाको दाबी

पोखरा । मुलुकको प्रमुख सुरक्षा अंग नेपाली सेनाले पोखरामा जारी नवौं राष्ट्रिय खेलकुद प्रतियोगितामा पुनः ‘च्याम्पियन’ को उपाधि जित्ने दाबी गरेको छ । बाह्रै महिना तालिम, खेलकुद पूर्वाधार, व्यवस्थापन र प्रशिक्षणसहितको तयारीस्तरलाई हेर्दा ‘च्याम्पियन’ को इतिहास आफ्नो टोलीले सहजरूपमै दोहोर्‍याउने नेपाली सैनिक शारीरिक तालिम तथा प्रशिक्षण केन्द्रका प्रमुख महासेनानी मुनाल बस्नेतले दाबी गर्नुभयो । यसअघि सम्पन्न राष्ट्रिय खेलकुद प्रतियोगिताका सातौं र आठौं संस्करणमा सेनाको त्रिभुवन आर्मी क्लब ‘च्याम्पियन’ बन्न सफल भएको थियो ।

उहाँले भन्नुभयो, ‘तालिमको स्तर हेर्दा अघिल्लोभन्दा यसपाली प्रदर्शन राम्रो हुन्छ, नतिजा पनि राम्रो हुने अपेक्षा छ । राष्ट्रिय खेलकुद प्रतियोगिता देशभित्र खेलको सबैभन्दा ठूलो समारोह हो । अन्य टोलीका तुलनामा पूर्वाधार र व्यवस्थापन चुस्त छ, खेलाडी अब्बल छन्, च्याम्पियनको इतिहासको बर्चस्व कायम राख्न कोसिस गर्छाैं ।’

राष्ट्रिय खेलकुद प्रतियोगिता यसपटक प्रादेशिक संरचनामा हुन लागेकाले विभागीय टोलीलाई प्रादेशिक टोलीको कडा चुनौती सामना गर्नुपर्ने देखिएको छ । सेनाले प्रतिस्पर्धामा पदक आफ्नो पक्षमा पार्न सामूहिकभन्दा व्यक्तिगत खेल विधातर्फ बढी ध्यान केन्द्रित गरेको छ । मुलुक स्तरीयतामा प्रवेश गरेसँगै खेलकुदप्रतिको सर्वत्र चासो र रुचि बढेको हुँदा प्रतिस्पर्धा र गुणस्तरीय खेलाडी उत्पादनमा निकै प्रभावकारी नतिजा हासिल हुने विश्वास गरिएको छ ।

पछिल्लो समय खेलकुदको विकासका लागि प्रादेशिक र स्थानीय तहमा समेत विभिन्न संरचना र कार्यक्रम विकास तथा विस्तार हुँदै गएको छ । सेनाले टोलीलाई जिताउनमात्र केन्द्रित नभई राष्ट्रिय तथा अन्तर्राष्ट्रिय खेलाडीको पहिचान र उत्पादनमा समेत महत्वपूर्ण योगदान पुर्‍याउँदै आएको छ ।

सेनाले गण्डकी प्रदेशको राजधानी पर्यटकीय नगरी पोखरामा जारी उक्त प्रतियोगिताका लागि खेलाडी, प्रशिक्षक, अफिसियल र प्रतिनिधि गरी ७२८ जनशक्ति पठाएको छ । प्रतियोगिताअन्तर्गत सेनाले फुटबल, एथलेक्टिस, बक्सिङ, तेक्वान्दो, कराँते, भारोत्तोलन, भलिबल, टेबल टेनिस, कबड्डी, कुस्ती, ब्याडमिन्टन, उसु, जुडो, बास्केट बल, बुद्धिचाल, आइटिएफ, तेक्वान्दो, हृयाण्डबल र स्क्वासमा प्रतिस्पर्धा गर्नेछ ।

त्रिभुवन आर्मी क्लबका खेलाडी हक्की, सुटिङ, जिम्न्याष्टिक, लन-टेनिस, क्रिकेट, साइक्लिङ, आर्चरी, सेपाताक्रो, खोखो, फेन्सिङ, ट्रायथलन, पौडी, शारीरिक सुगठन, गल्फ, प्याराग्लाइडिङ, सफ्ट टेनिस र रग्बीमा अन्य टोलीका खेलाडीसँग सशक्तरूपमा भिड्नेछन् ।
प्रतियोगिताका लागि तय भएका स्वर्ण ३९३, रजत ३९३ र कास्य ६०० पदकमध्ये कम्तीमा पनि १४० स्वर्ण, ८२ रजत र ७५ कास्य जित्ने सेनाले दाबी गरेको छ । सेनाले यसपटक जिम्न्यास्टिक, पौडी, कराँते, तेक्वान्दो, दौड, टेनिसलगायतका खेल विधामा बढी पदकको अपेक्षा गरेको छ ।

यसअघि आठौं प्रतियोगितामा सेनाका खेलाडीले १४८ स्वर्ण, ८७ रजत र ७२ कास्य पदक हात पारेका थिए । यस प्रतियोगिताका लागि क्लबले २७५ महिला खेलाडीसमेत पठाएको छ । तेह्रौं साफ खेलकुदमा नेपालले प्राप्त गरेका २०७ पदकमध्ये सेनाका खेलाडीले मात्रै १०३ पदक जितेका थिए ।

साफमा नेपालको प्रतिनिधित्व गरी पदक प्राप्त गर्ने अधिकांश खेलाडी नवौं राष्ट्रिय खेलकुदमा सहभागी रहेकाले पनि सेनाले विगतको रेकर्ड सुरक्षित राख्ने दाबी गरेको हो । अन्य टोलीका तुलनामा नियमित अभ्यास र प्रशिक्षण गर्दै आएका सेनाका खेलाडीका लागि प्रत्येक युनिटका साथै लगनखेल र सैनिक मुख्यालय परिसरमा सुविधासम्पन्न प्रशिक्षण केन्द्र र खेलमैदानसमेत छ ।