म्याग्दीमा निर्माणाधीन २० ठूला विकास योजना अलपत्र

-ध्रुवसागर शर्मा
म्याग्दी । हिमाली जिल्ला म्याग्दीमा निर्माणाधीन २० वटा ठूला विकास निर्माणका योजनाहरु अलपत्र परेका छन् ।

संघीय र प्रदेश सरकारका यी योजनाहरु ठूला निर्माण व्यवसायीलाई राजनीतिक दल, जनप्रतिनिधि र प्रशासनले संरक्षण गर्दा अलपत्र परेका स्थानीयको गुनासो रहेको छ ।

अलपत्र परेका योजनाहरुमा सडक, मोटरेबल पुल, भवनलगायतका विकास आयोजना रहेका छन् । म्याग्दीमा गण्डकी प्रदेश सरकारका ११ र संघीय सरकारका नौवटा सडक र मोटरेबल पुलसम्बन्धी आयोजना अलपत्र परेका हुन् ।

पूर्वाधार विकास कार्यालय म्याग्दीअन्तर्गतका छवटा सडक र पाँचवटा मोटरेबल पुल अलपत्र छन् । यसैगरी १५ वटा खानेपानी, बेनी अस्पतालको ५० शैयाको भवन निर्माण योजना अलपत्र छ । बेनी–जोमसोम, बेनी–दरवाङ, गलेश्वर, भगवती, पोखरेवगर–भगवती, दरवाङ–ताकमधारापानी बेनी–बागलुङ, बेनी बालढुंगालगायतको सडक पटक–पटक म्याद थप गर्दा पनि निर्माण व्यवसायीले निर्माण कार्यमा ढिलासुस्ती र अलपत्र पार्ने क्रम बढेको छ ।

म्याग्दीका नवनिर्वाचित प्रतिनिधि र प्रदेश सभाका सदस्यले जिल्लाका अधुरा र अलपत्र योजनालाई छ महिनाभित्र पूर्णता दिन तत्कालै पहल थाल्ने बताएका छन् ।

प्रतिनिधिसभा सदस्यमा निर्वाचित नेपाली कांग्रेस म्याग्दीका सभापति खमबहादुर गर्बुजा (खम्वीर) ले जिल्लामा रोकिएका विकास निर्माणका योजनालाई तत्काल गति बढाउने प्रतिबद्धता जनाउनु भएको छ ।

अलपत्र छ गलेश्वर–भगवती सडक

विगत तीन वर्षदेखि म्याग्दीको रघुगंगा गाउँपालिकाको गलेश्वर–पिप्ले–भगवती कालोपत्रे सडक योजना अलपत्र छ । गण्डकी प्रदेश सरकारको ‘एक निर्वाचन क्षेत्र, एक सडक आयोजना’ कार्यक्रमअन्तर्गत पूर्वाधार विकास कार्यालयले सञ्चालन गरेको योजनामा निर्माण कम्पनी एपेक्स–खड्का कृष्ण जेभीले समयमै काम नगर्दा योजना अलपत्र परेको हो ।

आयोजनाको थप भएको समयमा समेत निर्माण कम्पनीले काम सुरु नगरेपछि रघुगंगा गाउँपालिका वडा नम्बर २ र ३ को वडाका जनप्रतिनिधिले पूर्वाधार विकास कार्यालय पुगेर ध्यानाकर्षण पत्र बुझाएका छन् । वडाध्यक्षद्वय अमृत भण्डारी र खिमबहादुर शाहीले सडक कालोपत्रे गर्ने कामलाई छिटोभन्दा छिटो अघि बढाउन माग गर्दै कार्यालय प्रमुख गुरुदत्त अधिकारीलाई ध्यानाकर्षण पत्र बुझाउनु भएको हो । ध्यानाकर्षण पत्रमा निर्माण कम्पनीको लापरबाहीले कालोपत्रे गर्ने सडक योजना अलपत्र पर्ने खतरा बढेका कारण समन्वय गरेर कामअघि बढाउन उल्लेख गरिएको छ ।

पूर्वाधार विकास कार्यालयका प्रमुख गुरुदत्त अधिकारीले पिप्लेदेखि भगवतीसम्मको सडक कालोपत्रेकोे काम तत्काल अगाडि बढाउन निर्माण कम्पनीलाई निर्देशन गरिएको बताउनु भयो । ‘निर्माण कम्पनीलाई कार्यक्षेत्रमा खटिन हामीले पटकपटक पत्र काटेका छौं, यही महिनाको अन्तिमबाट काम सूचारु हुन्छ’ अधिकारीले भन्नुभयो ।

पिप्लेदेखि भगवती जोड्ने सडक कालोपत्रे गर्न निर्माण कम्पनीले सडकलाई फराकिलो बनाउने, ग्रेड मिलाउने, नालीनिर्माण गर्ने लगायतका काम गरेर अलपत्र छोडेको थियो । भ्याटसहित १८ करोड ४१ लाख ८ सय ३८ रुपैयाँमा ठेक्का सम्झौता भएको यस योजनामा आठ किलोमिटर सडकलाई आठ मिटर फराकिलो बनाउने र ५.५ मिटर कालोपत्रे गर्नुपर्ने उल्लेख छ । प्रदेशका अन्य योजनालाई तत्काल काम अघि बढाउन निर्माण कम्पनीलाई ताकेता गरिरहेको पूर्वाधार कार्यालयले जनाएको छ ।

बेनी–मालढुंगा सडकको हविगत पनि उस्तै

राष्ट्रिय गौरवको कालिगण्डकी करिडोरअन्तर्गत म्याग्दीको बेनीदेखि पर्वतको मालढुंगासम्मको १३ किलोमिटर लामो बेनी–मालढुंगा सडक आयोजना पनि अलपत्र बनेको छ । ठेकेदार कम्पनीले बीचैमा काम छाडेपछि स्तरोन्नतिको चरणमा रहेको यो खण्ड अलपत्र बनेको हो । सडकलाई अस्तव्यस्त पारेर ठेकेदार विगत चार महिनादेखि कार्यस्थलबाट बाहिरिएको छ ।

ठेकेदार कम्पनीबीच एकआपसमा असमझदारी बढेपछि चार महिना अघिसम्म काम गरेको ठेकेदार सडक अलपत्र अवस्थामा छाडेर योजना निर्माणबाट पछि हटेको हो । सडक अस्तव्यस्त हुँदा सर्वसाधारणले सास्ती भोग्नुपरेको छ । यो सडकमा १३ किलोमिटर दुरी पार गर्न सवारीसाधनलाई डेढ घण्टा समय लाग्ने गरेको छ ।

बेनी र मुस्ताङ भ्रमण गर्न आउने पर्यटकले सडकको दुरावस्थाका कारण घण्टौंसम्म जाममा फस्नुपरेको गुनासो गरेका छन् । वर्षातका समयमा सडक मािथबाट खसेको पहिरो, खाल्डाखुल्डी र अस्तव्यस्त तरिकाले छाडिएका निर्माण सामग्रीका कारण यात्रुहरूले सास्ती भोग्नुपरेको गुनासो बढेको छ ।