स्याङ्जा । स्याङ्जाको पुतलीबजार नगरपालिका-३ स्थित बाडखोलामा रहेको नेपाल पेट्रोल्युब प्रालिको पेट्रोल पम्पलाई झुक्याई मिसावटयुक्त पेट्रोल बिक्री गरेको पुष्टि भएपछि जिल्ला प्रशासन कार्यालय स्याङ्जाले कारबाही गरेको छ । गत पुसमा मोटरसाइकल र टेम्पो चालकहरूले बाडखोलाको पेट्रोल्युब पम्पबाट वितरित पेट्रोलमा मिसावट भएको कारण सवारीका साधनमा समस्या देखिएकाले कारबाहीका लागि जिल्ला प्रशासन कार्यालय स्याङ्जामा उजुरी गरेका थिए ।
उजुरीपश्चात् जिल्ला प्रशासन कार्यालय स्याङ्जाका तत्कालीन प्रमुख जिल्ला अधिकारी गंगाबहादुर क्षेत्रीसहित अन्य प्राविधिक टोलीले उक्त पेट्रोल पम्पलाई पुस २७ गते सिल गरेको थियो । जिल्ला प्रशासन कार्यालयले नेपाल आयल निगम गण्डकी प्रदेश कार्यालयमा उक्त पम्पको पेट्रोल ल्याब परीक्षणका लागि पठाइएकोमा परीक्षणमा उक्त पम्पको पेट्रोलमा मिसावट देखिएको पुष्टि भएको थियो । सोहि आधारमा जिल्ला प्रशासन कार्यालयले ‘कालोबजार तथा केही अन्य सामाजिक अपराध तथा सजाय ऐन २०३२’ अनुसार झुक्याई बिक्री वितरण गरेको कसुरमा फागुन २९ गते उक्त पम्पका सञ्चालकहरू र कर्मचारीलाई कारबाहीको फैसला गरेको थियो ।
जिल्ला प्रशासन कार्यालय स्याङ्जाले चार जना सञ्चालकहरूलाई जनही एक लाख ८० हजार र कर्मचारीलाई एक लाख गरी आठ लाख २० हजार क्षतिपूर्ति कोषमा जम्मा गर्नेसमेत गरी जम्मा आठ लाख ५२ हजार आठ सय जरिवाना गरेको प्रमुख जिल्ला अधिकारी शशिधर घिमिरेले बताउनुभयो । पुस २७ मा सिल्ड भएको उक्त पम्पमा बाँकी रहेको मिसावटयुक्त पेट्रोल १९१० लिटर मंगलबार जिल्ला प्रशासन कार्यालयले नष्ट गरेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच