युनाइटेडको सहज जित

Monday May 15, 2023

Read Time = 3 mins

प्रिन्ट संस्करण

खेलकुद

A A- A+

लण्डन । इंग्लिस प्रिमियर लिगमा म्यानचेस्टर युनाइटेडले घरेलु मैदानमा वल्भ्समाथि दुई-शून्यको सहज जित हात पारेको हो । युनाइटेडको जितमा एन्थोनी मार्सियाल र एलेहान्द्रो गर्नाचोले एक/एक गोल गर्नुभयो ।

ओल्ड ट्राफोर्डमा भएको खेलको ३२औँ मिनेटमा एन्थोनी मार्सियालले गोल गर्दै युनाइटेडलाई अग्रता दिलाउनुभयो । उहाँले एन्टोनीको पासमा गोल गर्नुभएको थियो ।

त्यसपछि इन्जुरी समयमा गर्नाचोले गोल गर्दै युनाइटेडको जित पक्का गर्नुभयो । ८२औँ मिनेटमा जेडान सान्चोको स्थानमा मैदान छिर्नुभएका गर्नाचो बु्रनो फर्नान्डेसको पासमा गोल गर्न सफल हुनुभएको थियो ।

यस जितसँगै युनाइटेड ३५ खेलबाट ६६ अंक जोडेर चौथो स्थानमा यथावत् रहेको छ । समान ६६ अंक नै रहे पनि न्युक्यासल युनाइटेड गोलअन्तरमा अघि छ । पराजित वल्भ्स ३६ खेलबाट ४० अंक जोडेर १३औँ स्थानमा छ ।

प्रिमियर लिगकै अर्काे खेलमा चेल्सीले घरेलु मैदानमा नटिङहम फरेस्टसँग दुई-दुई गोलको बराबरी खेल्यो । चेल्सीका लागि दुवै गोल रहिम स्टर्लिङले गर्दा नटिङहमका ताइवो एओनियीले पनि दुई गोल गर्नुभयो ।

खेलको १३औँ मिनेटमा ताइवोको गोलबाट चेल्सीले अग्रता लियो । ५१औँ मिनेटमा रहिमले बराबरी गोल फर्काउनुभयो । ५८औँ मिनेटमा रहिमले व्यक्तिगत दोस्रो गोल गर्नुभयो । ६२औँ मिनेटमा ताइवोले गोल फर्काएपछि खेल दुई-दुई गोलको बराबरीमा सकिएको थियो ।
यस बराबरीसँगै चेल्सी ३५ खेलबाट ४३ अंक जोडेर ११औँ स्थानमा छ । नटिङहम ३६ खेलबाट ३४ अंक जोडेर १६औँ स्थानमा छ ।

यस्तै, साउथ हृयाम्टन ११ वर्षपछि इंग्लिस प्रिमियर लिगबाट रेलिगेसनमा परेको छ । फुलहमसँग दुई-शून्य ले पराजित हुँदै साउथ हृयाम्टन दुई खेल बाँकी छँदा रेलिगेसनमा परेको हो । अब साउथ हृयाम्टनले २०१२ पछि पहिलोपटक अर्को सिजन च्याम्पियनसिप फुटबल खेल्नेछ ।

साउथ हृयाम्टनले अब प्रिमियर लिगका बाँकी दुई खेलमा जित हासिल गरे पनि रेलिगेसन क्षेत्र छाड्न पर्याप्त हुनेछैन । साउथ हृयाम्टनले अब ब्राइटन र लिभरपुलसँग खेल्न बाँकी छ । यस जितसँगै फुलहम ३६ खेलबाट ५१ अंक जोडेर नवौँ स्थानमा छ । पराजित साउथ हृयाम्टन ३६ खेलबाट २४ अंक जोडेर पुछारमा छ । एजेन्सी ।

प्रतियोगिता

फुटबल

यो खबर पढेर तपाईलाई कस्तो महसुस भयो ?