आजदेखि सूर्य नेपाल गल्फ टुर

हिमालय टाइम्स

Monday November 20, 2023

Read Time = 4 mins

प्रिन्ट संस्करण

खेलकुद

खेलकुद बिविध

A A- A+

काठमाडौं । सूर्य नेपाल सेन्ट्रल ओपन गल्फ सोमबार (आज)देखि गोकर्ण गल्फ कोर्समा सुरु हुने भएको छ । सूर्य नेपाल गल्फ टुर २०२३/०२४ को पहिलो प्रतियोगिताका रूपमा रहेको सूर्य नेपाल सेन्ट्रल ओपन आजदेखि सुरु हुन लागेको हो । आयोजक नेपाल प्रोफेसनल गल्फर्स एसोसिएसनले आइतबार पत्रकार सम्मेलनको आयोजना गर्दै यस सिजनको सूर्य नेपाल गल्फ टुरको सुरुवातबारे जानकारी दिएको थियो ।

सूर्य नेपाल गल्फ टुर २०२३/०२४ अन्तर्गत कुल आठवटा प्रतियोगिता छन् । आगामी नोभेम्बरमा पहिलो प्रतियोगिता सुरु हुनेछ भने सूर्य नेपाल प्रिमियर गल्फ च्याम्पियनसिपबाट यस सिजनको टुर सम्पन्न हुनेछ ।

सिजनको पहिलो प्रतियोगिता सेन्ट्रल ओपन चार दिनसम्म सञ्चालन हुनेछ । कुल ७२ होलमा प्रतिस्पर्धा हुनेछ । दुई चरण (३६ होल) को खेलपछि कट नियम लागू हुनेछ । शीर्ष २१ प्रोफेसन र ६ एमेच्योर गल्फर फाइनल (३६ होल) का लागि छनोट हुनेछन् । शीर्ष २१ भित्र अंक बराबरी भएका गल्फरले पनि फाइनलको यात्रा तय गर्ने प्रावधान छ । सिजनको पहिलो प्रतियोगितामा भुवन नगरकोटी, निरज तामाङ, धन थापा, सञ्जय लामा र रवि खड्कालाई उपाधि दाबेदारका रूपमा हेरिएको छ ।

एमेच्योरतर्फ सद्भाव आचार्य उपाधि दाबेदार हुनुहुन्छ । यो प्रतियोगिताको विजेताले एक लाख ४५ हजार र उपविजेताले ९४ हजार रुपैयाँ प्राप्त गर्नेछन् । तेस्रो हुनेले भने ७० हजार रुपैयाँ पाउनेछ । एमेच्योर गल्फरले भने प्रो.को उपाधि जितेमा पुरस्कार भने पाउने छैनन् । उनीहरूले ट्रफीमा नै चित्त बुझाउनुपर्नेछ । यद्यपि, शीर्ष २१ प्रो गल्फरले भने नगद पुरस्कार पाउनेछन् । यस प्रतियोगिताबाट खेलाडीहरूले कुल आठ लाख ४० हजार रुपैयाँ पुरस्कार पाउनेछन् ।

सिजनको आठ प्रतियोगिताबाट भने प्रो. गल्फरले कुल ६४ लाख ३६ हजार १५० रुपैयाँ पुरस्कार पाउने आयोजकले जनाएको छ । नेपाल प्रोफेसन गल्फर एसोसिएसनका अध्यक्ष रविन्द्रमान श्रेष्ठले अहिले १७औँ संस्करण चलिरहेको र यो आयोजनाले नेपालमा एमेच्योर र प्रो. गल्फरले राम्रो प्रतियोगिताहरू पाइरहेको बताउनुभयो । यस टुरबाट नयाँ युवा गल्फर पनि आइरहने उहाँको विश्वास छ । टुरको दोस्रो प्रतियोगिता भने आगामी डिसेम्बर २४ देखि रोयल नेपाल गल्फ क्लबमा सुरु हुनेछ ।

गल्फ टुर

सूर्य नेपाल

यो खबर पढेर तपाईलाई कस्तो महसुस भयो ?