ओली पक्ष दुईखेमा बाँडियो, गिरी र ढुंगेल अध्यक्षका दाबेदार

नेकपा एमाले झापाको ११औं जिल्ला अधिवेशन बिहीबारदेखि सुरु भएको छ । शुक्रबारसम्म चल्ने अधिवेशन बिर्तामोडस्थित अग्रसेन भवनमा भइरहेको छ । अधिवेशनको उद्घाटन एमाले अध्यक्ष तथा पूर्वप्रधानमन्त्री केपी शर्मा ओलीले गर्नुभएको छ । त्यसका लागि ओली बुधबार नै झापा पुग्नुभएको थियो ।

अधिवेशनबाट तीन वर्षे कार्यकालका लागि नयाँ नेतृत्व चयन हुँदैछ । नेकपा एमाले नयाँ नेतृत्वका लागि अध्यक्षमा कार्यवाहक अध्यक्ष प्रेम गिरी र सचिव शिव ढुंगेलले आकांक्षी हुनुहुन्छ । तर, बुधबार साँझ केपी ओली पक्षले पदाधिकारी टुंगो लगाएको एमाले स्रोतले सूचना चुहाएको छ । गोप्य सूचना अनुसार अध्यक्षका बलिया उम्मेदवार ढुंगेलसँग छलफलसमेत नगरी गिरीलाई अध्यक्षमा सर्वसम्मत गरिएको छ ।

अध्यक्षमा गिरी, उपाध्यक्षमा असारु राजवंशी, सचिवमा तुलसी कार्की, उपसचिवमा अनिता कन्दङ्वा र खगेन्द्र नेपालको नाम टुंगो लगाइएको छ । राजवंशी दुवैतर्फका साझा उम्मेदवार हुनुहुन्छ । झापाका शक्ति केन्द्र मानिँदै आउनुभएका देवेन्द्र दाहाललाई समेत बाइपास गर्दै केन्द्रीय सदस्य दीपक कार्कीको योजना अनुसार अध्यक्ष ओलीले उक्त नाममा सहमति गर्न जिल्ला नेताहरूलाई निर्देशन दिनुभएको छ । ती नाममा कार्यकर्ता तहमा चरम असन्तुष्टि रहेको स्वयं एमाले नेताहरूले बताएका छन् ।

एमालेका नेता देवेन्द्र दाहालले समेत कार्कीको योजनालाई रोक्न नसकेको चर्चा छ । एमाले झापाका सचिव ढुंगेललाई कार्कीविरुद्ध वर्षौंदेखि प्रयोग गर्दै आउनुभएका दाहाल अध्यक्षमा गिरीलाई नै स्वीकार गर्ने ठाउँमा पुगेको स्रोतको दाबी छ । दाहाल र कार्की समूह जिल्लाको शक्ति संघर्षमा वर्षौंदेखि विभाजित थियोे ।

यो पनि पढ्नुहोस्

विद्युत् आयात सम्झौता : आशाको दियो निभ्नु भएन

तर, वर्षौंदेखि साथ दिएका नेताहरूलाई छाडेर दाहाल पनि कार्कीसँग मिल्न पुगेको एमाले झापाका एक नेताले बताए । अध्यक्ष ओलीको निर्देशन अनुसार गिरीलाई अध्यक्ष बनाउने सहमति भइसकेको दाबी गरिएको छ । जिल्लामा सहमति भइसकेको विषयमा आफूहरूलाई जानकारी नभएको गिरी इतर पक्षमा उभिएका नेताहरूले बताउने गरेका छन् ।

कार्कीविरुद्ध उभिनुभएका दाहाल पक्षीय दर्जनौं नेताहरू कार्की क्याम्पमा पुगेका छन् । जिल्लाको शक्ति संघर्षमा दाहाललाई कमजोर बनाउन सफल कार्की समूहको विरुद्ध निर्वाचनमा जान सक्ने सम्भावना प्रवल बनेको बुझिएको छ ।

बहुमत प्रतिनिधिहरू ढुंगेलको पक्षमा मतदान गर्न तयार रहेको गिरी इतर पक्षको दाबी छ । गिरी पक्ष निर्वाचनमा जान नहुनेमा जोडबल गरिरहेको छ । झापा एमालेको शक्ति संघर्षमा प्रेम गिरी र शिव ढुंगेल दुवैजना देवेन्द्र दाहाल पक्षीय नेता मानिनुहुन्छ । दाहाल ढुंगेललाई पाखा लगाएर गिरीलाई कार्कीको बलमा अध्यक्ष बनाउने रणनीतिमा रहेक बुझिएको छ । भर्खरै केन्द्रीय सदस्यमा मनोनित कार्की त्यसअघिसम्म जिल्ला अध्यक्ष दोहो¥याउने तयारीमा हुनुहुन्थ्यो ।

कार्की अध्यक्षमा दोहो¥याउने चर्चा हुँदा गिरी अध्यक्षका आकांक्षी समेत नभएको स्रोतको दाबी छ । कार्की आफू केन्द्रीय सदस्यमा मनोनित भएपछि अध्यक्षमा गिरीलाई अघि सारेको बुझिएको छ । निर्वाचनमा जाने मुडमा रहेको गिरी इतर समूह चुनाव जित्नेमा विश्वस्त छ ।

ढुंगेल विद्यार्थी राजनीति र युवा भएकाले पनि चुनावमा बढी प्रतिनिधिको मत पाउनेमा ढुक्क रहनुभएको छ । तर, अध्यक्ष ओलीको निर्देशन विपरीत जान निक्कै सकस भएको बुझिएको छ । ढुंगेललाई प्रदेश कमिटीमा लगेर मनाउने तयारी भइरहेको छ । तर, ढुंगेलले पहिलादेखि नै त्यो कुरा इन्कार गर्दै आउनुभएको छ ।