बागलुङ । स्वास्थ्य कार्यालयको दुई दिने वार्षिक समिक्षा सकिएको छ । गत वर्ष कामको मूल्यांकनको आधारमा बडिगाड गाउँपालिका प्रथम, गलकोट नगरपालिका द्वितिय, तमानखोल तृतिय र बरेङ चौथो भएका थिए । उनीहरुलाई पुरस्कृत समेत गरिएको छ गरिएको थियो । कार्यालयले गत वर्षको बार्षिक प्रगतीको आधारमा स्वास्थ्य संस्थालाई पनि पुरस्कृत गरेको थियो । जसमा निसीखोला गाउँपालिकाका बोहोरागाउँ स्वास्थ्य चौकी प्रथम, बडिगाड गाउँपालिका-५ मा रहेको ग्वालीचौर स्वास्थ्य चौकी दोस्रो, बडिगाड-९ मा रहेको दर्लिङ स्वास्थ्य चौकी तेस्रो र बडिगाड गाउँपालिका-२ को खर्बाङ आधारभुत स्वास्थ्य केन्द्र चौथो भएको थियो ।
व्यवस्थापनतर्फ व्यानर समेत बनाएर रिपोर्टिङ गर्नेमा गलकोट प्रथम, ढोरपाटन द्वितिय, बागलुङ तृतिय भएका थिए । समीक्षापछि आगामी दिनको कार्ययोजना समेत बनाएर पालिकाका स्वास्थ्य शाखाका प्रमुखसहितका स्वास्थ्यकर्मी कार्यक्षेत्रमा खटिएको स्वास्थ्य कार्यालय बागलुङका प्रमुख बाबुराम आचार्यले बताउनुभयो ।
समिक्षा कार्यक्रमलाई सम्बोधन गर्दै गण्डकी प्रदेश सरकारका स्वास्थ्यमन्त्री कृष्ण प्रसाद पाठकले पछिल्लो समयमा नसर्ने रोगको समस्या झनै विकाराल बन्दै गएको हुँदा यसको रोकथामका निम्ती प्रदेश सरकारले जोड दिने बताउनुभएको छ । स्वास्थ्य कार्यालय बागलुङको वार्षिक समीक्षा कार्यक्रममा बोल्दै पाठकले नसर्ने रोगको समस्यालाई प्रदेश सरकार स्थानिय सरकार सँग समन्वय गरी यसको न्युनिकरण तथा रोकथामको प्रयास थाल्ने बताउनुभयो ।
उहाँले स्वास्थ्य क्षेत्रमा नीतिगत सुधार गर्दै नसर्ने रोगको रोकथाम गर्न सकेमा आम नागरिकको ज्यान बचाउन सकिने धारणा व्यक्त गर्नुभयो ।पाठकले रोग लागेर मृत्यु भएकाहरुमा कुल मृत्युको ७१ प्रतिशत नसर्ने रोगको कारण भएको पत्ता लागेको बताउँदै उक्त तथ्यांक भेटेकै कारण पदबहाली गर्दा नसर्ने रोगको स्क्रिनिङ गर्ने निर्णय गरेको समेत जानकारी दिनुभयो ।
दुई दिन सम्म स्वास्थ्यका सवै सूचकलाई मसिनो गरी नियालेका पाठकले आफु स्वास्थ्य क्षेत्रको सुधारका लागि काम गर्ने र यसमा कर्मचारीहरुले सहयोग गर्नका निम्ती आग्रह गर्नुभयो । पाठकले स्वास्थ्य क्षेत्रमा हुने वेथिति राक्न प्रयास गर्ने भन्दै कोही कसैलाई पनि गलत काम गरे छुट नहुने बताउनुभयो । हामी संवेदनशिल क्षेत्रमा काम गर्न आएका छौं । स्वास्थ्य क्षेत्रमा सिमित श्रोत साधनको उपभोगले आम सर्वसाधारणको स्वाथ्यको हेरचाह गर्नुछ । पाठकले भने हरेक क्षेत्रमा नतिजा आउनेगरी काम गर्नुपर्छ । अब गण्डकी प्रदेशलाई स्वास्थ्य क्षेत्रमा अब्बल बनाउनुपर्नेछ । त्यसका लागि सवै लागौं र सहयोग गरौं ।
उहाँले अस्पतालको संख्या बढाएर नागरिकको उपचार र सेवामा पहुँच बढाउन खोजेको बताउनुभयो । नागरिकको स्वास्थ्य सेवामा सरकारले लगानी बढाउँदा विकास निर्माण र अन्य क्षेत्रको सुधार छिटो हुने उहाँको दाबी थियो । त्यस बाहेक बालविवाह अन्त्य र आमा सुरक्षाका कार्यक्रम प्रभावकारी भएमा गण्डकी प्रदेश स्वास्थ्य क्षेत्रमा अब्बल बन्ने पनि पाठकले बताउनुभयो । मन्त्री पाठकले आफ्नो इच्छाशक्ति र स्वास्थ्यकर्मीको पहलकदमीले त्यो सफलता पाउने पनि दाबी गर्नुभएको छ ।
कार्यक्रममा जिल्ला समन्वय समिति बागलुङका प्रमुख अमर थापाले स्वास्थ्य सेवा प्रभावकारी हुँदा दक्ष जनशक्ति निर्माणमा सहयोग पुग्ने बताउनुभयो । बागलुङ नगरपालिकाका प्रमुख बसन्तकुमार श्रेष्ठले स्वास्थ्यकर्मी प्रोत्साहित भएमा सेवा चुस्त हुने भन्दै मातृ मृत्यु शुन्य बनाउने अभियानमा स्थानीय सरकारले पनि साथ दिने बताउनुभएको छ ।
