को हो पाँच करोड ९२ लाखमा नेपाल प्रिमियर लिगको कमर्सियल अधिकार किन्ने ब्राण्ड लजिक ?

काठमाडौं । विज्ञापन एजेन्सी ब्राण्ड डिजिटल लजिक प्रालिले नेपाल क्रिकेट संघ (क्यान) ले मागेको ‘स्ट्राटेजिक एण्ड कमर्सियल राइट्स’ आवेदनमा सबैभन्दा बढी पाँच करोड ९२ लाख रुपैयाँ बोली लगाएर नेपाल प्रिमियर लिगको प्रचार र व्यवस्थापनको अधिकार प्राप्त गरेको छ । यस सम्झौतामा लिगको ब्राण्डिङ, मार्केटिङ, प्रसारण अधिकार, प्रायोजन व्यवस्थापन र ग्राउण्ड ब्राण्डिङको जिम्मेवारी ब्राण्ड लजिकलाई दिइएको छ । कम्पनीले एनपिएलको आर्थिक पक्षलाई मजबुत बनाउँदै लिगको लोकप्रियता बढाउन महत्वपूर्ण भूमिका निर्वाह गर्नेछ ।

२०१९ मा स्थापना भएको ब्राण्ड लजिकले छोटो समयमै विज्ञापन क्षेत्रमा उल्लेखनीय प्रभाव जमाएको छ । डिजिटल मार्केटिङ सेवा दिँदै सुरु भएको कम्पनीले समयसँगै आफ्नो उपस्थिति अझै बलियो बनाउँदै ल्याएको छ । कम्पनीको स्थापना भएको केही महिनापछि नै कोभिड महामारी सुरु भएको कठिन समयमा पनि ब्राण्ड लजिकले आफ्नो उपस्थितिलाई अझ सशक्त बनाउन सफल भयो । जब सबैजना अनलाइनतर्फ सिफ्ट भइरहेका थिए, कम्पनीले डिजिटल विज्ञापनको महत्व बुझेर विभिन्न ब्राण्डहरूलाई आफ्नो सेवामा समाहित गर्‍यो ।

ब्राण्ड लजिकका संस्थापक र प्रमुख कार्यकारी अधिकृत रोशन निरौलाले चारजना कर्मचारीको सानो टिमसहित विभिन्न ब्राण्डहरूलाई डिजिटल विज्ञापनमा लगानी गर्न प्रेरित गर्नुभयो । जसलाई विभिन्न स्वदेशी र बहुराष्ट्रिय कम्पनीहरूले विश्वास गरे ।

नयाँ पुस्तालाई अन्तर्राष्ट्रियस्तरको सामग्री (कन्टेन्ट) दिने उद्देश्यले ब्राण्ड लजिकले सिर्जनात्मक विज्ञापनहरू निर्माण गर्दै सर्वसाधारणको मन जित्न सफल भयो । कम्पनीले गुणात्मक र संख्यात्मक दुवै दृष्टिले उल्लेखनीय प्रगति गरेको छ । डिजिटल ब्राण्डिङमा आफ्नो प्रभाव बनाएपछि कम्पनीले मोसन ग्राफिक्स र टेलिभिजन विज्ञापन निर्माणमा समेत काम सुरु गर्‍यो ।

ADVERTISEMENT

ब्राण्ड लजिकले बनाएको सुरुवाती ‘सिद्ध बाबा रिफाइन्ड तेल’ को जनचेतनामूलक विज्ञापन ‘अन्न नफालौँ’ले सर्वसाधारणको मन जित्न सफल भयो । कथा र विज्ञापनको संयोजन गर्ने यो नयाँ प्रयासले ब्राण्ड लजिकलाई थप लोकप्रिय बनायो, त्यसपछि विभिन्न राष्ट्रिय र अन्तर्राष्ट्रिय कम्पनीहरू पनि विज्ञापन निर्माणका लागि ब्राण्ड लजिकसँग आबद्ध भए ।

दुई वर्षअघि ब्राण्ड लजिकले ‘माई पे’ डिजिटल वालेटका लागि निर्माण गरेको ‘इभोलुसन अफ मनी’ शीर्षकको विज्ञापनले कम्पनीलाई नयाँ उचाइमा पुर्‍यायो । यो विज्ञापनले पुरातन कालदेखि आधुनिक क्युआर प्रणालीसम्म पैसा र लेनदेनका शैलीहरूमा आएको परिवर्तनलाई प्रभावकारी ढंगले प्रस्तुत गरेको थियो ।

हालसम्म ब्राण्ड लजिकले ३५ वटा टेलिभिजन विज्ञापन निर्माण गरिसकेको छ । ती विज्ञापनहरूले जीवनका साना तर महत्वपूर्ण घटनाहरूलाई सिर्जनात्मक ढंगले प्रस्तुत गरेका छन् । कम्पनीले अहिले देशभरका २०० भन्दा बढी कम्पनी र ब्राण्डहरूलाई डिजिटल मार्केटिङमा सहयोग गर्दै आएको छ । नेपालका ३२ भन्दा बढी कर्पोरेटहरू प्रत्यक्षरूपमा ब्राण्ड लजिकको सेवा लिइरहेका छन् । साथै, बंगलादेश, भारत, अमेरिका, मलेसिया र दुबईका १० ठूला ब्राण्डहरूले पनि ब्राण्ड लजिकलाई विश्वास गरेका छन् ।

अब एनपिएलको कमर्सियल राइट्सको जिम्मेवारीसहित ब्राण्ड लजिकले यो लिगलाई राष्ट्रिय तथा अन्तर्राष्ट्रियस्तरमा स्थापित गर्न महत्वपूर्ण भूमिका खेल्ने अपेक्षा गरिएको छ । यसले लिगको ब्राण्डिङलाई नयाँ उचाइमा पुर्‍याएर देशभर र अन्तर्राष्ट्रिय रूपमा खेलप्रेमीहरूलाई आकर्षित गर्न मुख्य भूमिका निर्वाह गर्नेछ ।