स्थानीय तह उपनिर्वाचन

काठमाडौं । स्थानीय तहमा रिक्त विभिन्न ४१ पदका लागि आइतबार भएको उपनिर्वाचन शान्तिपूर्ण रूपमा सम्पन्न भएको छ । बिहान ७ बजेदेखि सुरु भएको निर्वाचन अपराहृन ५ बजेसम्म सबै निर्वाचनस्थल र केन्द्रमा शान्तिपूर्ण वातावरणमा सम्पन्न भएको निर्वाचन आयोगका सहसचिव एवं प्रवक्ता नीता पोख्रेल अर्यालले जानकारी दिनुभएको छ । कतिपय मतदान केन्द्रमा भने निर्धारित समयअगावै मतदान सकिएको थियो । प्रमुख निर्वाचन आयुक्त दिनेशकुमार थपलियाले उपनिर्वाचनमा ६२ प्रतिशत मत खसेको जानकारी दिनुभयो । उपनिर्वाचनमा सबैभन्दा बढी डोल्पाको त्रिपुरासुन्दरी नगरपालिका-५ मा र सबैभन्दा कम काठमाडौं महानगरपालिकाको वडा नम्बर १६ मा मत खसेको उहाँले जानकारी दिनुभयो । आयोगकी प्रवक्ता अर्यालले ४१ वटै स्थानमा शान्तिपूर्ण ढंगले मतदान सम्पन्न भएको जानकारी दिँदै भन्नुभयो, ‘मतदान शान्तिपूर्ण रूपमा सम्पन्न भएको छ । करिब ६२ प्रतिशत मत खसेको छ ।’ निर्वाचन आयोगका सहायक प्रवक्ता दुर्गाप्रसाद चालिसेले आयोगले ६० प्रतिशत मत खस्ने अनुमान गरे पनि दुई प्रतिशत बढेको बताउनुभयो ।

उपनिर्वाचन भएका अधिकांश स्थानमा गएरातिदेखि नै मतगणना सुरु भएको थियो । मोरङको ग्रामथान र दैलेखको महाबु गाउँपालिकाको अध्यक्षको लागि आज मात्रै मतगणना हुने आयोगको भनाइ छ । उपनिर्वाचनमा दुई लाख २६ हजार ७९९ मतदाता छन् । नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ सहित ४१ पदका लागि आइतबार मतदान भएको थियो । उपनिर्वाचनमा विभिन्न २० राजनीतिक दल र स्वतन्त्र गरी ३७६ उम्मेदवार प्रतिस्पर्धी छन् ।

नगरपालिका प्रमुख एक, उपप्रमुख एक, गाउँपालिका अध्यक्ष दुई, उपाध्यक्ष चार र वडाध्यक्ष ३३ गरी ४१ पदका लागि उपनिर्वाचन भएको हो । ताप्लेजुङको सिरिजंगा गाउँपालिका-३, झापाको कन्काई नगरपालिका-६, तेह्रथुमको लालिगुराँस नगरपालिका-८, सुनसरीको गढी गाउँपालिका-६, ओखलढुंगाको मोलुङ गाउँपालिका-५, उदयपुरको त्रियुगा नगरपालिका-१२ र बेलका नगरपालिका-९, सप्तरीको डाक्नेश्वरी नगरपालिका-१ र ४, धनुषाको धनुषाधाम नगरपालिका-१, महोत्तरीको रामगोपालपुर नगरपालिका-२, रौतहतको ईशनाथ नगरपालिका-७, रौतहटका राजपुर नगरपालिका-६ र गढीमाई नगरपालिका-८ मा उपनिर्वाचन भएको हो । काठमाडौंको काठमाडौं महानगरपालिका-१६, कीर्तिपुर नगरपालिका-१ र ४, नुवाकोटको ककनी गाउँपालिका-२, मकवानपुरको हेटौँडा उपमहानगरपालिका-१२, गोरखाको गोरखा नगरपालिका-५, गुल्मीको मुसीकोट नगरपालिका-१, कपिलवस्तुको शुद्धोधन गाउँपालिका-१, रोल्पाको रुण्टीगढी गाउँपालिका-४, बर्दियाको ठाकुरबाबा नगरपालिका-४, रुकुम (पश्चिम भाग)को सानीभेरी गाउँपालिका-५ वडाध्यक्ष पदका लागि आइतबार मतदान भएको हो । यस्तै, दैलेखको दुल्लु नगरपालिका-१३, जाजरकोटको कुसे गाउँपालिका-७, कालीकोटको तिलागुफा नगरपालिका-४, डोल्पाको त्रिपुरासुन्दरी नगरपालिका-५, बझाङको सूर्मा गाउँपालिका-४, डोटीको पूर्वीचौकी गाउँपालिका-६, दार्चुलाको दुहुँ गाउँपालिका-५ र कञ्चनपुरको भीमदत्त नगरपालिका-६ मा पनि उपनिर्वाचन भएको हो । निर्वाचनमा २० राजनीतिक दल र स्वतन्त्र गरी ३७६ उम्मेदवार प्रतिस्पर्धामा छन् । यसअघि जिल्ला समन्वय समिति ओखलढुंगा र कैलालीका प्रमुखमा क्रमशः नेपाली कांग्रेसका उम्मेदवार टेकराज भट्टराई र टीकाकुमारी चौधरी (भूल) तथा रुकुम (पूर्वी भाग) पुगा उत्तरगंगा गाउँपालिका-२ मा नेकपा माओवादी केन्द्रका जगत घर्ती निर्विरोध निर्वाचित भइसकेका छन् ।

सम्पूर्ण मतपरिणाम दुई दिनभित्र
निर्वाचन आयोगले उपनिर्वाचनको मतपरिणाम दुई दिनभित्र सार्वजनिक गर्ने योजना बनाएको छ । प्रमुख निर्वाचन आयुक्त दिनेशकुमार थपलियाले मंसिर १७ गते अर्थात् सोमबारभित्रै मतपरिणाम सार्वजनिक गर्ने गरी तयारी गरिएको जानकारी दिँदै भन्नुभयो, ‘१७ गते भित्रमा सबै नतिजा प्रकाशन गर्नेगरी आवश्यक तयारी गर्न लगाइएको छ । राजनीतिक दलका उमेदवारका प्रतिनिधिलगायत सबैले सहयोग गरिदिए समयमै मतगणना सकिन्छ ।’ वडामा एकभन्दा बढी मतदान केन्द्र भए मतपेटिका एकै ठाउँमा ल्याउनुपर्ने बताउँदै प्रमुख आयुक्त थपलियाले भन्नुभयो, ‘एउटा मात्रै मतदान केन्द्र रहेका वडामा मतदान सकिनासाथ मतपेटिका अन्यत्र ढुवानी नगरी सोही स्थानमा गणना गर्ने व्यवस्था गर्नू भनेका छौँ । उपनिर्वाचन भएको स्थानका प्रमुख र उप्रमुखको हकमा १७ गते राति १२ बजेसम्ममा मतपरिणाम सार्वजनिक गर्नेगरी व्यवस्था मिलाएका छौँ । गणना टोली, आवश्यक पर्ने रिसोर्स र सुरक्षाको व्यवस्था मिलाएका छौँ ।’ निर्वाचनको मतपरिणाम आयोगको वेबसाइटबाट हेर्न सकिने आयोगले जनाएको छ ।

१०२ वर्षीय लामिछानेले गरे मतदान
स्थानीय तह उपनिर्वाचनअन्तर्गत हेटौँडा उपमहानगरपालिका–१२ का १०२ वर्षका गोविन्द लामिछानेले मतदान गर्नुभएको छ । आइतबार वडाध्यक्ष पदका लागि भएको मतदानमा उहाँ सहभागी हुनुभएको हो । उहाँले वडाको भोर्लेस्थित विष्णुज्योति आधारभूत विद्यालयको मतदान केन्द्रबाट मतदान गर्नुभएको हो ।

मतदातालाई प्रहरीले बोकेर पुर्‍याए मतदान केन्द्र
काठमाडौं महानगरपालिका-१६ मा जारी उपनिर्वाचनमा प्रहरीले एकजना ज्येष्ठ नागरिकलाई पिठ्युँमा बोकेर मतदान केन्द्र पु¥याएका छन् । ज्येष्ठ नागरिक ८५ वर्षका स्थानीय श्यामलाल प्रधानलाई प्रहरीले बोकेर मतदान केन्द्रमा पुर्‍याएका हुन् । प्रधानले प्रहरी हवलदारको सहयोगमा लैनचौरस्थित सरस्वती क्याम्पस मतदान केन्द्रमा मत खसाल्नुभएको थियो । प्रधानलाई प्रहरी हवलदार भुवन श्रेष्ठले मत खसाल्ने ठाउँसम्म पुर्‍याइदिनुभएको हो । वडा–१६ काठमाडौं महानगरपालिकाको सबैभन्दा ठूलो वडा हो । नेपाली कांग्रेसबाट निर्वाचित मुकुन्द रिजालको गएको भदौमा निधन भएपछि सो वडामा उपचुनाव भएको हो । वडाध्यक्ष पदका लागि १८ उम्मेदवार प्रतिस्पर्धामा छन् ।

छोरालाई भोट दिएको आरोपबाट बच्न मतपत्र नै अरूलाई दिएपछि...
नेपाली कांग्रेसका संस्थापक बिपी कोइरालाकै समयका कांग्रेसका प्रतिबद्ध कार्यकर्ता उमाकान्त पोखरेलले उपनिर्वाचनमा राजनीतिक नैतिकताको उच्च पाठ प्रस्तुत गर्नुभएको छ । ओखलढुंगाको मोलुङ गाउँपालिका वडा-५ को उपनिर्वाचनमा शिवदूती मावि मतदान केन्द्र पुगेका सोही वडाका कांग्रेस सभापति पोखरेलले आफ्नो मत आफैँले हाल्नुभएन । ७५ वर्षीय पोखरेलले आँखा नदेखेर वा मतपत्र समात्न नसकेर मत नहालेको भने होइन । उहाँका छोरा विष्णु पोखरेल राष्ट्रिय स्वतन्त्र पार्टी (रास्वपा) बाट वडाध्यक्षको उम्मेदवार बनेपछि बाबुले छोरालाई मत दिएको आरोपबाट बच्न पोखरेलले आफ्नो मतपत्र कांग्रेस उम्मेदवारका छोरालाई दिनुभएको हो । वडा नम्बर ५ को उपचुनावमा कांग्रेसबाट उम्मेदवार बन्नुभएका घनश्याम दाहालका छोरा महेश दाहाललाई पोखरेलले आफ्नो मतपत्र थमाएर पार्टीप्रतिको निष्ठा दर्शाउनुभएको हो । सभापति पोखरेलको मत उहाँको इच्छाबमोजिम उम्मेदवारका छोराले मतपत्रमा छाप लगाइदिएको नेपाली कांग्रेस प्रजातन्त्र सेनानी संघका केन्द्रीय सभापति बालकृष्ण दाहालले जानकारी दिनुभयो ।

गौरीशंकरको मतगणनामा ढिलाइ
दोलखास्थित गौरीशंकर गाउँपालिकाको उपाध्यक्षको मतगणना आजबाट मात्र सुरु हुने भएको छ । ९ नम्बर वडाको मतमेटिका गणनास्थल ल्याउन ढिला हुने भएकाले आइतबार नै मतगणना सुरु हुन नसकेको हो । मतदान भएको ९ नम्बर वडा बेदुङबाट मतपत्र संकलन गर्न आइतबार सम्भव नभएकाले आज (सोमबार)बाट गणना हुने मतदान अधिकृत धर्मराज तामाङले जानकारी दिनुभएको छ । मतदान केन्द्रबाट मतपेटिका मतगणना स्थल तोकिएको स्थानमा ल्याउन हिँडेर दुुई दिन लाग्ने तामाङले जानकारी दिनुभयो । निर्वाचन आयोगले भने हेलिकोप्टरबाट मतपत्र ल्याउने बताएको थियो ।

उपप्रधानमन्त्री सिंहले गरे मतदान
स्थानीय तहको उपनिर्वाचनअन्तर्गत उपप्रधानमन्त्री एवं शहरी विकासमन्त्री प्रकाशमान सिंहले मतदान गर्नुभएको छ । उपप्रधानमन्त्री सिंह काठमाडौं महानगरपालिका-१६ का मतदाता हुनुहुन्छ । सिंहले पकनाजोलस्थित युवक मावि मतदान केन्द्रमा पुगेर मतदान गर्नुभएको हो । मतदान गरेपछि उपप्रधानमन्त्री सिंहले मतदान गर्ने आफ्नो अधिकार प्रयोग गर्न मतदातालाई आग्रह गर्नुभएको थियो ।