काठमाडौं । सरकारी काममा अधिकांश ठाउँमा देखिने ढिलासुस्ती र आलटालले मुलुक नै आक्रान्त छ । दुर्लभ अपवादबाहेक धेरै ठाउँमा समयमा काम नगर्ने प्रवृत्ति संस्थागत नै भइसकेको छ । तर, त्रिभुवन विमानस्थलमा देखिएको अहिलेको गतिविधि भने निकै उत्साहप्रद छ । सोमबार राति संस्कृति, पर्यटन तथा नागरिक उड्डयनमन्त्री बद्रीप्रसाद पाण्डे त्रिभुवन अन्तर्राष्ट्रिय विमानस्थलको अवलोकनमा जानुभयो । उहाँले राति १० बजेदेखि १२ बजेसम्म झण्डै दुई घण्टा हाल भइरहेको विमानस्थल स्तरोन्नति कार्यको स्थलगत निरीक्षण गर्नुभएको हो । मन्त्रीसँगै निरीक्षणमा पर्यटन राज्यमन्त्री अरुणकुमार चौधरी, मन्त्रालयका सचिव डा. गणेशप्रसाद पाण्डेयलगायत विमानस्थल पुग्नुभएको थियो । काम अवलोकन गरेपछि मन्त्री पाण्डेले तोकिएको समयभित्रै काम सम्पन्न हुने देखिएको बताउनुभयो । विमानस्थल विस्तारको काम तीव्र गतिमा भइरहेको र तोकिएको समयमै सम्पन्न हुने उहाँको भनाइ छ ।
‘विमानस्थल स्तरोन्नतिको काम तोकिएको समयभित्रै सम्पन्न हुने देखिएको छ । प्राविधिक टोलीहरूले निकै प्रशंसाजनक काम गरिरहनु भएको छ । समयमै काम सम्पन्न भएमा यसको लागत पनि नबढ्ने देखिएको छ’, मन्त्री पाण्डेले भन्नुभयोे, ‘निर्माण व्यवसायी र प्राविधिक टोलीले स्तरोन्नतिको काम गरिरहेका छन् । ठूलो जनशक्ति जसरी परिचालित भएर काम गरिरहेका छन्, त्यो प्रशंसा गर्न योग्य छ । विमानस्थल १० घण्टा बन्द हुँदा आलोचना खेप्नुपरेको छ । त्यस अनुसारको काम पनि भएको देखियो ।’
गत कात्तिक २३ गतेदेखि दैनिक १० घण्टा उडान बन्द गरेर त्रिभुवन विमानस्थलको क्षमता अभिवृद्धिको काम द्र्रुत गतिमा भइरहेको छ । प्राधिकरण अन्तर्गतको हवाई यातायात क्षमता अभिवृद्धि आयोजनाले विमानस्थलको दक्षिण-पश्चिमतर्फ समानान्तर ‘ट्याक्सी वे’, उत्तरतर्फको ‘इन्टरनेशनल एप्रोन’ र विमानस्थलको पूर्वतर्फको ‘हृयांगर एप्रोन’ लगायत विस्तार गर्नेछ । यी काम पूरा गर्न करिब १५ अर्ब खर्च हुने आयोजनाले जनाएको छ ।
प्राधिकरणका महानिर्देशक प्रदीप अधिकारीका अनुसार टिआइएको धावनमार्गसँगै समानन्तर हुने गरी ट्याक्सी वे बनाउन लागिएको छ । ‘विमानस्थलको स्तरोन्नतिपछि २० देखि २५ प्रतिशत धावनमार्गको क्षमता बढ्नेछ भने एयर ट्राफिक व्यवस्थापनमा थप सहज हुन्छ’, महानिर्देशक अधिकारीले भन्नुभयो । विमानस्थल विस्तारका क्रममा समानान्तर ‘ट्याक्सी वे’, ‘इन्टरनेसनल एप्रोन’ ‘हृयांगर एप्रोन’लगायत काम भइरहेको हो ।
विमानस्थलको क्षमता अभिवृद्धिका लागि भइरहेका विभिन्न कामको अवलोकन गर्दै पर्यटनमन्त्री पाण्डेले निर्माण तीव्र गतिमा भइरहेको भन्दै समयमा काम सम्पन्न हुने विश्वास व्यक्त गर्नुभयो । उहाँले ठूलो संख्यामा जनशक्तिसहित प्रभावकारी रूपमा उपकरणको परिचालन गरेर युद्धस्तरमा भइरहेको निर्माणले विकासे आयोजनाको कामलाई गुणस्तरीय र निर्धारित समयमा सम्पन्न गर्न सकिन्छ भन्ने सन्देश दिएको उल्लेख गर्नुभयो । पर्यटनमन्त्री पाण्डेले अहिले भइरहेको निर्माण सन्तोषजनक रहेको जनाउँदै निर्धारित समयमा काम सकेपछि विमानस्थलको उडान सेवा प्रभावकारी र थप गुणस्तरीय हुने विश्वास व्यक्त गर्नुभयो ।
‘दश घण्टा विमानस्थल बन्द गरेर निर्माण तीव्र गतिमा सबै क्षेत्रमा भइरहेको छ । आगामी चैत १८ गतेसम्म १० घण्टा विमानस्थल बन्द गरेर काम गर्ने समय तोकेका थियौँ, अहिलेको युद्धस्तरमा भइरहेको कामले त्योभन्दा पहिला सम्पन्न हुने संकेत गरेको छ’, उहाँले भन्नुभयो । पर्यटनमन्त्री पाण्डेले हरेक परियोजना समयमा काम नहुने, ठेक्का तोडिने र सडक तथा भवन अलपत्र हुने अवस्था रहेको छ भन्दै यस्ता गतिविधि रोक्न सम्बन्धित स्थानीय तह, नागरिक समाजले पनि निर्माण कम्पनीलाई दबाब सृजना गर्नुपर्नेमा जोड दिनुभयो । विमानस्थलमा भइरहेको निर्माणको गतिले तोकिएकै समयमा काम सकिन्छ भन्ने सन्देश दिने उल्लेख गर्नुभयो ।
विमानस्थल क्षमता अभिवृद्धि आयोजनाका प्रमुख दीपेन्द्र श्रेष्ठले आवश्यक जनशक्ति तथा उपकरणको पूर्ण क्षमतामा परिचालन गरेर अहिले विमानस्थलको क्षमता अभिवृद्धिको काम भइरहेको बताउनुभयो । उहाँका अनुसार तीन सयभन्दा दक्ष जनशक्ति, आधुनिक उपकरणको सहायताले दैनिक १० घण्टा विमानस्थल विस्तारको काम भइरहेको छ ।
विमानस्थलको धावनमार्गसँगै समानन्तर हुनेगरी ट्याक्सी वे बनाउन लागिएको प्रमुख श्रेष्ठले जानकारी दिनुभयो । विमानस्थलको स्तरोन्नतिपछि २० देखि २५ प्रतिशत धावनमार्गको क्षमता बढ्नेछ भने एयर ट्राफिक व्यवस्थापन सहज हुने उहाँको भनाइ छ । विमानस्थल स्तरोन्नतिका क्रममा राति १० बजेदेखि बिहान ८ बजेसम्मका सबै उडान कटौती गरिएका छन् । उडान सुरक्षामा कुनै खतरा उत्पन्न नहोस् भनेर उडान बन्द गरेर विस्तारको काम गरिएको प्राधिकरणले जनाएको छ ।
नेपालमा हाल तीन अन्तर्राष्ट्रिय विमानस्थल सञ्चालनमा छन् । त्रिभुवन अन्तर्राष्ट्रिय विमानस्थल स्थापनाको ७४ वर्षपछि भैरहवास्थित गौतमबुद्ध अन्तर्राष्ट्रिय विमानस्थल र पोखरा अन्तर्राष्ट्रिय विमानस्थल सञ्चालनमा आएका हुन् । मुलुकको जेठो त्रिभुवन अन्तर्राष्ट्रिय विमानस्थल भएर आन्तरिकतर्फ ११ हेलिकप्टर कम्पनीसहित १९ हवाई कम्पनी र आन्तर्राष्ट्रियतर्फ तीन नेपालीसहित ३० हवाई सेवा कम्पनीले उडान गर्दै आएका छन् । काठमाडौं विमानस्थलमा आन्तरिकमा दुईतर्फी तीन सयभन्दा बढी र अन्तर्राष्ट्रियतर्फ एक सय हाराहारी उडान हुने गरेका छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच