फेरि वाम दललाई एक ठाउँमा ल्याउने ‘प्रचण्ड’ प्रयास

काठमाडौं । नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले तीन वामपन्थी दलसँग एकता वार्ता गर्नुभएको छ । तीनै दलसँगको एकता वार्ता सकारात्मक दिशामा अघि बढेको उहाँको भनाइ छ । माओवादी केन्द्रनिकट एकीकृत अखिल नेपाल शिक्षक संगठन र नेसपा (महेन्द्र यादव समूह)निकट नेपाल शिक्षक समाजबीच एकता घोषणा समारोहलाई शनिबार काठमाडौंमा सम्बोधन गर्दै अध्यक्ष प्रचण्डले एकता वार्ताबारे जानकारी दिनुभएको हो । एकता वार्ता गरेका दल कुन-कुन हुन् ? भन्ने उहाँले खुलाउनुभएन । तर, माओवादी केन्द्रका एक नेताका अनुसार अध्यक्ष प्रचण्डले नेत्रविक्रम चन्द ‘विप्लव’ नेतृत्वको नेकपा, नेकपा (एकीकृत समाजवादी) र महेन्द्र यादव नेतृत्वको नेसपासँग एकता वार्ता गरिरहनु भएको छ । छलफलका क्रममा वाम एकताको विकल्प नभएको धेरैको साझा निष्कर्ष बन्न थालेको अध्यक्ष प्रचण्डले बताउनुभयो । अब बृहत् एकता र ध्रुवीकरणको बाटो फराकिलो बन्ने उहाँले विश्वास व्यक्त गर्नुभयो । वामपन्थी नेताहरू केही माओवादी आन्दोलनसँग पनि केन्द्रित रहेको र केही त्योभन्दा बाहिरका समाजवादी धारसँग सम्बन्धित रहेको उल्लेख गर्नुभयो ।

संघीय लोकतान्त्रिक गणतन्त्रको संविधानलाई ठीक ढंगले कार्यान्वयन गर्न सबै वामपन्थी एकताबद्ध हुनुपर्ने उहाँले बताउनुभयो ।
केहीअघि उहाँले केही वामपन्थी दलहरूलाई लिएर समाजवादी मोर्चासमेत बनाउनुभएको थियो । तर, पछिल्लो समय समाजवादी मोर्चा निष्क्रिय जस्तै छ । यसैगरी, उहाँले चिराचिरामा विभाजित माओवादी घटकहरूलाई पनि एक ठाउँमा ल्याउन पहल गरिरहनु भएको छ । त्यसका लागि विप्लव नेतृत्वको नेकपा भने सकारात्मक रहेको छ ।

नेपालको शान्ति प्रक्रिया पूरा गर्न राष्ट्रिय सहमति आवश्यक रहेको उहाँले बताउनुभयो । विगतमा शान्ति प्रक्रिया बहुमतबाट टुंगोमा पुर्‍याउन ‘दायाँ-बायाँ कोण’बाट प्रस्ताव आए पनि आफूले सहमतिमै जोड दिएको उहाँले स्मरण गर्नुभयो । नेपालको शान्ति प्रक्रिया अन्तिम चरणमा पुगेको उहाँको भनाइ थियो ।

‘राजनीतिक कोर्स बदल्ने बेला आएको छ’
माओवादी केन्द्रका ‘प्रचण्ड’ले राजनीतिक कोर्स बदल्नुपर्ने बेला आएको बताउनुभएको छ । शनिबार माओवादी केन्द्र गोरखा-काठमाडौं सम्पर्क समन्वय समितिको दोस्रो अधिवेशन उद्घाटन गर्दै उहाँले त्यसका लागि शासकीय स्वरूप र निर्वाचन प्रणाली पनि बदल्नुपर्ने बताउनुभयो । आफ्नो पार्टीको चुनवाङ बैठकबाट गणतन्त्रको अभ्यास गर्दै जाँदा यसलाई यथास्थितिमा राख्ने र जनताको गणतन्त्र बनाउने शक्तिबीच टक्कर पर्ने अड्कल गरेको स्मरण गर्दै उहाँले अब त्यो बेला आएको बताउनुभयो । अध्यक्ष प्रचण्डले प्रत्यक्ष निर्वाचित कार्यकारी प्रमुख रहने शासकीय प्रमुख, पूर्ण समानुपातिक निर्वाचन प्रणाली र सांसद होइन विज्ञ मन्त्री बन्ने व्यवस्थामा गए मात्रै जनताको गणतन्त्र सुदृढ गर्न सकिने धारणा राख्नुभयो । यसका आन्दोलन जरुरी रहेको उहाँको भनाइ थियो । आन्दोलन गर्न माओवादी बलियो हुनुपर्नेमा उहाँको जोड थियो । शासकीय स्वरूप र निर्वाचन प्रणाली बदलेर मात्रै राजनीतिक कोर्स बदल्न सकिने उहाँले जिकिर गर्नुभयो । ‘प्रत्यक्ष निर्वाचित कार्यकारी प्रमुख रहने शासकीय प्रमुख, पूर्ण समानुपातिक निर्वाचन प्रणाली र सांसद होइन विज्ञ मन्त्री बन्ने व्यवस्थामा गएर मात्रै जनताको गणतन्त्र सुदृढ गर्न सकिन्छ । यसका लागि आन्दोलन जरुरी छ । आन्दोलन गर्न माओवादी बलियो हुनुपर्ने छ,’ उहाँले भन्नुभयो ।

प्रचण्डले अरू दलभन्दा राष्ट्र र परिवर्तनप्रति इमानदार माओवादी नै रहेछ भन्ने जनतामा बोध हुँदै गएको दाबी गर्नुभयो । यसपटक विरोधीहरूले माओवादी केन्द्रलाई जनतातर्फ फर्कने अवसर दिएको उल्लेख गर्दै अब पार्टी जनतातर्फ फर्कन सुरु गरेको उहाँले बताउनुभयो । यसले देशभर सकारात्मक प्रभाव परेको र केही जिल्लामा ६४कै अवस्था फर्कने थालेको उपनिर्वाचनको परिणामले देखाएको उहाँको भनाइ थियो । अझै मेहनत गरेर जाने हो भने देशैभर यो अवस्था आउने उहाँले दाबी गर्नुभयो ।

माओवादी र नेपाल समाजवादीनिकट शिक्षक संगठनबीच एकता घोषणा
माओवादी केन्द्रनिकट एकीकृत अखिल नेपाल शिक्षक संगठन र नेपाल समाजवादी पार्टीनिकट शिक्षक समाजबीच एकता घोषणा भएको छ । माओवादी केन्द्रका अध्यक्ष ‘प्रचण्ड’को उपस्थितिमा शनिबार काठमाडौंमा एकता घोषणा समारोह आयोजना गरी दुई संगठनबीच एकता गरिएको हो । योसँगै डा. बाबुराम भट्टराई नेतृत्वको नेसपानिकट शिक्षक समाजका सबै तहका कमिटी एकीकृत अखिल नेपाल शिक्षक संगठनमा समाहित भएको छ ।

एकीकृत अखिल नेपाल शिक्षक संगठनका अध्यक्ष शंकर अधिकारी र शिक्षक समाजका अध्यक्ष ठाकुरनाथ गौतमले एकता घोषणा गर्नुभयो । कार्यक्रममा दुवै संगठनका केन्द्रदेखि स्थानीय तहसम्मका सबै कमिटीबीच एकता भएको घोषणा गरिएको थियो ।

संगठनका अध्यक्ष शंकर अधिकारीले शिक्षकका हकहितका आवाज पूरा गर्न एकता र ध्रुवीकरण आवश्यक रहेको बताउनुभयो । शिक्षक संगठनहरूसित सरकारले गरेका सम्झौता पूरा गराउन फेरि एकताबद्ध आन्दोलन आवश्यक रहेको उहाँको भनाइ थियो । समाजका अध्यक्ष गौतमले शैक्षिक आन्दोलनलाई अघि बढाउन एकता आवश्यक रहेको बताउनुभयो । समाजवादी शिक्षा प्रणालीका लागि समाजवादी बौद्धिक शक्ति एक हुनुपर्ने उहाँको जोड थियो ।

क्रान्तिकारी कम्युनिष्ट पार्टीले ‘महासचिव मोडल’ अपनाउने
मोहन वैद्य नेतृत्वको क्रान्तिकारी कम्युनिष्ट पार्टीले महासचिवको मोडल अपनाउने भएको छ । काठमाडौंमा जारी पार्टी महाधिवेशनले ‘महासचिव मोडल’लाई पारित गरेको हो । महासचिव प्रणालीमा पार्टी गए पनि कार्यालय, पोलिटब्युरो र स्थायी समिति यथावत् रहनेछ । यसमा बहुपदीय संरचना भने खारेज हुनेछ । केन्द्रीय समिति ९९ सदस्य बनाउनेमा लगभग सहमति बनिसकेको छ । नयाँ कार्यसमिति आइतबार चयन गर्ने तयारी छ ।