सुदूरको अपराजित यात्रामा विराम, जनकपुरको विजयी यात्रा कायमै

काठमाडौं । नेपाल प्रिमियर लिग (एनपिएल) क्रिकेटमा सुदूरपश्चिम रोयल्सको अपराजित यात्रामा ब्रेक लागेको छ । आइतबार अपराहृन चितवन राइनोजसँग ३३ रनले पराजित भएसँगै सुदूरको अपराजित यात्रामा विराम लागेको हो । चितवनले दिएको १६५ रनको लक्ष्य पछ्याएको सुदूरपश्चिम १८.२ ओभरमा १३१ रनमै समेटियो । योसँगै लगातार तीन खेल जित्दै उत्कृष्ट सुरुवात गरेको सुदूरपश्चिमले एनपिएलमा पहिलो हार बेहोरेको हो । चार खेलमा सुदूरको यो पहिलो हार हो । जितपछि चितवनले चार खेलबाट ६ अंक नै जोडेको छ । सुदूरपश्चिमले यसअघि विराटनगर किंग्स, काठमाडौं गुर्खाज र लुम्बिनी लायन्सलाई पराजित गरेको थियो । चितवनले यसअघि काठमाडौं र पोखरालाई पराजित गरेको थियो भने कर्णाली याक्ससँग पराजित भएको थियो ।

सुदूरपश्चिमका लागि छैटौँ नम्बरका ब्याटर इशान पाण्डेले २८ बलमा सर्वाधिक ३५ रन बनाउनुभयो । ओपनर सैब जैब र विनोद भण्डारीले क्रमशः १८ र १० रन जोड्नुभयो । ब्रान्डन म्याकमुलमले १३ रन थप्दा दीलप्रित बज्वाले १२ रन जोड्नुभयो । स्कट कुग्गेलेनले १६ रन थप्दा नरेन साउद १० रन बनाएर आउट हुनुभयो । आरिफ शेख ५, कप्तान दीपेन्द्र सिंह ऐरी १ र नरेश बुढाएर ५ रनमा आउट हुनुभयो । बलिङमा चितवनका कप्तान कुशल मल्लले चार ओभरमा १८ रन खर्चेर दुई विकेट लिनुभयो । अमरसिंह राउटेलाले एक ओभरमा नौ रन खर्चेर तथा जान निकोल अफ्टीले तीन ओभरमा १८ रन खर्चेर समान दुई विकेट लिनुभयो । रिजन ढकालले तीन ओभरमा ३३ रन खर्चेर दुई विकेट नै लिनुभयो । सोहेल तनविर र रन्जित कुमारले समान एक/एक विकेट लिनुभयो ।

त्यसअघि टस जितेर पहिले ब्याटिङ गरेको चितवनले निर्धारित २० ओभरमा पाँच विकेट गुमाएर १६४ रन बनाएको थियो । चितवनका लागि ओपनर हसन इसाखिलले ५२ बलमा ६५ रन बनाउनुभयो । यस्तै रवि बोपाराले १८ बलमा ३६ रनको योगदान गर्नुभयो । विपिन रावलले १७ र कप्तान कुशल मल्लले १३ रन जोड्दा सन्तोष कार्की ९ रनमा आउट हुनुभयो । अमर सिंह राउटेलाले ६ रन र जान निकोल २ रनमा अविजित रहनुभयो ।

बलिङमा सुदूरपश्चिमका स्कट कुगेलेइनले चार ओभरमा २९ रन खर्चेर दुई विकेट लिनुभयो । ब्रान्डन म्याकमुलेन, कप्तान दीपेन्द्र सिंह ऐरी र सैफ अली जैबले एक-एक विकेट लिनुभयो ।

यसअघि आइतबार बिहान भएको खेलमा जनकपुर बोल्ट्सले रोमाञ्चक जित हात पारेको थियो । लुम्बिनी लायन्सलाई एक रनले पराजित गर्दै जनकपुरले आफ्नो अपराजित यात्रा कायमै राखेको हो । लगातार चौथो हार बेहोरेसँगै लुम्बिनीको प्ले अफ सम्भावना कमजोर बनेको छ । एनपिएलको चार खेलमा पराजित लुम्बिनी अंकविहीन हुँदै तालिकाको पुछारमा छ । एनपिएलको चार खेल खेल्दा जितविहीन हुने लुम्बिनी एक्लो टोली हो । लुम्बिनीले अब एनपिएलमा तीन खेल खेल्न बाँकी छ । बाँकीका तीन खेलमा जित निकाले पनि लुम्बिनीको प्ले अफ पुग्ने सम्भावना कमजोर छ ।

यता, लगातार चौथो जित दर्ता गरेको जनकपुरको भने प्ले अफ सम्भावना बलियो बनेको छ । चार खेलबाट आठ अंक जोडेको जनकपुर अंक तालिकाको शीर्ष स्थानमा उक्लेको छ ।

जनकपुरले दिएको १३७ रनको लक्ष्य पछ्याएको लुम्बिनीले निर्धारित २० ओभरमा ७ विकेटको क्षतिमा १३५ रन मात्र बनाउन सक्यो । अन्तिम १ बलमा २ रन चाहिएको अवस्थामा सन्दीप जोरा क्याच आउट भएपछि लुम्बिनीले लगातार चौथो हार बेहोरेको हो । लुम्बिनीका लागि कप्तान रोहित पौडेलले बनाएको ३५ रन नै सर्वाधिक रहृयो । ३८ बलमा ३ चौकाको सहयोगमा ३५ रन बनाउनुभएका रोहित हर्ष ठाकेरको बलमा जेम्स निसमको हातबाट क्याच आउट हुनुभयो । टोम मोरिसले ३१ रन थप्नुभयो । अर्जुन साउद २० रन बनाउँदा शेर मल्लको बलमा बोल्ड आउट हुनुभयो । लुम्बिनीलाई रोक्न जनकपुरका हर्ष ठाकेरले ५ विकेट लिनुभयो । उहाँले आफ्नो स्पेलमा मात्र २३ रन दिनुभयो । किशोर महतो, ललित राजवंशी र शेर मल्लले समान एक विकेट लिनुभयो ।

त्यसअघि कीर्तिपुरस्थित त्रिवि क्रिकेट मैदानमा लुम्बिनीले टस जितेर फिल्डिङ रोजेपछि ब्याटिङ गरेको जनकपुरले निर्धारित २० ओभरमा ९ विकेटको क्षतिमा १३६ रनको योगफल तयार पारेको थियो । अघिल्ला तीन खेलमा कमजोर बलिङ र फिल्डिङका कारण हार भोगेको लुम्बिनीले तेस्रो खेलमा खराब ब्याटिङका कारण लय गुमाएको थियो । तर, एनपिएलको चौथो खेलमा आएर केही हदसम्म लुम्बिनीको बलिङ देख्न पाइएको छ । एनपिएलमा लुम्बिनीले पहिलोपटक विपक्षीको ९ विकेट लिएको हो । तर, फिल्डिङमा देखिएको समस्यामा भने खासै सुधार हुन सकेको छैन ।

एनपिएलमा डेब्यु खेल खेलिरहनुभएका अविशेष गौतमले १३औँ ओभरमा लगातार तीन विकेट लिँदै लुम्बिनीलाई ठूलो राहत दिनुभयो । अविशेषले १३औँ ओभरको दोस्रो बलमा २४ रन बनाउनुभएका लाहिरू मिलान्थालाई विकेट किपर अर्जुन साउदको हातबाट आउट गराउनुभयो । सोही ओभरको चौथो बलमा हर्ष ठाकेरलाई १ रन बनाउँदा दुर्गेश गुप्ताको हातबाट क्याच आउट गराउनुभयो ।

ओभरको अन्तिम बलमा जेम्स निसमलाई पनि विकेट किपरको हातबाट आउट गराउँदै लुम्बिनीलाई राहत दिनुभएको थियो । पाचौँ ओभरमा बलिङमा आउनुभएका अविशेषले आफ्नो पहिलो ओभरमा नै १३ रन खान पुग्नुभयो । पूरै चार ओभर बलिङ गर्नुभएका अविशेषले २० रन दिनुभयो । कप्तान रोहित पौडेल र सादविन जफरले समान दुई विकेट लिनुभयो । सन्दीप जोराले एक विकेट आफ्नो नाममा गर्नुभयो ।

जनकपुरले पहिलो विकेटका रूपमा छैटौँ ओभरको तेस्रो बलमा ओपनर आशिफ शेखलाई गुमाएको थियो । १० बलमा २ चौका र १ छक्का हान्नुभएका आशिफ १६ रन बनाउँदा साद विन जफरको बलमा विवेक यादवको हातबाट क्याच आउट हुन पुग्नुभयो । कप्तान अनिल शाह ४५ रन बनाउँदा सन्दीप जोराको बलमा विवेक यादवको हातबाट क्याच आउट हुनुभयो । उहाँले ३९ बलमा १ चौका र ४ छक्का प्रहार गर्नुभएको थियो ।

कप्तान रोहितले १६औँ ओभरको दोस्रो बलमा मोहम्मद मोहसिनले ३ र चौथो बलमा शेर मल्ललाई शून्य रनमा नै एलबिडब्लु धरापमा पार्नुभएको थियो । शुभ कंसाकार २२ रनमा नट आउट रहनुभयो ।