कर्णालीले पोखरालाई हराउँदा लुम्बिनीले खोल्यो खाता

काठमाडौं । नेपाल प्रिमियर लिग (एनपिएल) क्रिकेटमा लुम्बिनी लायन्सले पहिलो जित हासिल गरेको छ । मंगलबार भएको पहिलो खेलमा चितवन राइनोजलाई ३३ रनले हराउँदै लुम्बिनीले पहिलो जित हात पारेको हो । लुम्बिनीले दिएको १६८ रनको लक्ष्य पछ्याएको चितवनले निर्धारित २० ओभरमा आठ विकेट गुमाएर १३४ रनमात्रै बनाउन सक्यो । पहिलो जितपछि लुम्बिनीले पाँचौँ खेलमा अंक खाता खोलेको छ ।

लगातार चार खेल हारेको लुम्बिनीलाई प्लेअफ सम्भावना जीवित्तै राख्न चितवनविरुद्धको खेल जित्नैपर्ने दबाब थियो । यो खेल हारेको भए लुम्बिनीको प्लेअफ खेल्ने सम्भावना समाप्त हुने समीकरण थियो । चितवन राइनोजले भने दोस्रो हार बेहोरेको हो ।

लुम्बिनीलाई जिताउन कप्तान रोहित पौडेलले अलराउण्डर प्रदर्शन गर्नुभयो । रोहितले ब्याटिङमा ८० रन बनाउनुभयो भने बलिङमा चार विकेट लिनुभयो । चितवनका लक बेनकेन्सटैनले सर्वाधिक ३१ रन बनाउनुभयो । २९ बल खेल्नुभएका उहाँले तीन चौका र एक छक्का प्रहार गर्नुभयो । यसैगरी कप्तान कुशल मल्लले २०, रवि बोपारा १२ र सद्दतोष कार्कीले १० रन बनाउनुभयो । नर कार्कीले २२ र रिजन ढकाल १५ रनमा नटआउट रहनुभयो ।

पौडेलले चितवनका विपिन रावललाई ५ रन, सोहिल तन्विरलाई १ रन, रवि बोपारालाई १२ रन र जान लोफ्टी इटनलाई ६ रनमा आउट गराउनुभयो । यस्तै, रामोन सिमोण्डसले दुई, साद बिन जाफर र अभिशेष गौतमले एक/एक विकेट लिनुभयो ।

यसअघि टस हारेर पहिले ब्याटिङको निम्तो पाएको लुम्बिनीले निर्धारित २० ओभरमा ६ विकेट गुमाएर १६७ रन बनाएको थियो । पावर प्लेमा खराब सुरुवात गरेको लुम्बिनीलाई बलियो स्थितिमा पुर्‍याउन कप्तान रोहित पौडेल र साद बिन जाफरले सानदार ब्याटिङ गर्नुभयो ।

पौडेल र जाफरबीच शतकीय साझेदारी भएको थियो । ४९ रनमा चार विकेट गुमाएको अवस्थाबाट उनीहरूले टिमलाई बलियो स्कोरमा पु¥याएका थिए । पौडेलले अन्तिम ओभरमा आउट हुनुअघि ८० रन बनाउनुभयो । ५७ बल खेल्नुभएका उहाँले ६ चौका र पाँच छक्का प्रहार गर्नुभयो । जफरले ५२ बनाउनुभयो । ३५ बल खेलनुभएका उहाँले चार चौका र एक छक्का प्रहार गर्नुभयो । अर्जुन साउद १५, टम मुर्स १०, आशुतोष घिरैया एक र उन्मुक्त चन्द शून्यमा आउट हुनुभयो । सन्दीप जोरा ४ रनमा अविजित रहनुभयो । चितवनका लागि रिजन ढकाल तीन, रञ्जित कुमार र कप्तान कुशल मल्लले समान एक/एक विकेट लिनुभयो ।

यसअघि चार खेलमा चितवनले तीनमा जित निकालेको थियो । चितवनले पहिलो खेलमा काठमाडौं गुर्खाजलाई पाँच विकेटले पराजित गरेको थियो भने दोस्रो खेलमा पोखरा एभेन्जर्सलाई ८७ रनले पाखा लगाएको थियो । तेस्रो खेलमा कर्णाली याक्ससँग ६ विकेटले पराजित भएको चितवनले चौथो खेलमा भने उत्कृष्ट लयमा रहेको सुदूरपश्चिम रोयल्सलाई ३३ रनले पाखा लगाएको थियो ।

लुम्बिनीले भने यसअघिका चार खेलमा पराजय बेहोरेको थियो । पहिलो खेलमा लुम्बिनी विराटनगर किङ्ससँग २ विकेटले पराजित भएको थियो भने पोखरा एभेन्जर्ससँग १० विकेटले स्तब्ध बनेको थियो । त्यस्तै सुदूरपश्चिमसँग ४५ रनले पराजित भएको लुम्बिनी जनकपुर बोल्ट्ससँग एक रनले स्तब्ध बनेको थियो ।

पोखरा सात विकेटले पराजित
बलिङमा विलियम बोसिस्टो र ब्याटिङमा गुल्सन झा चम्किएपछि कर्णाली याक्सले नेपाल प्रिमियर लिग (एनपिएल)मा पोखरा एभेन्जर्सविरुद्ध सात विकेटको सहज जित निकालेको छ । मंगलबार कीर्तिपुरस्थित त्रिवि क्रिकेट मैदानमा सम्पन्न खेलमा पोखराले दिएको १०४ रनको सामान्य लक्ष्य कर्णालीले १५ ओभरमा तीन विकेट गुमाएर पूरा गरेको थियो ।

प्रतियोगितामा पाँचौँ खेल खेलेको कर्णालीको यो तेस्रो जित हो । कर्णाली प्रतियोगिताको पहिलो खेलमा जनकपुर बोल्ट्ससँग आठ विकेटले र दोस्रो खेलमा काठमाडौं गुर्खाजसँग तीन विकेटले पराजित भएको थियो । कर्णालीले तेस्रो खेलमा भने चितवन राइनोजविरुद्ध ६ विकेटको र चौथो खेलमा विराटनगर किंग्सविरुद्ध सात रनको जित निकालेको थियो ।

कर्णालीको जितमा गुल्सन झा ४९ रनमा अविजित रहनुभयो । अर्धशतक बनाउन एक रनले चुक्नुभएका गुल्सनले ३७ बलमा तीन चौका र चार छक्का प्रहार गर्नुभयो । गुल्सनसँगै अविजित रहनुभएका विलियम बोसिस्टोले दुई रन जोड्नुभयो ।

१४-२ को कठिन स्थितिबाट गुल्सनले चान्डविक वाल्टनसँग ६० रनको साझेदारी गर्दै कर्णालीलाई जित नजिक पुर्‍याउनुभएको थियो । चान्डविक वाल्टनले ४२ रन बनाउनुभयो । ३४ बलको सामना गर्नुभएका वाल्टनले ६ चौका र एक छक्का प्रहार गर्नुभएको थियो । वाल्टनलाई १२औँ ओभरको अन्तिम बलमा कप्तान कुशल भुर्तेलले बोल्ड गर्नुभएको थियो ।

कर्णालीका ओपनरद्वय देव खनाल र बाबर हायात भने सस्तैमा पभेलियन फर्किनुभयो । हायातले टोलीको खातामा सात रन थप्दा देव ‘डक’ हुनुभएको थियो । कुशल भुर्तेल, विपिन खत्री र सागर ढकालले समान एक-एक विकेट लिनुभयो ।

त्यसअघि कर्णालीका विलियम बोसिस्टोले घातक बलिङ गरेपछि पोखरा १६.३ ओभरमा १०३ रनमै समेटिएको थियो । कर्णालीका बोसिस्टोले पोखराका ६ ब्याटरलाई पभेलियनको दिशा देखाउनुभयो । बोसिस्टोले पोखराका कप्तान कुशल भुर्तेल, म्याट क्रिट्च्ली, दिलीप नाथ, माइकल लियस्क, नारायण जोशी र रेमन रेफरको विकेट लिनुभयो । चार ओभर बलिङ गर्नुभएका बोसिस्टोले २८ रन खर्चिनुभएको थियो । यसबाहेक कर्णालीका कप्तान सोमपाल कामी, विपिन शर्मा र युनिश ठकुरीले समान एक-एक विकेट लिनुभएको थियो ।

कर्णालीविरुद्ध पोखराका आन्द्रियस गौसले २५ रन बनाउनुभयो । यसअघि लुम्बिनी लायन्सविरुद्ध १०४ रनको शतकीय इनिङ खेल्नुभएका गौसले १२ बलमा चार चौका र एक छक्का प्रहार गर्नुभयो । रेमन रेफरले २६ बलमा २० रन जोड्नुभयो ।

कप्तान कुशल भुर्तेल र विपिन खत्रीले समान १० रन बनाउनुभयो । यसबाहेक पोखराका अन्य ब्याटरले दोहोरो अंक जोड्न सकेनन् ।
जितसँगै पाँच खेलबाट ६ अंक जोडेको कर्णाली तालिकाको चौथो स्थानमा छ । चार खेलबाट दुई अंक जोडेको पोखरा भने तालिकाको छैटौँ स्थानमा खस्किएको छ ।

प्रतियोगितामा पोखराको भने यो तेस्रो हार हो । पोखरा पहिलो खेलमा चितवन राइनोजसँग ८७ रनले र दोस्रो खेलमा जनकपुर बोल्ट्ससँग सात विकेटले पराजित भएको थियो । तेस्रो खेलमा भने पोखराले लुम्बिनी लायन्सविरुद्ध १० विकेटको कीर्तिमानी जित निकालेको थियो । प्रतियोगितामा पोखराको यो जित विकेटका आधारमा कुनै पनि टिमले निकालेको सबैभन्दा ठूलो जितसमेत हो ।

आज (बुधबार) दशौँ दिनको पहिलो खेल सुदूरपश्चिम रोयल्स र जनकपुर बोल्ट्सबीच हुनेछ । दोस्रो खेल काठमाडौं गुर्खाज र लुम्बिनी लायन्सबीच हुनेछ ।