काठमाडौं । सिटिजन्स बैंक इन्टरनेसनलको अगुवाइमा एभरेष्ट बैंक, नेपाल एसबिआई बैंक र सानिमा बैंकसहित चार बैंकहरूले छ अर्ब १५ करोड रुपैयाँ ऋण लगानी गर्ने गरी ४१.०६ मेगावाट संखुवाखोला जलविद्युत् परियोजना निर्माण हुने भएको छ । एक कार्यक्रमबीच सोमबार प्र्रवद्र्धक कम्पनी गुराँस हाइड्रो लिमिटेड एवं लगानीकर्ता बैंकहरूबीच वित्तीय व्यवस्थापनका लागि सहवित्तीयकरण कर्जा सम्झौतामा हस्ताक्षर भएको छ ।
परियोजना कोशी प्रदेशको संखुवासभास्थित सिलिचोङ गाउँपालिका र भोजपुरको साल्पा सिलिचाछो गाउँपालिकामा निर्माण हुने छ । सिटिजन्स बैंकका अनुसार परियोजनाको अनुमानित लागत करिब आठ अर्ब २० करोडमध्ये बैंकहरूले ७५ः२५ को ऋणःस्वपुँजी अनुपातमा छ अर्ब १५ करोड बराबरको ऋण लगानी गर्ने छन् । जसमध्ये सिटिजन्स बैंकबाट दुई अर्ब ९० करोड, एभरेष्ट बैंकबाट एक अर्ब २५ करोड, नेपाल एसबिआई बैंकबाट एक अर्ब २५ करोड र सानिमा बैंकबाट ७५ करोड लगानी हुने छ भने २५ प्रतिशत स्वपुँजी प्रवद्र्धकहरूबाट जुटाइने छ ।
परियोजना आगामी चार वर्षभित्र सम्पन्न गर्ने लक्ष्य रहेको र निर्माणपछि उत्पादित विद्युत् नेपाल विद्युत् प्राधिकरणको संखुवासभास्थित सित्तलपाटी सबस्टेसनमा जोडिने छ । कम्पनीका अनुसार आयोजनाबाट हिउँदमा ७५.०४१ गिगावाट घण्टा र वर्षायाममा १६५.८८८ गिगावाट गरी वार्षिक २४०.९२९ गिगावाट घण्टा विद्युत् उत्पादन हुने छ ।
सहवित्तीयकरण कर्जा सम्झौता हस्ताक्षर कार्यक्रममा सिटिजन्स बैंकका प्रमुख कार्यकारी अधिकृत गणेशराज पोखरेलले सिटिजन्स बैंकले स्थापनाकालदेखि नै एकल लगानीका साथै आफ्नो अगुवाइ, सहअगुवाइ तथा अन्य बैंकहरूसँगको सहवित्तीयकरण कर्जामार्फत् जलविद्युत्लगायत हरित ऊर्जा क्षेत्रमा उल्लेख्यरूपमा लगानी गर्दै आएको र बैंकिङ क्षेत्र एवं स्वतन्त्र ऊर्जा उत्पादकहरूको संयुक्त लगानीबाट धेरै आयोजना निर्माण भई सञ्चालनमा आएका कारण देशको समग्र ऊर्जा क्षेत्रको विकासमा निजी क्षेत्रको ठूलो योगदान रहेको बताउनुभयो ।
हालसम्म निर्माण सम्पन्न १२४.५४१ मेगावाटका १३ आयोजना र निर्माणाधीन ५१६.५७४ मेगावाटका १६ आयोजनासहित जम्मा ६४१.११५ मेगावाटका २९ आयोजनामा सिटिजन्स बैंकको लगानी रहेको उहाँले जानकारी गराउनुभयो । सिटिजन्स बैंकले हालसम्म १५ वटा हाइड्रोपावर आयोजनामा अगुवा बैंक, दुईवटा हाइड्रोपावर आयोजनामा सहअगुवा बैंक, नौवटा हाइड्रोपावर आयोजनामा सहभागी बैंकका रूपमा र तीनवटा हाइड्रोपावर आयोजनामा एकल लगानी रहेको छ ।
प्रवद्र्धक कम्पनी गुराँस हाइड्रोका अध्यक्ष शिवप्रसाद घिमिरेले आगामी चार वर्षभित्र परियोजना निर्माण सम्पन्न गरी विद्युत् उत्पादन गर्ने लक्ष्य रहेको जानकारी दिनुभयो । हालसम्म प्राधिकरण, विद्युत् विकास विभाग, वन तथा वातावरण मन्त्रालयलगायत सरोकारवाला निकायमा गर्नुपर्ने सबै कानुनी प्रक्रिया पूरा गरी सकिएकाले आयोजना तत्काल निर्माण सुरु गरी समयमै सम्पन्न हुनेमा पनि उहाँले विश्वास व्यक्त गर्नुभयो ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच