इतर पक्षमा विवाद, देउवालाई हाइसञ्चो

काठमाडौं । नेपाली कांग्रेसमा महाधिवेशन कहिले हुने भन्ने टुंगो छैन तर नेताहरूबीचको अस्वस्थ प्रतिस्पर्धा जारी छ । सभापति शेरबहादुर देउवाविरुद्ध संगठित हुँदै आउनुभएका नेता डा.शेखर कोइराला र महामन्त्री गगन थापा आपसमै जुध्न थालेपछि देउवालाई राहत मिलेको छ । चतुर राजनीतिक खेलाडी मानिने सभापति देउवा पछिल्लो समय संस्थापन इतर समूहमा विभाजनको रेखा कोर्न सफल हुनुभएको छ । पार्टीको १४औँ महाधिवेशनमा सभापति देउवासँग प्रतिस्पर्धा गरेको शेखर गगन समूह अहिले विभाजित छ । महामन्त्री थापा शेखर नेतृत्वको समूह छाडेर सभापति देउवासँग सहकार्य गर्न थालेपछि कांग्रेसभित्र आसन्न महाधिवेशनको समीकरणबारे चर्चा पनि चुलिएको छ ।

कांग्रेसको विधानमा सभापतिको कार्यकाल चार वर्षको हुने उल्लेख छ । जसअनुसार कांग्रेस महाधिवेशन २०८२ मंसिरमा हुनुपर्छ । आउने मंसिरमा चुनाव गर्न कांग्रेसले अहिले नै महाधिवेशन प्रक्रिया थाल्नुपर्ने हो । सभापति देउवा र महामन्त्री थापा दुवै महाधिवेशन केही पर सार्न सहमत देखिनुभएको छ । देउवा आफू प्रधानमन्त्री भएपछि महाधिवेशन गराउन चाहनुहुन्छ भने महामन्त्री देउवा सभापतिमा आफ्नो दाबी अनुकूल भएपछि महाधिवेशन गराउने पक्षमा हुनुहुन्छ । पार्टीभित्र आफ्नो समूहलाई व्यवस्थित गरिराख्न सफल देउवा इतर समूहमा विवाद बढेपछि तनावमुक्त देखिनुहुन्छ । आफ्नो अनुकूलताका लागि नेताहरूलाई आलैपालो प्रयोग गर्ने देउवाको खुबी यसपटक पनि स्थापित भएको उहाँनिकट नेताहरू बताउँछन् । ‘सभापतिसँग कसैको प्रतिस्पर्धा छैन । उहाँविरुद्ध उभिने होइन कि उहाँको उत्तराधिकारी बन्ने प्रतिस्पर्धा पार्टीमा चलिराछ’, देउवानिकट एक नेताको भनाइ छ ।

कोशी भेलाले तरंग
कांग्रेसमा महाधिवेशन लक्षित तरंग सिर्जना हुनुका पछाडि कोशी प्रदेशको सम्मेलनमा शेखर कोइरालाको अनुपस्थिति मुख्य कारण हो । शेखरको गृहजिल्ला मोरङका पालिका समितिहरूले प्रदेशस्तरीय पालिका सभापतिहरूको भेला आयोजना गरेपछि शेखर गगन विवाद पनि सतहमा आएको छ । सो भेला रोक्न महामन्त्री थापाले नै मुख्यसचिव कृष्ण पौडेलमार्फत परिपत्र जारी गराएपछि शेखरपक्ष आक्रोशित छ । पार्टी निर्देशन अवज्ञा गर्दै आयोजित पालिका सभापति भेलामा कोशीका बहुमत पालिका सभापतिहरू सहभागी थिए । सोही भेलामा नेता कोइरालाले कांग्रेस कार्यकर्ताका संरक्षणको दायित्व आफ्नो भएको उद्घोष गर्दै कसैसँग नडराउन आग्रह गर्नुभएको थियो ।

लगत्तै कोशी प्रदेश समितिले आयोजना गरेको प्रदेश सम्मेलनमा शेखर अनुपस्थित रहनुभयो । सम्मेलनमा पुग्नुभएका महामन्त्री थापाले पार्टी हितविपरीत कसैले भेला गर्न नहुने बताउनुभयो । त्यसयता शेखर र गगनका कार्यकर्ताबीच सामाजिक सञ्जालमा शीतयुद्ध नै सुरु भएको छ । दुई नेताको फाटोले सभापति देउवा र संस्थापन समूहको उत्साह बढाएको छ ।

नयाँ गुट बनाउँदै गगन
हरेक महाधिवेशनमा गुट फेर्ने परिचय बनाएका महामन्त्री थापाले अब पनि नयाँ गुट बनाउने कसरत थाल्नुभएको छ । निकटस्थहरूसँग १५औँ महाधिवेशनमा आफू सभापतिको उम्मेदवार रहने बताइसक्नु भएका उहाँले वडादेखि नै आफूसँग प्रतिबद्ध समूह निर्माण गरिरहनु भएको छ । ‘अब गगनजी आफैँ सभापतिको उम्मेदवार हो । त्यसैले वडादेखि नै उहाँको टिम बनाउन आन्तरिक तयारी गरेकै छौँ’ थापानिकट नेताको भनाइ छ । कांग्रेस केन्द्रीय सदस्यहरू मधु आचार्य, अजय शिवाकोटी, प्रतिमा गौतमलगायत थापाको समूहमा रहने निश्चित छ ।

शेखरको आफ्नै सुर
अबको महाधिवेशनमा आफू सभापतिको उम्मेदवार रहने घोषणा गरिसक्नु भएका शेखर आफूसँग महामन्त्री थापा नरहनेमा ढुक्क हुनुहुन्छ । त्यसैले संस्थापन समूहका असन्तुष्ट नेताहरूलाई समूहमा तान्ने शेखरको सुर छ । अर्का महामन्त्री विश्वप्रकाश शर्मासँग पनि निरन्तर संवादमा रहनुभएका शेखरलाई उपसभापति धनराज गुरुङसहित डेढ दर्जन केन्द्रीय सदस्यहरूको साथ छ । ‘महाधिवेशन जित्न अघिल्लो पटकको भन्दा मत थप्नैपर्छ । त्यसैले महामन्त्रीलाई फकाउने हैन नयाँ नेताहरूलाई टिममा जोड्ने गरी अघि बढेका छौँ’, शेखरनिकट केन्द्रीय सदस्यको भनाइ छ ।