काठमाडौं । सिमेन्ट उद्योगीले सिमेन्टको मूल्य घटाउने भएका छन् । चौतर्फी दबाबपछि उनीहरूले सिमेन्टको मूल्य घटाउने प्रतिबद्धता जनाएका हुन् । बुधबार नेपाल निर्माण व्यवसायी महासंघ र सिमेन्ट उत्पादक संघबीच उद्योग मन्त्रालयमा भएको छलफलपछि सिमेन्टको मूल्य घटाउने सहमति भएको निर्माण व्यवसायी महासंघका अध्यक्ष रवि सिंहले बताउनुभएको छ । अध्यक्ष सिंहका अनुसार सञ्चारकर्मीहरूसँग कुरा गर्दै काठमाडौं उपत्यकामा ओपिसी सिमेन्ट सात सय रुपैयाँ र पिपिसी सिमेन्ट छ सय रुपैयाँमा उपलब्ध हुनेछ ।
सिमेन्ट उत्पादकहरूले अत्यधिक मूल्यवृद्धि गरेका विषयमा बैठकमा दुवै पक्षबीच छलफल भएको र काठमाडौंमा सात सयमा ओपिसी सिमेन्ट उपलब्ध गराउने प्रतिबद्धता जनाएको सिंहले बताउनुभयो । आफूहरूले सिमेन्ट उद्योगहरू धरासायी हुने गरेर बजार भाउ नघटाउन र निर्माण व्यवसायीलाई मार पर्ने गरी नबढाउन सुझाव दिएको सिंहको भनाइ थियो ।
सिमेन्ट उद्योगीले बिनाकारण मिलेमतोमा सिमेन्टको मूल्य बढाउन थालेपछि निर्माण व्यवसायीले आपत्ति जनाएका छन् । नेपाल निर्माण व्यवसायी महासंघले निर्माण सामग्रीको मूल्यवृद्धि खारेज नभए देशभरका निर्माण व्यवसायी काम ठप्प पारी कन्स्ट्रक्सन होलिडेमा जाने चेतावनी दिएको थियो । सिमेन्ट, डन्डीलगायतका निर्माण सामग्रीको मूल्यवृद्धि खारेज गर्न पुनः सरकारलाई ध्यानाकर्षण गराउँदै महासंघले सोमबार वाणिज्य आपूर्ति तथा उपभोक्ता संरक्षण विभागका महानिर्देशक राजन पौडेललाई ज्ञापनपत्र बुझाएको थियो । महासंघका अध्यक्ष सिंह नेतृत्वको प्रतिनिधिमण्डलले निर्माण सिजनमा निर्माण सामग्रीको कार्टेलिङ गरी अत्यधिक मूल्यवृद्धि गरिएको भन्दै मूल्यवृद्धि खारेज नभए देशभरका निर्माण व्यवसायी काम ठप्प पारी कन्स्ट्रक्सन होलिडेमा जाने चेतावनी दिएको हो । विभागले भने सिमेन्टको मूल्य बढ्नुका कारणसहित सिमेन्ट उद्योगहरूसँग मूल्यसूची माग गरेको थियो ।
निर्माण व्यवसायीले विभागलगायत सरकारलाई समेत केही सिमेन्ट कम्पनीले सिमेन्टको मूल्यमा दुई सय रुपैयाँ बढाएको भन्दै उजुरी दिएकाले व्यवसायीसँग सरकारले छलफल सुरु गरेको थियो । अन्तर्राष्ट्रियस्तरमा कुनै कुराको मूल्यवृद्धि नभएको तर बजारमा सिमेन्टको मूल्य वृद्धिका कारण भौतिक पूर्वाधार र विकास निर्माणको क्षेत्रमा समस्या भएको निर्माण व्यवसायीले गुनासो गर्दै आएका थिए । पछिल्लो समय प्रतिबोरा ३० देखि ५० रुपैयाँसम्मले सिमेन्टको मूल्य बढेको नेपाल निर्माण सामग्री व्यापार संघ काठमाडौंले जनाएको छ । संघका अनुसार सिमेन्ट उत्पादक कम्पनीहरूले निरन्तर सिमेन्टको मूल्य बढाउँदै आएका छन् । एक महिनाको अवधिमा सिमेन्टमा डेढ सय रुपैयाँभन्दा बढी मूल्यवृद्धि भइसकेको छ ।
दशैँअघि बजारमा उपभोक्ताका लागि पिपिसी सिमेन्टको मूल्य काठमाडौंमा प्रतिबोरा पाँच सय रुपैयाँदेखि पाँच सय २५ रुपैयाँसम्म र ओपिसी सिमेन्ट छ सयदेखि छ सय २५ रुपैयाँसम्म थियो तर गत साता शुक्रबारदेखि लागू हुने गरी पुनः मूल्य बढेपछि पिपिसी सिमेन्टको मूल्य काठमाडौंका ग्राहकका लागि प्रतिबोरा छ सय ५० रुपैयाँदेखि सात सय रुपैयाँसम्म पुगेको छ भने ओपिसी सिमेन्ट सात सय ३० देखि सात सय ८० रुपैयाँसम्म पुगेको सम्बद्ध व्यवसायीले बताएका छन् ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच