‘आर्थिक समृद्धिमा बैंकिङ क्षेत्रको भूमिका महत्वपूर्ण’

काठमाडौं । ‘उत्पादन, रोजगारी र आयात प्रतिस्थापन लगानीका आधार, दिगो बैंकिङ-उन्नत अर्थतन्त्र, समृद्ध नेपालको पूर्वाधार’ भन्ने मूल नाराका साथ बैंक तथा वित्तीय संस्था परिसंघ नेपाल (सिबिफिन) को पाँचौँ वार्षिक साधारणसभा सम्पन्न भएको छ । साधारणसभा उद्घाटन गर्दै उद्योग, वाणिज्य तथा आपूर्तिमन्त्री दामोदरप्रसाद भण्डारीले देशको वर्तमान स्थिति र आवश्यकताबमोजिम कृषि, पर्यटन, जलविद्युत्, वन पैदावार, प्रविधि, नवप्रवर्तनको विकास र ग्रामीण तथा दुर्गम क्षेत्रका साना, घरेलु तथा मझौला उद्यम तथा उद्यमीको विकास एवं स्तरोन्नतिमा बैंक तथा वित्तीय संस्थाले विशेष भूमिका निर्वाह गर्नुपर्नेमा जोड दिनुभयो ।

प्रचुर सम्भावना बोकेका कृषि, पर्यटन, जलविद्युत्, वन पैदावार, प्रविधिलगायतका क्षेत्रमा लगानी विस्तारका लागि सरकारले उचित वातावरण र नीति तय गर्नुपर्नेमा सिबिफिनले जोड दिएको छ ।

आर्थिक एवं बैंकिङ गतिविधि विस्तारका लागि बाधक बनेका विद्यमान कानुन सुधारका लागि सरकार लागिपरेको भन्दै उहाँले अब तथ्यांकमा भन्दा पनि व्यावहारिकता र परिणामलाई मध्यनजर गरेर सरकार र समग्र निजी क्षेत्र हातेमालो गर्दै अघि जानुको विकल्प नभएको बताउनुभयो ।

उच्चस्तरीय आर्थिक क्षेत्र सुधार सुझाव आयोगका संयोजक रामेश्वर खनाल, राष्ट्रिय योजना आयोगका उपाध्यक्ष प्रा.डा. शिवराज अधिकारी, नेपाल राष्ट्र बैंकका कार्यकारी निर्देशक गुरूप्रसाद पौडेल, नेपाल उद्योग वाणिज्य महासंघका वरिष्ठ उपाध्यक्ष अञ्जन श्रेष्ठ, नेपाल उद्योग परिसंघका कार्यवाहक अध्यक्ष वीरेन्द्रप्रसाद पाण्डे, नेपाल चेम्बर अफ कमर्सका अध्यक्ष कमलेश अग्रवालले उपयुक्त नीति र वातावरण सिर्जना, कर्जा÷लगानी विस्तारमा सहजीकरण, बैंकिङ पहुँच र सर्वसुलभ बैंकिङ सेवाको विस्तार तथा सुस्ताएका समग्र आर्थिक एवं बैंकिङ गतिविधि चलायमान बनाउँदै दिगो आर्थिक एवं बैंकिङ विकासका लागि साधारणसभाले स्पष्ट कार्यदिशासहितको भूमिका सिबिफिनले निर्वाह गर्ने विश्वास व्यक्त गरेका थिए ।

सिबिफिनका पुनः निर्वाचित अध्यक्ष उपेन्द्र पौडेलले मुलुकको अर्थतन्त्र आजको अवस्थासम्म आइपुग्नुमा बैंकिङ क्षेत्रको उल्लेखनीय भूमिका र योगदान रहेको बताउनुभयो । सिमेन्ट, उर्जा, डण्डी र उपभोगका विविध क्षेत्रमा आत्मनिर्भर बन्दै जानुमा बंैकिङ क्षेत्रको भूमिकालाई बिर्सनु नहुने उहाँको भनाइ थियो । बैंकिङ क्षेत्रको अग्रणी संस्था सिबिफिन र आबद्ध बैंक तथा वित्तीय संस्थाहरूले मुलुकको वर्तमान अवस्था, आवश्यकता र आमअपेक्षालाई हृदयंगम गर्दै जिम्मेवार एवं रूपान्तरणकारी बैंकिङ भूमिका निर्वाह गर्दै आएको पनि पौडेलले बताउनुभयो ।

प्रचुर सम्भावना बोकेका कृषि, पर्यटन, जलविद्युत्, वन पैदावार, प्रविधिलगायतका क्षेत्रमा लगानी विस्तारका लागि सरकारले उचित वातावरण र नीति तय गर्नुपर्नेमा जोड दिँदै उहाँले मुलुकलाई विशाल अर्थतन्त्र र बजार भएका दुर्ई ठूला छिमेकी राष्ट्रबीचको साँघु बनाई भूराजनीतिक लाभ हासिल गर्न सकिने प्रचुर सम्भावनालाई सार्थकतामा परिणत गर्नुपर्ने बताउनुभयो । दिगो बैंकिङको विकासमार्फत् वस्तु तथा सेवाको उत्पादन, उपयोग तथा निर्यात, रोजगारी सिर्जना, प्रविधि तथा नवप्रवर्तनको विकास, लघु, घरेलु साना तथा मझौला उद्यमको विकास एवं विस्तारसहित खाद्य एवं ऊर्जा सुरक्षा तथा खाद्य सम्प्रभुता हासिल गर्दै वास्तविक अर्थतन्त्र अझ सुदृढ एवं दर्बिलो बनाउनु सबैको कर्तव्य र जिम्मेवारी भएको उहाँको भनाइ थियो ।

उद्घाटन समारोहमा सिबिफिनसँगको सहकार्यमा त्रिभुवन विश्वविद्यालयका सहप्राध्यापक डा. रमेश पौडेलले तयार गर्नुभएको ‘एन एनालाइसिस अफ नेप्लिज बैंकिङ एण्ड फाइनान्सियल इन्ष्टिच्युसन्सः नेसनल एण्ड इन्टरनेसनल प्रोस्पेक्टेभिन्स’ विषयक अनुसन्धानमूलक प्रतिवेदनसमेत सार्वजनिक गरिएको थियो । दक्षिण एसियाली मुलुकका बैंकिङ क्षेत्रको तुलनात्मक अध्ययन गरिएको उक्त प्रतिवेदन नेपाल राष्ट्र बैंकका कार्यकारी प्रमुख गुरूप्रसाद पौडेललाई हस्तान्तरण गरिएको सिबिफिनले जनाएको छ ।