सशस्त्रका चार डिआइजीको अवधि एक वर्ष थप

काठमाडौं । सशस्त्रका चार डिआइजीको अवधि एक वर्ष थप गरिएको छ । सरकारको मन्त्रिपरिषद् बैठकले गरेका निर्णयहरू सार्वजनिक गर्दै शुक्रबार सरकार प्रवक्ता एवं सूचना, प्रविधि तथा सञ्चारमन्त्री पृथ्वीसुब्बा गुरुङले सो जानकारी गराउनुभएको हो । मंगलबार बसेको बैठकले परराष्ट्रका कायममुकायम सचिव अमृतबहादुर राईलाई सचिवमा बढुवा गर्ने निर्णय गरेको छ । यस्तै, सशस्त्र प्रहरी नायव महानिरीक्षकहरू कमल गिरी, गणेशबहादुर ठाडामगर, कुलबहादुर नेम्वाङ र शम्भु सुवेदीको एक वर्ष पदावधि थप गर्ने निर्णय भएको हो ।

फागुन १२ देखि १५ गतेसम्म इटालीको रोममा आयोजना हुने जलवायु परिवर्तनसँग सम्बन्धित कार्यक्रममा सहभागी हुन वन तथा वातावरण राज्यमन्त्रीलाई स्वीकृत दिने निर्णय गरेको मन्त्री गुरुङले जानकारी गराउनुभयो । प्रवक्ता गुरुङले सरकारले सहसचिव विष्णुप्रसाद शर्मालाई विशिष्ट संरचना सञ्चालन तथा व्यवस्थापन विकास समितिको कार्यकारी निर्देशकको रूपमा काम गर्नेगरी काजमा खटाउने निर्णय गरेको बताउनुभयो ।

उहाँले पुस २६ र २७ गते काठमाडौंमा हुने नेपाल भारत वाणिज्य सचिवस्तरीय अन्तरसरकारी समितिको बैठकमा हुने वार्ता तथा छलफलको कार्यसूची स्वीकृत गरी बैठकमा सहभागी हुन उद्योग वाणिज्य तथा आपूर्ति मन्त्रालयका सचिवको संयोजकत्वमा वार्ता टोली गठन गरेको पनि जानकारी दिनुभयो । उहाँले माघ २८ देखि ३० गतेसम्म फिलिपिन्सको मनिलामा सञ्चालन हुने वर्कसप अन इन्हान्सिङ एसआई-सिएसओ इंगेजमेण्ट इन द एएसओएसएआई रिलिजन कार्यक्रममा सहभागी हुन उपमहालेखापरीक्षक वामदेव शर्मा अधिकारीलाई स्वीकृति प्रदान गर्ने निर्णय गरेको पनि बताउनुभयो ।

संविधान संशोधन हुन्छ, गर्छ, गर्ने हो : सञ्चारमन्त्री
सरकारका प्रवक्तासमेत रहनुभएका सूचना, प्रविधि तथा सञ्चारमन्त्री पृथ्वीसुब्बा गुरुङले संविधान संशोधन हुने दाबी गर्नुभएको छ । प्रधानमन्त्रीसमेत रहनुभएका नेकपा एमाले अध्यक्ष केपी शर्मा ओलीले पार्टीको केन्द्रीय समिति बैठकमा ०८७ सालमा मात्रै संविधान संशोधन हुने भनेर दिएको अभिव्यक्तिको बचाउ गर्दै उहाँले यस्तो दाबी गर्नुभएको हो । ‘संविधान संशोधन हुन्छ, गर्छ, गर्ने हो । किनभने, हाम्रो सात बुँदे राजनीतिक सहमतिमा पनि यही कुरा थियो,’ शुक्रबार मन्त्रिपरिषद् बैठकका निर्णय सार्वजनिक गर्ने क्रममा मन्त्री गुरुङले भन्नुभयो । प्रतिनिधि सभामा दुई दलको बहुमत पुगे पनि राष्ट्रिय सभाबाट अड्किने सम्भावनालाई हेर्दै प्रधानमन्त्रीले त्यस्तो भनेको हुनसक्ने उहाँको भनाइ थियो । ‘अहिलेको सिनारियो भनेको प्रतिनिधिसभामा दुईवटा दलको मात्रै बहुमत पुग्छ । तर, राष्ट्रिय सभामा समस्या भइरहेको छ,’ गुरुङले भन्नुभयोे, ‘त्यहाँबाट पनि पास हुनुपर्ने हुन्छ । राष्ट्रिय सभाबाट रोकिने स्थिति बन्यो भने त्यो प्रक्रिया टुंगिँदैन भन्ने भन्नुभएको होला भन्ने लाग्छ ।’

प्रधानमन्त्रीको उक्त अभिव्यक्तिप्रति नेपाली कांग्रेसका नेताहरूले विरोध जनाइरहेका छन् । तर, प्रधानमन्त्रीको भनाइको आशय संविधान संशोधन नै नगर्ने भन्ने नभएको प्रवक्ता गुरुङले स्पष्ट पार्नुभएको थियो । ‘उहाँले भन्नुभएको कुरा चाँहि के हो जस्तो लाग्छ भने, हरेक १०÷१० वर्षमा संविधानको सबल र दुर्बल पक्ष के के रहे भनेर हेर्ने भन्ने हो । त्यो चिजलाई हामीले तयारी गर्नुपर्‍यो । त्यो सबैको आधारमा समीक्षा गर्ने र संशोधन गर्ने भनिएको हो,’ उहाँले भन्नुभयोे, ‘पहिलो त दुई दलको बीचमा सहमति हुन्छ । त्यसपछि हामीले सम्बोधन गर्ने र अन्य दलहरूसँग छलफल हुन्छ । विपक्षी दलसँग छलफल हुन्छ । प्रक्रिया यो हो । उक्त प्रक्रियामा जाँदा अहिलेको सिनारियोबारे उहाँले भन्नुभएको हो ।’