
काठमाडौं । नेकपा एमालेमै रहेर संघर्ष गर्ने सम्भावना सकिएपछि पूर्व-उपप्रधानमन्त्री डा.भीम रावलले आफ्नै नेतृत्वमा पार्टी निर्माणको अभियान थाल्नुभएको छ । विद्यार्थी कालदेखि वाम राजनीतिमा क्रियाशील रावललाई एमालेले गत पुस १० गते साधारण सदस्यसमेत नरहने गरी निष्कासन गरेको थियो । एमालेको दशौँ महाधिवेशनमा अध्यक्षमा केपी शर्मा ओलीसँग प्रतिस्पर्धा गर्नुभएका रावलले अन्ततः कम्युनिष्ट नाम नजोडिने गरी पार्टी निर्माणको पहल थाल्नुभएको हो । पाँच दशकभन्दा लामो समय वाम राजनीतिमा बिताउनुभएका रावलले अन्ततः गैरकम्युनिष्ट राजनीतिक शक्ति निर्माणको अग्रसरता लिनुभएको हो ।
अहिले अभियान, पछि पार्टी
रावलले अहिलेका लागि ‘मातृभूमि जागरण अभियान, नेपाल’ घोषणा गर्नुभएको छ । जसले पछि पार्टीको रूप लिने बताइएको छ । अभियानले ११ बुँदे घोषणापत्र जारी गर्दै राष्ट्रिय स्वाधीनता, स्वाभिमान र समृद्धिलाई मुख्य एजेण्डा बनाएको छ । भ्रष्टाचार र विकृतिविरुद्ध जुट्न आहृवान गर्दै रावलले अभियानअन्तर्गत देश दौडाहा गर्ने घोषणा गर्नुभएको छ । नेपालमा बितेको साढे सात दशकमा अनेकौँ राजनीतिक परिवर्तन भए पनि देश सुशासन, विकास र समृद्धिको बाटोमा अग्रसर हुन नसकेको ठहर अभियानले गरेको छ । अभियानले तत्कालका लागि राष्ट्रिय जीवनका महत्वपूर्ण विषयमा छलफल गर्दै जाने र जनताको माग एवं आकांक्षालाई संगठित गर्दै विस्तृत धारणा, नीति र कार्यक्रम प्रस्तुत गर्ने जनाएको छ । अभियानमा जो कोही राष्ट्रवादी र भ्रष्टाचारविरोधी नेपाली नागरिक आबद्ध हुनसक्ने अभियानले जनाएको छ । नेपालमा कम्युनिष्ट नामका पार्टी धेरै भएको भन्दै रावलको नेतृत्वमा बन्ने पार्टीको नाममा भने कम्युनिष्ट शब्द राखिने छैन । ‘नाममा कम्युनिष्ट वा लोकतान्त्रिक लेखेर मात्रै हुँदैन, त्यसलाई व्यवहारमा लागू गर्ने कुनै पार्टी भएनन् । त्यसैले अब बन्ने पार्टीमा कम्युनिष्ट शब्द राख्दैनौँ’, रावलनिकट एक नेताले भन्नुभयो । अभियानअन्तर्गत वडा, पालिका र प्रदेशस्तरमा १५ देखि २५ जनासम्मको समितिहरू गठन गरिने जनाइएको छ ।
सुदूरपश्चिममा रावललाई स्वागत
अभियान घोषणा गरेलगत्तै शुक्रबार नेता रावल आफ्नो गृहप्रदेश सुदूरपश्चिम पुग्नुभएको छ । गृहजिल्ला अछामका विभिन्न कार्यक्रममा उहाँ सहभागी हुने बताइएको छ । अभियान घोषणापछि गृहजिल्ला पहिलोपटक जाँदै गरेका कारण रावलको यात्रालाई चासोका साथ हेरिएको छ । अछामसहित सुदूरपश्चिमका केही जिल्लामा नेकपा एमालेका नेता कार्यकर्ताले रावललाई साथ दिने आँकलन गरिएको छ । रावल धनगढी विमानस्थल पुग्दा पूर्व-प्रदेशमन्त्री कृष्ण सुवेदी लगायतले स्वागत गर्नुभएको थियो । रावललाई स्वागत गर्न पूर्वएमाले कार्यकर्ताहरू विमानस्थल पुगेका थिए । जहाँ उनीहरूले नेकपा एमाले र अध्यक्ष ओलीविरुद्ध नाराबाजीसमेत गरे । रावलको अभियानले सुदूरपश्चिममा एमालेलाई राजनीतिक क्षति पुग्नसक्ने अनुमान गरिएको छ । सुदूरपश्चिमकै डडेल्धुरामा प्रभाव जमाएका नेपाली कांग्रेस (बिपी)का वरिष्ठ उपाध्यक्ष कर्ण मल्ल र एकीकृत समाजवादीका प्रदेश सांसद तारा जोशीसँग पनि रावलले सहकार्यको प्रस्ताव गर्नुभएको छ । यी तीन शक्तिबीच सहकार्य हुँदा सुदूरपश्चिममा कांग्रेस र एमाले दुवैलाई क्षति पुग्ने दाबी रावल निकटहरूले गर्ने गर्दछन् ।
देशको अवस्था बदल्न सबैसँग सहकार्य हुन्छ : रावल
मातृभूमि जागरण अभियानका प्रस्तावक रावलले अहिले पार्टी निर्माणको प्रारम्भिक विन्दुमा रहेको भन्दै देशको अवस्था बदल्नका लागि आफू नेतृत्वको अभियानले लहर सिर्जना गर्ने बताउनुभएको छ । धनगढीमा पत्रकारहरूसँग कुरा गर्दै रावलले देशको वर्तमान अवस्थाले हरेक नागरिकलाई निराश बनाएको, दलहरूले भागबण्डाका आधारमा देशलाई क्षति पुर्याएको र निष्ठापूर्वक बाँच्ने अवस्था नरहेको भन्दै रावलले आफ्नो अभियानले पार्टीको स्वरूप पाउँदासम्म पुराना शक्तिका लागि चुनौती बन्ने बताउनुभयो । ‘अहिले हामी प्रारम्भिक विन्दुमा छौँ । हामी अहिले हिउँको सानो डल्लो जस्तो हौँ । हिमालमा गुडिरहेको हिउँको डल्ले सानो देखिन्छ, पछि यसले हिमआँधीको रूप लिन्छ’, रावलले भन्नुभयो । उहाँले भ्रष्टाचारविरुद्ध सुशासनको पक्षमा, देश र जनताको स्वाधीनताका पक्षमा उभिँदा विचार मिल्ने सबैसँग सहकार्य हुने पनि बताउनुभयो । ‘देशको अहिलेको अवस्था बदल्न सबैखाले विचारका मान्छेहरू एकताबद्ध हुनुपर्छ, जुन स्वाभाविक पनि हो । सबैसँग हाम्रो सहकार्य हुन्छ’, रावलले भन्नुभयो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच