
काठमाडौं । अर्थतन्त्रलाई चलायमान बनाउन सहयोगी भूमिका खेल्ने एउटा क्षेत्र जग्गाको कारोबार बढ्न थालेको छ । घरजग्गाको कारोबार क्रमशः लयमा फर्किन थालेको हो । देशभरको घरजग्गाको कारोबारको विवरण राख्ने भूमि व्यवस्था तथा अभिलेख विभागका अनुसार गत मंसिर महिनाको तुलनामा गत पुस महिनामा राजस्व संकलनमा वृद्धि भएको छ ।
गत वर्षको तुलनासँगै चालु आर्थिक वर्षको मंसिरमा भन्दा पुसमा पनि जग्गाको कारोबार बढेको छ । जग्गाको कारोबार बढेसँगै राजस्व संकलनमा वृद्धि भएको छ ।
गत आर्थिक वर्ष २०८०/०८१ को मंसिर-पुस र चालु आर्थिक वर्ष २०८१/०८२ को सोही अवधिलाई तुलना गर्दा जग्गाको कारोबार बढ्न थालेको हो । यसका साथै यही आर्थिक वर्षको मंसिरको तुलनामा पुसमा जग्गाको कारोबार बढेको हो ।
जग्गाको कारोबार बढ्न थालेसँगै कारोबारीहरू पनि उत्साहित हुन थालेका छन् । घरजग्गाको कारोबार नबढ्दा बैंकरदेखि घरजग्गा कारोबारीहरू चिन्तित थिए । पछिल्ला दिनमा जग्गाको कारोबार बढ्न थालेसँगै निरन्तरता पाउनेमा व्यवसायीहरू आशावादी देखिन्छन् ।
गत वर्षको तुलनासँगै चालु आर्थिक वर्षको मंसिरमा भन्दा पुसमा पनि जग्गाको कारोबार बढेको छ । भूमि व्यवस्थापन तथा अभिलेख विभागका अनुसार चालु आर्थिक वर्षको पुसमा एक लाख ४० हजार ६२१ कित्ता जग्गाको कारोबार भएको छ । चालु आर्थिक वर्षकै मंसिरमा एक लाख २८ हजार ३८२ कित्ताको कारोबार भएको थियो ।
जग्गाको कारोबार बढेसँगै राजस्व संकलनमा वृद्धि भएको छ । जग्गाको कारोबारबाट मंसिरमा तीन अर्ब ८७ करोड ४८ लाख रुपैयाँ राजस्व संकलन भएकोमा पुसमा चार अर्ब २५ करोड २२ लाख रुपैयाँ राजस्व संकलन भएको छ । मंसिरको तुलनामा पुसमा राजस्व संकलन ३७ करोड ७३ लाख रुपैयाँले बढेको हो ।
गत आर्थिक वर्षको मंसिर र पुसको तुलनामा यो आर्थिक वर्षको मंसिर र पुसमा राजस्व संकलन तथा कारोबार कित्ता बढेको हो । गत आर्थिक वर्षको पुसमा एक लाख ३६ हजार ७७० कित्ता जग्गा कारोबार भएको थियो । त्यस्तै, मंसिरमा एक लाख २७ हजार ६३९ कित्ता कारोबार भएको थियो ।
काठमाडौं उपत्यकाभित्रका विभिन्न नौवटा मालपोत कार्यालयमध्ये सबैभन्दा बढी भूमिसुधार तथा मालपोत कार्यालय लगनखेलले राजस्व संकलन गरेको छ । सो कार्यालयले ४० करोड ९४ लाख ४२ हजार ७३२ रुपैयाँ राजस्व संकलन गरेको छ । यसबाट ललितपुरमा घरजग्गाको कारोबारमा उल्लेख्य वृद्धि भएको सहजै अनुमान गर्न सकिन्छ ।
यस्तै, मालपोत कार्यालय गोटीखेल ललितपुरले दुई लाख ८९ हजार ८४, मालपोत कार्यालय भक्तपुरले २९ करोड ७६ लाख १३ हजार २७१, मालपोत कार्यालय डिल्लीबजारले २१ करोड ९० लाख ९९ हजार ६८५ रुपैयाँ राजस्व संकलन गरेको छ ।
विभागका अनुसार मालपोत कार्यालय चाबहिलले २२ करोड ९३ लाख ८० हजार तीन सय ६७, कलंकी मालपोतले २१ करोड ९३ लाख ७१ हजार ७९२, मालपोत कार्यालय साँखुले १० करोड ३२ लाख ५९ हजार ६२२, मनमैजुले ६ करोड ६८ लाख २९ हजार ५६१, मालपोत कार्यालय टोखाले ६ करोड ७७ लाख ३४ हजार ६९७ रुपैयाँ बराबरको राजस्व संकलन गरेको छ ।
यस्तै, मालपोत कार्यालय विराटनगरले १६ करोड ११ लाख तीन हजार ४८१, मालपोत कार्यालय इनरुवा सुनसरीले १० करोड ९३ लाख ७४ हजार २५७ राजस्व संकलन गरेको छ ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच