अन्तर्राष्ट्रिय पत्रकार महासङ्घ अमेरिकाको प्रथम बैठक सम्पन्न

भर्जिनिया । अन्तर्राष्ट्रिय पत्रकार महासङ्घ अमेरिका (Federation of International Journalist, america- FIJA) को कार्य समितिको बैठक अनलाइन भिडियो कल प्रविधि मार्फत सम्पन्न भएको छ । महासङ्घका अध्यक्ष रामप्रसाद खनालको अध्यक्षतामा सम्पन्न बैठकमा अमेरिकाका विभिन्न सहरहरू, नेपाल, क्यानाडा सम्मका सल्लाहकारहरू, पदाधिकारी तथा बोर्ड अफ डाइरेक्टरहरू प्राय सबैको उपस्थिति  थियो ।

बैठकमा सल्लाहकारहरू क्रमशः वरिष्ठ पत्रकार योगेश उपाध्याय, प्रा. पुरुषोत्तम दाहाल, डा. बालकृष्ण चापागाईँ, पुरु घिमिरे, विजय घिमिरेले संस्थाको आगामी बाटो कस्तो हुनुपर्छ, कसरी अगाडि बढ्ने भन्ने विषयमा आफ्ना मन्तव्यहरू राख्नु भयो । उहाँहरूको भनाइ थियो, अन्तर्राष्ट्रिय पत्रकार महासङ्घ अमेरिका (Federation of International Journalist, america- FIJA) लाई पेसागत पत्रकारहरू र पत्रकारिता लाई जोड्ने, यसका लागि काम गर्ने स्वतन्त्र र लिडिङ संस्थाका रूपमा अगाडि बढ्नु पर्छ । सो का लागि आफूहरू सक्दो योगदान दिन तयार रहेको उहाँहरूले बताउनु भयो ।

बैठकमा उपाध्यक्षहरू क्रमशः अखण्ड भण्डारी, जीवराम भण्डारी, केदार कोइराला, टङ्क पन्त, सतिश चापागाईँले पनि संस्थाका बहुआयामिक पक्षका बारेमा आ-आफ्ना धारणा राख्दै पत्रकारिताका क्षेत्रमा देखिएका विकृति विसङ्गति हटाउन अन्तर्राष्ट्रिय पत्रकार महासङ्घ, अमेरिकाले ठुलो भूमिका खेल्न सक्ने र खेल्ने बताउनुभयो ।

यसैगरी बैठकमा महासचिव टङ्क दाहाल, सचिवमा अनिल अधिकारी, बोर्ड अफ डाइरेक्टरहरू क्रमशः विश्वराज थापा, दिनेश कार्की, नवराज कुँवर, अनिल थापा, सुमन दाहालले पनि महासङ्घको गठनको औचित्य, यसका विविध पक्षहरूका बारेमा धारणा राख्नु भयो ।

महासङ्घका अध्यक्ष रामप्रसाद खनालले बैठक उठेका विभिन्न प्रश्न, जिज्ञासाहरू लाई सम्बोधन गर्दै अन्तर्राष्ट्रिय पत्रकार महासङ्घ अमेरिका FIJA पत्रकारहरूको अन्तर्राष्ट्रिय छाता सङ्गठन बनाउने गरी संस्थाले काम गर्नु पर्ने, पत्रकार र पत्रकारिता क्षेत्रका लागि स्वतन्त्र र निष्पक्ष ढङ्गले काम गर्ने उद्देश्य अनुरूप संसार भर विभिन्न देशहरूमा देश स्तरीय शाखाहरू स्थापना गर्ने तर्फ महासङ्घ अगाडि बढेको र अबका केही हप्तामै त्यसको सुरुवात नेपालमा नेपाल देश स्तरीय शाखा स्थापना गरी अभियान सुरु गर्न लागिएको जानकारी गराउनुभयो ।

बैठकले सचिव अनिल अधिकारीलाई सदस्यता मापदण्ड बनाउन र आगामी बैठकमा प्रतिवेदन पेस गर्न जिम्मेवारी तोकेको छ भने अर्का बोर्ड अफ डाइरेक्टर दिनेश कार्कीलाई पत्रकारहरूको विश्वव्यापी नेटवर्क बनाउने कार्यलाई सहयोग पुग्ने गरी डाटा सङ्कलन तथा त्यसलाई व्यवस्थित गर्ने गरी को को हो ? अर्थात Who is who पुस्तक तथा अनलाइन प्रकाशनका लागि आवश्यक तयारी तयारीका लागि संयोजक तोक्ने निर्णय गरेको छ ।

यसैगरी बैठकले महासङ्घका अध्यक्ष रामप्रसाद खनाललाई कार्य समितिलाई पूर्णता दिन आवश्यक पर्ने थप मनोनयनहरू गर्न र नेपाल शाखा निर्माणका लागि आवश्यक पहल गर्न अधिकार प्रत्यायोजन गरेको छ ।

बैठकले पत्रकारिता सँग सम्बध्द संसार भर रहेका जुन सुकै संस्थाहरू सँग पनि पत्रकार हक हित र पत्रकारिताको बिकासका लागि आबस्यक सहकार्य गर्दै अगाडि बढ्ने पनि निर्णय गरेको छ ।

महासचिव टङ्क दाहाललाई संस्थाको तर्फबाट मनोनयन पत्र, परिचय पत्र र वेबसाइट डिजाइनका लागि जिम्मेवारी प्रदान गरेको छ । सबै महादेशहरू बाट प्रतिनिधित्व हुने गरी अन्तर्राष्ट्रिय पत्रकार महासङ्घलाई पूर्णता दिइने प्रयास गरिएको छ भने केही समय भित्रै नेपाल, बेलायत, अस्ट्रेलिया, जापान, क्यानाडा लगायतका देशहरूमा शाखा निर्माण गरिने छ । यसै गरी अन्य देशहरूमा पनि शाखा बिस्तार गरिँदै लगिने योजना छ । त्यस का लागि सम्बन्धित देशहरूमा रहेका पत्रकारहरूलाई fijaheadquarters@gmail.com मा सम्पर्क गर्न आग्रह गरिएको छ । त्यसैगरी अन्य देशहरूमा पनि अन्तर्राष्ट्रिय पत्रकार महासङ्घका देश स्तरीय शाखाहरू स्थापना गरिने छन् जहाँ पेसागत पत्रकारहरू रहनेछन् । अन्तर्राष्ट्रिय पत्रकार महासङ्घको बारेमा, यसका गतिविधिहरू यसको वेबसाइटमा पनि समावेश गरिँदै लगिने अन्तर्राष्ट्रिय पत्रकार महासङ्घले जनाएको छ ।

पेसागत पत्रकारहरूको स्वतन्त्र, साझा, र छाता सङ्गठनका रूपमा अन्तर्राष्ट्रिय पत्रकार महासङ्घ अमेरिका (Federation of International Journalist, america) ले नेपाली पत्रकारहरूलाई मात्र होइन विभिन्न देशका पत्रकारहरूलाई समेट्दै जाने र जुन सुकै देशको पेसागत पत्रकार पनि यसमा आबद्ध हुन पाउने विधानमा व्यवस्था गरिएको छ ।