भारतको रेल दुर्घटनामा मृतक १३ मध्ये चार नेपाली

काठमाडौं । भारतको महाराष्ट्रमा बुधबार भएको रेल दुर्घटनामा १३ जनाको मृत्यु भएको छ । जसमा चार नेपाली पनि परेका छन् । महाराष्ट्रको जलगाउँ जिल्लाको पाचोरा येथे पारधाडे रेल्वेस्थान नजिक भएको दुर्घटनामा मृत्यु भएका १३ जनामध्ये चारजना नेपाली भएको भारतीय सरकारले पुष्टि गरेको छ । लखनऊ-मुम्बई पुष्पक एक्स्प्रेस ट्रेनमा आगलागीको अफवाहपछि यात्रुहरूबीच त्रास फैलाएपछि मानिसहरूको मृत्यु भएको बताइएको छ । उनीहरूमध्ये धेरैले हाम फालेको र अर्को आउँदै गरेको ट्रेनले किचेर मृत्यु भएको जनाइएको छ ।
मृतक नेपालीहरू सबै अछामका रहेको बताइएको छ । मृत्युहुनेमा अछामको पञ्चदेवल विनायक नगपालिका-४ का नन्दाराम विक, उहाँकी श्रीमती मैसरा विक, उहाँका छोरा हिमु विक र कमलबजार नगरपालिका-४ चाल्साकी ६० वर्षीया जयकला विक रहनुभएको छ ।

दुर्घटनापछि रेल मन्त्रालयले मृतकका परिवारलाई जनही १.५ लाख रुपैयाँ, गम्भीर घाइतेलाई ५० हजार रुपैयाँ र सामान्य घाइतेलाई पाँच हजार रुपैयाँ दिने घोषणा गरेको छ । भारतीय प्रधानमन्त्री नरेन्द्र मोदीले पनि पीडित परिवारप्रति समवेदना व्यक्त गर्नुभएको छ ।

‘महाराष्ट्रको जलगाउँमा रेलवे ट्¥याकमा भएको दुःखद दुर्घटनाबाट दुखित भएको छु । म शोक सन्तप्त परिवारमा हार्दिक समवेदना प्रकट गर्दछु र सबै घाइतेहरूको शीघ्र स्वास्थ्यलाभको लागि प्रार्थना गर्दछु । अधिकारीहरूले प्रभावितलाई सबै सम्भव सहयोग उपलब्ध गराउँदैछन्,’ प्रधानमन्त्री मोदीले लेख्नुभएको छ ।

डाभोसको विश्व आर्थिक मञ्चमा उपस्थित महाराष्ट्रका मुख्यमन्त्री देवेन्द्र फडणवीसले दुःखद् घटनामा आफ्ना प्रियजन गुमाएका परिवारलाई पाँच लाख रुपैयाँ आर्थिक सहयोग गर्ने घोषणा गर्नुभएको छ । दुर्घटनामा शोक व्यक्त गर्दै उहाँले एक भिडियो सन्देशमा भन्नुभयो, ‘राज्य सरकारले घाइतेहरूको सम्पूर्ण खर्च पनि व्यहोर्नेछ । म घाइतेहरूको शीघ्र स्वास्थ्यलाभको कामना गर्दछु ।’

अर्को रेलबाट यसरी किचिए १३ यात्रु
भारतीय सञ्चारमाध्यमका अनुसार यो दुर्घटना महाराष्ट्रको जलगाउँमा बुधबार अपराहृन ४ः४२ बजे भएको हो । १२५३३ नम्बरको पुष्पक एक्स्प्रेस रेल लखनऊबाट मुम्बई जाँदै थियो । यस क्रममा उक्त रेल पाचोरा स्टेसननजिकै महेजी र पार्धाडेबीच ट्यार्‍कमा रोकियो । यहीबीच रेलमा आगो लागेको हल्ला फैलियो । जसबाट आत्तिएर यात्रुहरू रेलको डिब्बाबाट धमाधम अर्काे लिकमा हाम फाल्न थाले । यसैबीच सोही लिक भएर बेंगलुरुबाट नयाँदिल्लीका लागि १२६२७ नम्बरको कर्नाटक एक्स्प्रेस रेल हुँइकिएर आउँदै थियो । जसमा किचिन पुगे हाम फालेका यात्रुहरू ।

प्रत्यक्षदर्शी मुम्बईका ट्याक्सी चालक साबिर र लखनऊका राजीव शर्माले भन्नुभएको छ, ‘हामी पुष्पकको स्लिपर कोचमा थियौं । रेल रोकिएपछि म बाहिर निस्किए । केही मानिसहरू दौडिरहेका थिए र चिच्याइरहेका थिए– आगो लाग्यो, बाहिर निस्किनुहोस् । हाम्रो डिब्बामा पनि आतंक थियो । सबै महिला र केटाकेटी तल ओर्ले र भाग्न थाले । मेरो साथी पनि लडेर घाइते भयो । यसैबीच अगाडिबाट एउटा रेल आयो र मानिसहरूलाई कुल्चँदै गयो ।’

एक वरिष्ठ रेलवे अधिकारीले दिएको प्रारम्भिक जानकारी अनुसार पुष्पक एक्स्प्रेसको कोचभित्र ‘तातो एक्सल’ वा ‘ब्रेक–बाइन्डिङको कारणले गर्दा झिल्काहरू निस्किएका थिए । जसका कारण केही यात्रु आत्तिए र तल हाम फाले ।

परराष्ट्रमन्त्री डा.आरजु राणाद्वारा दुःख व्यक्त
परराष्ट्रमन्त्री डा.आरजु राणा देउवाले भारतको महाराष्ट्रमा बुधबार भएको रेल दुर्घटनाप्रति दुःख व्यक्त गर्नुभएको छ । उहाँले सामाजिक सञ्जालमार्फत् सो दुर्घटनाप्रति दुःख व्यक्त गर्नुभएको हो । डा.राणाले दुर्घटनामा परेर नेपाली र भारतीय नागरिकको मृत्यु भएको खबरले आफू दुःखी भएको उल्लेख गर्नुभएको छ । मन्त्री डा.राणाले दुर्घटनामा ज्यान गुमाउनेहरूप्रति श्रद्धाञ्जलि अर्पण गर्दै मृतकका परिवारजनमा समवेदना व्यक्त गर्नुभएको छ । साथै घाइतेहरूको शीघ्र स्वास्थ्यलाभको कामनासमेत गर्नुभएको छ ।

मन्त्री राणाले बिहीबार बिहान भारतका लागि नेपाली राजदूत र नेपालस्थित भारतीय राजदूतलाई टेलिफोन सम्पर्क गरी उद्धार तथा घाइतेको उपचारमा तदारुकताका साथ लाग्न भारत सरकार तथा सरोकार भएका निकायसँग आग्रह गर्नुभएको थियो ।