भारतीय सौर्य ऊर्जा कम्पनीसँग गोल्यानको सहकार्य

काठमाडौं । भारतको सबैभन्दा ठूलो सौर्य इपिसी कम्पनी प्रोजिल ग्रिन इनर्जीले नेपालमा नवीकरणीय ऊर्जा प्रवद्र्धनमा सहकार्य गर्ने भएको छ । प्रोजिल ग्रिन इनर्जी र गोल्याण पावर लिमिटेडबीचको संयुक्त उपक्रम ‘प्रोजिल ग्रिन इनर्जी नेपाल’ बुधबार काठमाडौंमा आयोजित प्रोजल ग्रिन इनर्जी शिखर सम्मेलन औपचारिकरूपमा सुरु गरिएको हो । कार्यक्रममा विद्युत् नियमन आयोगका अध्यक्ष डा. रामप्रसाद धितालले सरकारले नवीकरणीय ऊर्जाका परियोजना अघि बढाउन विभिन्न नीति ल्याइरहेको जानकारी गराउँदै नियामक निकायको हैसियतले विद्युत् नियमन आयोगले पनि नयाँ-नयाँ नीतिमा काम गरिरहेको र नवीकरणीय उर्जा क्षेत्रलाई थप अघि बढाउन सधैं तत्पर रहेको बताउनुभयो । ।उहाँले भन्नुभयो, ‘सरकार नवीकरणीय ऊर्जाका क्षेत्रमा साथै निजी क्षेत्रलाई सहयोग गर्न सधैं तत्पर रहेको छ । तपाईंहरूले लगानी बढाउँदै जानुहुन्छ भन्ने विश्वास छ ।’

स्वतन्त्र ऊर्जा उत्पादकहरूको संस्था(इप्पान)का अध्यक्ष गणेश कार्कीले गोल्यान समूहले पाँच सय मेगावाट विद्युत् उत्पादन गर्ने भन्ने सुुन्दा आफू निकै उत्साहित भएको बताउनुभयो । उहाँले भन्नुभयो, ‘हामीले चाहेमा र सरकारले बाटो खुला गरिदिएमा अर्को वर्षमा एक हजार मेगावाट ऊर्जा उत्पादन गर्न सक्छौँ भन्ने लाग्यो ।’ हाल आठ सय मेगावाटको टेण्डर भइसके पनि त्यो कहाँ छ भन्ने थाहा नभएको गुनासो गर्दै उहाँले स्पष्ट भिजनसहित अघि बढ्न इप्पानले सरकारलाई सुझाव दिँदै आएको बताउनुभयो । बन्दै गरेको विद्युत् विधेयकमा सौर्य ऊर्जाको विषय नसमेटिएकाले त्यसलाई पनि समेट्नुपर्ने कार्कीको भनाइ थियो । उहाँले भन्नुभयो, ‘विधेयक हरेक वर्ष परिवर्तन गर्ने कुरा हुँदैन । त्यसकारण अहिले विधेयक बनाउँदै गर्दा यसमा विचार पुर्‍याउनुपर्छ ।’

विधेयक बनाउँदै गर्दा पहिले लाइसेन्स ५० वर्षको हुने र त्यसपछि हस्तान्तरण गरिने स्पष्ट व्यवस्था भए पनि अहिले ३५ वर्षको कुरा आउनु उचित नभएको उहाँको भनाइ थियो । सोपानका अध्यक्ष डा. सन्दीप शाहले ऊर्जाको विकासमा सौर्य ऊर्जाको भूमिका उल्लेख्यनीय रहेको भन्दै नेपालका केही क्षेत्रहरू सौर्य ऊर्जा उत्पादनका लागि निकै उपयुक्त रहेको बताउनुभयो । ट्रान्समिसन लाइनसमेत सहज पहुँच गराएर मुस्ताङलगायतका ठाउँबाट सौर्य ऊर्जा उत्पादन गर्न सकिने उहाँको भनाइ थियो । प्रोजिल ग्रिन इनर्जी नेपालले आगामी २४ महिनामा नेपालका विभिन्न स्थानमा पाँच सय मेगावाटभन्दा बढी सौर्य ऊर्जा परियोजना स्थापना गर्ने लक्ष्य राखेको छ । प्रोजिल ग्रिन इनर्जीका अध्यक्ष शोभित बैजनाथ रायले भन्नुभयो, ‘हाम्रा सम्मानित साझेदार गोल्याण पावरसँग मिलेर हामी पाँच सय मेगावाटभन्दा बढी सौर्य ऊर्जा परियोजना निर्माण गरी नेपालको नवीकरणीय ऊर्जा यात्रामा ऐतिहासिक कोसेढुंगा हासिल गर्न अघि बढिरहेका छौं । प्रोजिल ग्रिन इनर्जी नेपाल दिगो र नवीन ऊर्जाद्वारा नेपाललाई सशक्त बनाउने साझा प्रतिबद्धता राख्छ । हाम्रो उद्देश्य नेपालको नवीकरणीय ऊर्जा क्षेत्रमा रूपान्तरणको नेतृत्व गर्नु र देशको डिकार्बोनाइजेसन प्रयास अझ बलियो बनाउनु हो ।’

प्रोजिल ग्रिन इनर्जी र गोल्याण पावरको साझेदारीले विश्वव्यापीरूपमा दुई गिगावाटभन्दा बढी नवीकरणीय ऊर्जा परियोजना सम्पन्न गरेको प्रोजिलको प्रमाणित ट्र्याक रेकर्डलाई गोल्याण पावरको मिहिन स्थानीय ज्ञान र बजार नेतृत्वसँग जोड्छ । गोल्याण पावरतर्फबाट प्रोजिल ग्रिन इनर्जी नेपालका सञ्चालक प्रवीण अर्यालले भन्नुभयो, ‘यो साझेदारीले नेपालमा नवीकरणीय ऊर्जा र दिगोपनप्रतिको हाम्रो प्रतिबद्धता प्रतिबिम्बित गर्छ । प्रोजिल ग्रिन इनर्जीसँग सहकार्य गरेर हामीले नेपालको बढ्दो ऊर्जा माग पूरा गर्ने र आर्थिक वृद्धि सहज बनाउने दिशामा निर्णायक कदम चालेका छौं । हाम्रो साझा उद्देश्य भनेको विश्वस्तरीय ऊर्जासम्बन्धी सोलुसन उपलब्ध गराउनु हो, जसले आजका चुनौतीमात्र सम्बोधन नगरी समृद्ध र दिगो भविष्यका लागि मार्ग प्रशस्त गर्दछ ।’ संयुक्त सम्झौताअनुसार प्रोजिल ग्रिन इनर्जीले नवीकरणीय ऊर्जा क्षेत्रमा यसको व्यापक विशेषज्ञतालाई प्रयोगमा ल्याउँदै इपिसी (इञ्जिनियरिङ, खरिद र निर्माण) विकास कम्पनीका रूपमा नेतृत्व गर्नेछ र गोल्याण पावरले व्यापार विकास, जग्गा अधिग्रहण र वित्तीय व्यवस्थापनमा ध्यान केन्द्रित गर्नेछ ।

प्रोजिल ग्रिन इनर्जी लिमिटेडले दुई गिगावाटभन्दा बढी स्थापित क्षमता र व्यावसायिक, औद्योगिक, संस्थागत र सरकारी क्षेत्रमा तीन सयभन्दा बढी ग्राहकसँग विश्वव्यापी ऊर्जा परिदृश्यलाई डिकार्बोनाइज गर्ने कामको नेतृत्व गरिरहेको छ ।