
काठमाडौं । राष्ट्रिय योजना आयोगले समग्र विकासका लागि १३ विषयगत क्षेत्र पहिचान गर्दै १६औँ विकास योजनाको कार्यान्वयन योजना तयार पारेको छ । १६औँ योजना कार्यान्वयन कार्ययोजना आर्थिक वृद्धिमा मात्र केन्द्रित नभई दिगो विकासका साथै सामाजिक न्याय, समावेशिता र समान विकासका सिद्धान्त कार्यान्वयन गर्ने दिशामा केन्द्रित रहेको राष्ट्रिय योजना आयोगको उपाध्यक्ष शिवराज अधिकारीले बताउनुभयो । १६औँ योजना कार्यान्वयनमा दिगो विकास लक्ष्य स्थानीयकरण र अतिकम विकसित देशबाट स्तरोन्नति हुने लक्ष्यलाई प्राथमिकता दिइएको उहाँको भनाइ थियो । आयोगका अनुसार १६औँ विकास योजना, दिगो विकास लक्ष्य र विकासशील राष्ट्रमा स्तरोन्नति अलग–अलगरूपमा मात्र कार्यान्वयन हुनेछ । तीनवटै लक्ष्य परस्पर अन्तरक्रियात्मक र एकअर्कालाई सहयोग गर्ने गरी विकसित गरिएको र कार्यान्वयनमा लागिएको छ । आयोगद्वारा बिहीबार आयोजित पत्रकार सम्मेलनमा उक्त जानकारी दिइएको हो । योजना आयोगले दिगो विकास लक्ष्यको ‘कसैलाई पनि पछि नछोड्ने’ भन्ने सिद्धान्तका आधारमा योजना तथा कार्यक्रम तयार गरेको र योजना कार्यान्वयनमा विशेषगरी सामाजिक न्याय, समावेशी विकास र दिगो आर्थिक वृद्धिलाई प्राथमिकता दिइएको उपाध्यक्ष अधिकारीले जानकारी गराउनुभयो ।
साथै आयोगले आयोजना बैंक अध्यावधिक गर्ने भएको छ । आयोजना बैंक अध्यावधिक गर्दै ७० अंक नल्याउने आयोजना ‘आयोजना बैंक’मा प्रवेश गर्न नपाउने भएको छ । कुल सय अंकमध्ये ७० अंक आधारभूत मापदण्ड र ३० अंक क्षेत्रगत मापदण्डका आधारमा प्रदान हुन्छ । यसरी प्रदान हुने अंकमा ७० अंक प्राप्त गर्ने आयोजनामात्रै बैंकमा प्रवेश हुनेछन् । तीन वर्षसम्म निष्क्रिय रहेका आयोजना सूचीबाट हट्नेछन् ।
आयोजना पहिचानका क्रममा सम्बन्धित मन्त्रालयले नै आयोजनाको साधारण जानकारी उपलब्ध गराउनुपर्नेछ । एक अर्बभन्दा साना आयोजनाको पूर्वसम्भाव्यता र एक अर्बभन्दा बढीको आयोजनाले विस्तृत परियोजना प्रतिवेदन तयार गरेपछि मात्रै बैंकमा समावेश गर्ने गरी मापदण्डमा सुधार गरिएको छ । हाल आयोजना बैंकमा कुल १८ हजार १८ आयोजना समावेश छन् । जसमध्ये ११ हजार १४ आयोजना गत वर्ष समावेश भएका हुन् । चालु आर्थिक वर्षमा कुल दुई सय २१ आयोजना समावेश भएका छन् । तीमध्ये सबैभन्दा धेरै शहरी विकास मन्त्रालयले सात हजार तीन सय ७७, भौतिक पूर्वाधार तथा यातायात मन्त्रालयअन्तर्गतका निकायका पाँच हजार दुई सय ९४ र खानेपानी मन्त्रालयअन्तर्गत दुई हजार आठ सय ५९ आयोजना समावेश छन् ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच