
काठमाडौं । राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देनले मुलुक भूराजनीतिक चक्रव्यूहमा फस्ने खतरा रहेको निष्कर्ष निकाल्नुभएको छ । वैदेशिक सम्बन्ध विस्तार र सञ्चालनमा सरकारको शैलीले देश भूराजनीतिक चक्रव्यूहमा फस्नसक्ने खतरा रहेको उहाँको निष्कर्ष छ । शुक्रबारबाट काठमाडौंमा सुरु भएको केन्द्रीय समिति बैठकमा अध्यक्ष लिङ्देनले पेस गरेको समसामयिक राजनीतिक परिस्थितिको समीक्षा र भावी कार्यदिशासम्बन्धी राजनीतिक प्रतिवेदनमा सरकार यही शैलीमा चले देश भू-राजनीतिक चक्रव्यूहमा फस्न सक्ने उल्लेख छ ।
उहाँले पहिलो र दोस्रो दल मिलेर सरकार निर्माण गर्ने परिकल्पना संसदीय व्यवस्थामा नहुने भए पनि नेपालमा अनौठो अभ्यास भइरहेको जिकिर गर्नुभएको छ । दुई दलीय व्यवस्था कायम गर्ने षड्यन्त्र भइरहेको भन्दै त्यसविरुद्ध पार्टी चनाखो हुनुपर्नेमा उहाँले जोड दिनुभएको छ । प्रतिवेदनमा उहाँले कांग्रेस–एमाले बहुदलीय व्यवस्था मास्न र दुई दलीय व्यवस्था कायम गर्ने षड्यन्त्रमा लागेको आरोपसमेत लगाउनुभएको छ । नेपालमा अहिले कांग्रेस र एमालेले अनौठो अभ्यास गरिएको उहाँले बताउनुभयो । अध्यक्ष लिङ्देनले हिउँदे अधिवेशन छलेर अध्यादेशबाट शासन चलाउने सरकारको रवैयाको पनि कटाक्ष गर्नुभएको छ ।
‘आन्दोलन र चुनावका लागि उहाँले संगठन निर्माणमा जोड दिनुभएको छ । समान विचार भएका व्यक्ति, समूह र दलसँग एकता, सहकार्य वा मोर्चा बनाउने विषयमा उहाँले केन्द्रीय समितिसँग सुझाव माग्नुभएको छ । बैठकमा महामन्त्री एवं सचिवालय प्रमुख राजेन्द्र गुरुङले सचिवालयको प्रतिवेदन र कोषाध्यक्ष नीलकण्ठ काफ्लेले आर्थिक प्रतिवेदन पेस गर्नुभएको छ । महामन्त्री डा. धवलशमशेर राणाले आन्दोलनसम्बन्धी कार्ययोजना पेस गर्नुभयो । बैठक शनिबार सम्पन्न गर्ने कार्यसूची रहेको राप्रपाले जनाएको छ ।
सरकार विरुद्धको जनसंघर्षलाई सशक्त बनाउने
राप्रपाले सरकारविरुद्धको जनसंघर्षलाई सशक्त बनाउने भएको छ । केन्द्रीय समिति बैठकले विभिन्न माग राख्दै पार्टीले गरिरहेको आन्दोलन र जनसंघर्षलाई ठोसस्वरूप दिएर सशक्त बनाउने अध्यक्ष लिङ्देनले जानकारी दिनुभयो । कांग्रेस–एमालेजस्ता ठूला दल मिलेर बनेको सरकारले जनतामा आशा जागृत गर्न नसकेको, निराशा पैदा भएको र अर्थतन्त्रसमेत शिथिल हुँदै गएको लिङ्देनले बताउनुभयो । सरकारले प्रजातन्त्रलाई समेत कमजोर बनाउनेगरी संसद् छलेर अध्यादेशमार्फत मुलुक सञ्चालन गरेको बारेमा पनि बैठकमा छलफल हुने उहाँले बताउनुभयो । पार्टीको जिल्ला अधिवेशनको समीक्षा गर्दै तीव्रता दिन आवश्यक निर्देशनसमेत बैठकले दिने राप्रपाले जनाएको छ । बैठकमा सरकारको कार्यशैलीको समीक्षा, पार्टीका आगामी रणनीति, प्रतिपक्षको भूमिका र अन्य सहकार्यलगायत विषयमा समेत छलफल हुने उहाँले बताउनुभयो ।
अध्यक्ष लिङ्देनको आलोचना
राप्रपा महामन्त्री डा. धवलशमशेर राणाले अध्यक्ष राजेन्द्र लिङ्देनको आलोचना गर्नुभएको छ । पार्टी राजसंस्था र हिन्दू अधिराज्य सहितको लक्ष्य प्राप्ति उन्मुख नभएको भन्दै उहाँल अध्यक्षको आलोचना गर्नुभएको हो । इमानदार भएर लिङ्देन नेतृत्वको लेखाजोखा गर्नुपर्ने उहाँको भनाइ छ । महाधिवेशनलगत्तै ६ महिनाभित्र समान विचारधारा भएका दल, समूह, संस्था र व्यक्तिलाई एकताबद्ध गर्दै राजसंस्था, हिन्दू अधिराज्यलगायत लक्ष्य प्राप्त गरिन्छ भन्ने नेतृत्वको सार्वजनिक प्रतिबद्धता गरेको उहाँले स्मरण गर्नुभयो । ‘एकता महाधिवेशनपश्चात् राष्ट्रिय प्रजातन्त्र पार्टीले नयाँ गति लिन्छ, गुणात्मक फड्को मार्छ, विधानको पालना र कार्यान्वयनमा आन्तरिक प्रजातन्त्र सुदृढ हुन्छ भन्ने आम अपेक्षा रहे पनि एकपछि अर्को समस्याले गर्दा पार्टी पंक्तिमा चिन्ताको सञ्चार भएको छ,’ प्रतिवेदनमा उहाँले भन्नुभएको छ । पार्टी महाधिवेशनको कार्यादेश, पार्टीको घोषित नीति र लक्ष्य कार्यान्वयनमा समेत शिथिलता देखिएको उहाँको निष्कर्ष छ । एकता महाधिवेशनको मर्म र भावनाअनुरुप पार्टीलाई एक ढिक्का राख्न अध्यक्ष लिङ्देनमा नयाँ सक्रियता र सत्प्रयासको अभाव देखिएको उहाँको भनाइ छ ।
सत्ताको लोभले पार्टी ओरालोमा
महामन्त्री राणाले राप्रपा लगातार ओरालो यात्रामा रहेको भन्दै चिन्ता प्रकट गर्नुभएको छ । त्यसो हुनुको कारण राप्रपा सत्तामा जानु रहेको उहाँको निष्कर्ष छ । लिङ्देन अध्यक्ष निर्वाचित भएपछि राजसंस्था र हिन्दू अधिराज्य पुनःस्थापनाका लागि सडक संघर्ष गर्ने र सत्तामोहमा नलाग्ने प्रतिबद्धता जनाएपछि राप्रपाप्रति आकर्षण बढेको उहाँले स्मरण गर्नुभएको छ । तर, त्यसविपरीत सरकारमा जाँदा पार्टीप्रतिको जनआकर्षण ओरालो लागेको उहाँको निष्कर्ष छ । ‘महाधिवेशन सम्पन्न भएको ६ महिनाभित्र राजसंस्था, हिन्दूराष्ट्र पक्षधर सबै व्यक्ति, समूह, संस्था, संगठन र पार्टीलाई एकताबद्ध गरेर राष्ट्रिय शक्ति निर्माण गर्ने, यसैको बलमा राजसंस्था, हिन्दू अधिराज्य पुनःस्थापनाका लागि सडक संघर्षसमेत गर्ने, दुई–चार सिट जितेर आलोपालो मन्त्री खाने खेलमा नलाग्ने, सच्चिएको राप्रपा कांग्रेस, कम्युनिष्टको विकल्प मात्र होइन, देशको मूल केन्द्र बन्नेजस्ता नवनिर्वाचित अध्यक्षको उद्घोषले राप्रपाको आकर्षणमा थप ऊर्जा मिलेको थियो,’ प्रतिवेदनमा भनिएको छ, ‘तर, सार्वजनिक प्रतिबद्धता र जनअपेक्षाप्रतिकूल ३ माघ २०७९ मा प्रचण्ड सरकारमा सामेल भएपछि पार्टीप्रतिको आकर्षण ओरालो लागेको हो, त्यो क्रम हालसम्म जारी छ ।’ उपचुनावमा आएको परिणामको नैतिक जिम्मेवारी अध्यक्ष लिङ्देनले वहन गर्नुपर्ने महामन्त्री राणाको भनाइ छ ।
बिरामी भयो कि, पद गुम्ने डर भयो : डा. राणा
राप्रपाका महामन्त्री डा. धवलशमशेर राणाले बिरामी भएको बेलामा आफूलाई संगठन विभाग प्रमुखको जिम्मेवारीबाट हटाइएको भन्दै गुनासो गर्नुभएको छ । केन्द्रीय समिति बैठकमा आफ्नो राजनीतिक विचार प्रस्तुत गर्दै राणाले बिरामी भएको बेलामा मानवीयताको समेत ख्याल नगरी जिम्मेवारी खोसिएको गुनासो गर्नुभयो । बिरामी हुनै नपाइने र अस्पताल भर्ना हुनेबित्तिकै कारबाही हुनेजस्ता साँघुरो मनोवृत्ति नजिर बने राप्रपामा महामन्त्री मात्र होइन, अध्यक्ष, अन्य पदाधिकारी तथा केन्द्रीय सदस्यहरू बिरामी हुनासाथ पद गुम्ने व्यवस्था नियमित हुने उहाँले प्रतिवेदनमा उल्लेख गर्नुभएको छ । आफूलाई हठात् संगठन विभाग प्रमुखबाट हटाइनु मानवीय, राजनीतिक र वैधानिक कुनै पनि दृष्टिबाट न्यायोचित नभएको उहाँको भनाइ छ । केही महिनाअघि राणा उपचारका लागि भारत गएको बेला अध्यक्ष लिङ्देनले संगठन विभाग प्रमुखबाट हटाएर उपाध्यक्ष बुद्धिमान तामाङलाई जिम्मेवारी दिनुभएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच