बृहत् वामपन्थी एकतामा जोड

काठमाडौं । बृहत् वामपन्थी मोर्चा अहिलेको आवश्यकता भएको नेताहरूले बताएका छन् । शनिबार काठमाडौंमा एकदेव आलेको ५६औँ स्मृति दिवसमा आयोजित कार्यक्रमलाई सम्बोधन गर्ने क्रममा वामपन्थी नेताहरूले यस्तो जिकिर गरेका हुन् । सबैलाई महशुस भएको खण्डमा अहिलेको आवश्यकता बृहत् वामपन्थी एकताको भएको र महशुस नभएको खण्डमा ०८४ सालको निर्वाचनपछि थाहा हुने उनीहरूको भनाइ थियो । नेपालमा वामपन्थी र कम्युनिष्ट आन्दोलनको राम्रो सम्भावना रहेको उनीहरूको धारणा थियो ।

देश संकटमा पर्दा कम्युनिष्ट पार्टीको आवश्यकता पर्छ : नेपाल
नेकपा एकीकृत समाजवादीका अध्यक्ष एवं पूर्वप्रधानमन्त्री माधवकुमार नेपालले नेपालमा वामपन्थी र कम्युनिष्ट आन्दोलनको राम्रो सम्भावना रहेको बताउनुभएको छ । ५६औँ स्मृति दिवसमा आयोजित कार्यक्रमलाई सम्बोधन गर्दै उहाँले यस्तो बताउनुभएको हो । उहाँले अझै कम्युनिष्ट पार्टीको जनतामा राम्रो प्रभाव रहेको बताउनुभयो । उहाँले अहिले कम्युनिष्ट पार्टीप्रति मात्रै नभई सिंगो राजनीतिप्रति नै वितृष्णा पैदा हुने अवस्था बनेको बताउनुभयो । उहाँले कम्युनिष्ट पार्टी एकताबद्ध भएर अगाडि बढेको भए र कम्युनिष्ट पार्टीले पाएको अवसरको राम्रो सदुपयोग गर्न सकेको देशमा अचम्मको परिवर्तन गर्नसक्ने अवस्था रहेको बताउनुभयो । देश संकटमा परेको बेलामा कम्युनिष्ट पार्टीको आवश्यक हुने बताउनुभयो । अध्यक्ष नेपालले राजनीतिक दल र सरकारले जनताका समस्या समाधान गर्नेगरी काम गर्नुपर्ने बताउनुभयो ।

बृहत् वामपन्थी मोर्चा अहिलेको आवश्यकता : खनाल
पूर्वप्रधानमन्त्री एवं नेकपा एकीकृत समाजवादीका सम्मानित नेता झलनाथ खनालले बृहत् वामपन्थी मोर्चा अहिलेको आवश्यकता भएको बताउनुभएको छ । काठमाडौंमा शनिबार आयोजित कार्यक्रममा खनालले सबैलाई महशुस भएको खण्डमा अहिलेको आवश्यकता बृहत् वामपन्थी एकता भएको र महशुस नभएको खण्डमा २०८४ सालको निर्वाचनपछि थाहा हुने बताउनुभयो । कम्युनिष्ट आन्दोलनलाई एकताबद्ध गर्न र सही वैचारिक राजनीतिक कार्यदिशा आवश्यक भएको खनालको भनाइ थियो । पार्टीका अध्यक्ष माधवकुमार नेपालप्रति कटाक्ष गर्दै उनले कतिपयले समाजवादी मोर्चा भन्ने गरेको भए पनि अहिले समाजवादी मोर्चाबारे परिपक्व अवस्था नभएको बताउनुभयो । ‘हामीले अहिलेको अवस्थामा आन्दोलनलाई एकताबद्ध गर्ने हो भने सही वैचारिक राजनीतिक कार्यदिशामा आउनुपर्छ । सही वैचारिक कार्यदिशा अहिले नै पहिल्याउन सकिँदैन भने कमसेकम साझा आधार छ । एउटा बृहत् वामपन्थी मोर्चा बनाउन जरुरी छ । अब कतिपयले समाजवादी मोर्चा भन्नुहुन्छ । समाजवादी मोर्चाको अहिले त्यो परिपक्व अवस्था होइन,’ उहाँले भन्नुभयो । नेपालको कम्युनिष्ट आन्दोलन क्रमिक रूपले विभाजित भइरहेको उहाँको भनाइ थियो ।

समाजवादउन्मुख समृद्धि अहिलेको मूल कार्यक्रम र रणनीति : श्रेष्ठ
नेकपा माओवादी केन्द्रका वरिष्ठ उपाध्यक्ष नारायणकाजी श्रेष्ठले फेरि नयाँ जनवादी क्रान्ति गर्नुपर्ने कुरा दुःखदायी भएको बताउनुभएको छ । एकदेव आलेको ५६औँ स्मृति दिवसमा आयोजित कार्यक्रमलाई सम्बोधन गर्दै श्रेष्ठले क्रान्ति शुद्धतामा अगाडि नबढ्ने भन्दै नेपालमा सामन्तवादविरोधी क्रान्ति आधारभूत रूपमा सम्पन्न भयो कि भएन भनेर हेर्न जरुरी रहेको बताउनुभयो । सामन्तवाद विरोधी क्रान्ति नै गर्छु भन्नु गलत भएको भन्दै सामन्तवाद आधारभूत रूपमा अन्त्य भएको उहाँको भनाइ थियो । उहाँले समाजवादउन्मुख समृद्धि अहिलेको मूल कार्यक्रम र रणनीति बनाउनुपर्ने धारणा राख्नुभयो । ‘फेरि नयाँ जनवादी क्रान्ति गर्नुपर्छ कि भन्ने बहस पनि अहिले बाँकी हुनु दुःखदायी कुरा हो । किनभने क्रान्ति शुद्धतामा अगाडि बढ्दैन । नेपालमा सामन्तवादविरोधी क्रान्ति आधारभूत रूपमा सम्पन्न भयो कि भएन भनेर हेर्ने हो । त्यसको आदर्श मोडेल नयाँ जनवाद हो । जसको नेतृत्व कम्युनिष्ट, सर्वहारा वर्गले गर्छ र त्यसको प्रभुत्वमा त्यो समाजवादमा शान्तिपूर्ण रूपले सम्पन्न हुन्छ, त्यो नयाँ जनवाद हो । त्यही रूपमा यहाँ सम्पन्न हुन सकेन यो सत्य हो । हाम्रो क्रान्तिको आदर्श मोडेलमा नयाँ जनवाद थियो, अहिले नयाँ जनवादी क्रान्ति सम्पन्न भएर नेपालमा नयाँ जनवाद स्थापना भएको स्थिति होइन । त्यसो भनेर फेरि सामन्तवाद नै छ, सामन्तवादविरोधी क्रान्ति नै गर्छु भन्नु गलत कुरा हो । सामन्तवाद आधारभूत रूपमा अन्त्य भएको छ । त्यसका अवशेषहरू बाँकी छन्,’ उहाँले भन्नुभयो ।

अन्तरविरोध हुँदैमा नयाँ पार्टी गठन गर्ने कुरा राम्रो होइन : ज्ञवाली
नेकपा एमालेका उपाध्यक्ष युवराज ज्ञवालीले पार्टीभित्र अन्तरविरोध हुँदैमा नयाँ पार्टी गठन गर्ने कुरा राम्रो नभएको बताउनुभएको छ । एकदेव आलेको ५६औँ स्मृति दिवसमा आयोजित कार्यक्रमलाई सम्बोधन गर्दै ज्ञवालीले नेकपा एकीकृत समाजवादी अध्यक्ष माधवकुमार नेपालप्रति लक्षित गर्दै पार्टीमा अन्तरविरोध हुँदैमा पार्टी फुटाउनैपर्ने संकीर्ण सोचबाट मुक्त हुनुपर्ने धारणा राख्नुभयो । उहाँले सबै कम्युनिष्ट पार्टीहरूले समाजवादलाई एजेण्डा बनाएर अघि बढेको भए पनि एक ठाउँमा उभिन नसकेको उहाँको भनाइ थियो । ‘सबै कम्युनिष्ट पार्टीहरूले आफ्नो लक्ष्य समाजवाद भन्नुभएको छ । सबैका डकुमेन्ट राखेर पढ्ने हो भने समानता धेरै पाइन्छ । तर, जतिसुकै समानता भए पनि एकठाउँ किन बस्न सक्दैनौँ । नेपालमा कम्युनिष्टहरू आपसमा मिल्न नसक्ने के रहेछ ?,’ उहाँले प्रश्न गर्नुभयो ।

वामदेवको दुःखेसो
राष्ट्रियसभा सदस्य वामदेव गौतमले विपक्षी दलहरू नेकपा माओवादी केन्द्र र नेकपा एकीकृत समाजवादीले वर्तमान सरकारलाई दलाल सरकार भनेर आलोचना गर्नु दुःखद भएको बताउनुभएको छ । शनिबार काठमाडौंमा आयोजित एकदेव आलेको ५६औँ स्मृति दिवसको कार्यक्रमलाई सम्बोधन गर्दै उहाँले कांग्रेससँगै चुनाव लडेका दलले सरकारको आलोचान गर्न नमिल्ने तर्क गर्नुभयो । ‘आलोचना त गर्नुभयो यो सरकार दलाल सरकार हो भनेर,’ गौतमको भनाइ थियो, ‘तपाईं सरकारमा भएको भए के हुन्थ्यो ? तपाईंको पार्टी सरकारमा गएन । चुनावमा पनि त्यही कांग्रेससित मिलेर, सरकारमा पनि त्यही कांग्रेससित मिलेर । अनि कांग्रेस के हो ?, कम्युनिष्ट के हो ? भनेर बखान गर्नुहुन्छ, भत्भताउनु हुन्छ । त्यहाँ मिलेर आउनुहुन्छ । पाए अहिले पनि मिल्ने कोसिस छ ।’ उहाँले अब समाजवाद निर्माण गर्न लाग्नुपर्नेमा जोडसमेत दिनुभयो ।

बाहृय शक्तिको चलखेल : मैनाली
नेकपा मालेका महासचिव सिपी मैनालीले नेकपा एमाले र नेपाली कांग्रेसको सत्ता समीकरण भत्काउन बाहृय शक्ति लागेको आरोप लगाउनुभएको छ । एकदेव आलेको ५६औँ स्मृति दिवसमा आयोजित कार्यक्रमलाई सम्बोधन गर्दै मैनालीले नेकपा एमाले र नेपाली कांग्रेस मिलेको खण्डमा ०८४ सम्मै सरकार अघि बढ्ने भए पनि बाहृय शक्ति सरकार भत्काउन लागेको जिकिर गर्नुभएको हो । उहाँले अहिलेको सरकार भत्काउनका लागि बाहृय शक्तिलाई कतिपय देशभित्रका शक्तिहरूले पनि साथ दिइरहेको दाबी गर्नुभयो । उहाँले बाहृय शक्ति, अन्तरविरोध र दलाल पुँजीवाद, सामन्तवादी प्रवृत्तिको अन्त्य गर्न जरुरी रहेको उहाँको भनाइ थियो । ‘नेपाली कांग्रेस र नेकपा एमाले मिले भने त नढल्ला तर बाहृय शक्ति यिनीहरूलाई मिल्न नदिने भनेर लागिरहेको छ । देशभित्रका कतिपयले पनि त्यो बाहृय शक्तिको कुरामा च्याखे लगाइरहेका छन् । त्यसले गर्दा यति संख्याले बहुमत नै भए पनि सरकार ढल्न कुनै आइतबार लाग्दैन । किनभने बाहृय शक्ति अहिले हाबी छ । बाहृय शक्तिसँगको हाम्रो अन्तरविरोध र दलाल पुँजीवाद, सामन्तवादी प्रवृत्ति यो अहिलेको हाम्रो देशको विरोधी शक्ति हो,’ उहाँले भन्नुभयो । महासचिव मैनालीले कम्युनिष्टहरू बसेर आफूले गरेका कमी, कमजोरीहरूबारे छलफल गर्न जरुरी रहेको धारणा राख्नुभयो ।