पानी नपरेपछि किसानहरु चिन्तित

हिमालय टाइम्स

Tuesday February 18, 2025

Read Time = 3 mins

सिफारिस

न्याय, स्वास्थ्ययको प्रतीक गोर्खा र रजहर

डिजिटल संस्करण

प्रदेश समाचार

मधेश प्रदेश

A A- A+

रौतहट । हिउँदमा पानी नपरेपछि किसान चिन्तित बनेका छन् । गत असोजदेखि पानी नपरेको कारण बालीनालीमा प्रभाव देखिएको तथा मौसम पनि प्रतिकुल बनेको किसानहरुको भनाइ छ ।

पानी नपरेपछि हिउँदे बालीमा रोग र किरा देखिन थालेको छ । सिचाई गर्नुपर्ने भएकोले खेती महँगो हुने पनि किसानहरुको अनुमान छ । पानी नपरेपछि रौतहटका किसानले धमाधम गहुँबालीमा सिंचाइ गर्न थालेका छन् ।

गहुँको खेत सुख्खा भएको र गहुँले बाला दिने बेला भइसकेकोले अधिकांश आर्थिक रुपमा सक्षम किसानले गहुँबालीमा सिंचाई गर्न थालेका छन् । सिचाईको अभावमा गहुँखेतमा मुसाको आक्रमण बढी हुने, गहुँको बाला सुकेर गहुँ कमजोर हुने तथा उत्पादन नै कम हुने सम्भावना रहेकोले सिचाई गरिएको माधवनारायण नगरपालिका ४ का राम विनोद मुखियाको भनाइ छ ।

गहुँबालीमा दोहोरो सिंचाई गर्नु परेपछि खेती महँगो भएको किसानहरुको गुनासो छ । समयमा वर्षा नहुँदा गहुँको उत्पादन लागत बढेको छ ।

सिंचाइ गरेपछि थोरै भए पनि रासायनिक मल हाल्नुपर्ने भएकोले किसानहरुले खेती महँगो भएको प्रतिक्रिया दिएका हुन् ।

कटहरिया ५ का राम प्रवेश प्रसादले गहुँबाली निकै महँगो खेती भइसकेको बताउनुभयो । यही बेलामा सरकारले लगातार डिजेलको मूल्य बढाइरहेको तथा बिना डिजल सिचाई गर्न नसकिने भएकोले खेती महँगो हुँदै गएको उहाँको भनाइ छ ।

हिउँदमा पानी नपरेपछि तरकारी र दलहन बालीलाई पनि निकै खर्च गर्नु परेको किसानहरु बताउँछन् । कम्तीमा माघ महिनामा एकचोटि आकाशे पानी परेको भए मौसम पनि सफा हुने र हिउँदे बालीलाई पनि राम्रो हुने विश्वास गर्दछन् ।

हिउँदे बालीको मुख्य चार महिनासम्म पानी नपर्दा हिउँदे बालीको उत्पादन लागतमा निकै वृद्धि भएको किसानहरु बताउँछन् । पानी नपरेपछि रौतहटमा मसुरोको उत्पादन भने राम्रो हुने केही किसानहरुको भनाइ छ । विगतका वर्षहरुको तुलनामा यस वर्ष रौतहटमा मसुरो बाली निकै कम लगाइएको छ ।