८२ क्याम्पसमा स्ववियु अध्यक्ष निर्विरोध

काठमाडौं । त्रिभुवन विश्वविद्यालय (त्रिवि)अन्तर्गत स्वतन्त्र विद्यार्थी युनियन (स्ववियु) निर्वाचनका लागि आंगिक तथा सम्बन्धनप्राप्त क्याम्पसहरूमा सर्वसम्मत नेतृत्व चयनको प्रक्रिया तीव्र रूपमा अघि बढिरहेको छ । बुधबार साँझसम्म ८२ क्याम्पसमा स्ववियु सभापति सर्वसम्मत चयन भएका छन् । ३२ क्याम्पसमा एमालेनिकट अनेरास्ववियुका सभापतिका उम्मेदवार निर्विरोध निर्वाचित भएका छन् । अनेरास्ववियुका प्रवक्ता प्रकाश पौडेलका अनुसार, अहिलेसम्म ३२ क्याम्पसमा अनेरास्ववियुका उम्मेदवार सभापतिमा निर्विरोध निर्वाचित भएका छन् । यस्तै, दोस्रो स्थानमा कांग्रेसको विद्यार्थी संगठन नेविसंघ रहेको छ । नेविसंघ प्रवक्ता सुरज सेजुवालका अनुसार, २८ क्याम्पसमा नेविसंघका उम्मेदवार निर्विरोध निर्वाचित भएका छन् । तेस्रो स्थानमा माओवादी केन्द्रनिकट अखिल क्रान्तिकारी छ । २१ क्याम्पसमा आफ्ना सभापतिका उम्मेदवार निर्विरोध चयन भएको अखिल क्रान्तिकारीले जनाएको छ । नेकपा एकीकृत समाजवादीनिकट विद्यार्थी संगठन अनेरास्ववियूका एकजना उम्मेदवार मकवानपुरको मनहरि बहुमुखी क्याम्पसमा निर्विरोध सभापतिमा निर्वाचित भएका छन् ।

हालसम्म नेकपा एमाले निकटको विद्यार्थी संगठन अनेरास्ववियु सर्वसम्मत चयन हुनेमा पहिलो स्थानमा छ । अनेरास्ववियुले ३२ स्थानमा आफ्ना स्ववियु अध्यक्ष निर्विरोध चयन भएको छ । नेपाली कांग्रेसको भ्रातृ संस्था नेविसंघबाट २८ क्याम्पसमा र प्रमुख प्रतिपक्ष दल नेकपा माओवादी केन्द्रको विद्यार्थी संगठन अखिल (क्रान्तिकारी) बाट २१ जना स्ववियु अध्यक्ष निर्विरोध भएका छन् ।

एकीकृत समाजवादीनिकट विद्यार्थी संगठन अनेरास्ववियूले मकवानपुरस्थित मनहरी बहुमुखी क्याम्पसमा निर्विरोध अध्यक्ष प्राप्त गरेको छ । अनेरास्ववियुबाट कोशीमा चार, बागमतीमा आठ, गण्डकीमा तीन, लुम्बिनीमा सात, कर्णालीमा तीन र सुदूरपश्चिममा सात क्याम्पसमा स्ववियु अध्यक्ष सर्वसम्मत चयन भएका छन् ।

उपत्यकाका १० क्याम्पसको निर्वाचन अनिश्चित
त्रिभुवन विश्वविद्यालयअन्तर्गत काठमाडौं उपत्यकामा विभिन्न १० क्याम्पसमा स्वतन्त्र विद्यार्थी (स्ववियु) निर्वाचन अनिश्चित बनेको छ । सत्तापक्षीय र प्रतिपक्षीय दलका विद्यार्थी संगठनको तालाबन्दी र निर्वाचन समितिका निर्वाचन अधिकृतहरूले राजीनामा दिएकाले विश्वविद्यालयको केन्द्रीय क्याम्पससहितका १० वटामा निर्वाचन अनिश्चित बनेको हो । त्रिभुवन विश्वविद्यालयको केन्द्रीय क्याम्पस, पद्मकन्या बहुमुखी क्याम्पस, नेपाल ल क्याम्पस, शंकरदेव, विश्वभाषा, वाल्मीकि, कोटेश्वर, पब्लिक युथ, सरस्वती र पशुपति बहुमुखी क्याम्पसमा स्ववियु निर्वाचन अन्योलमा परेको छ । केन्द्रीय क्याम्पसमा नेपाली कांग्रेसको भ्रातृ संगठन नेपाल विद्यार्थी संघ (नेविसंघ)को एउटा समूहले तालाबन्दी गरेपछि स्ववियु निर्वाचन कार्यतालिका प्रभावित बनेको छ । पद्मकन्यामा निर्वाचन समितिका निर्वाचन अधिकृत डा. शैलेन्दुप्रकाश नेपालले राजीनामा दिएपछि स्ववियु निर्वाचन अनिश्चित बनेको हो । ल क्याम्पसमा सत्ताको नेतृत्व गरिरहेको नेकपा एमालेनिकट अखिल नेपाल स्वतन्त्र विद्यार्थी युनियन (अनेरास्ववियु)ले तालाबन्दी गरेको छ । अनेरास्ववियुले संगठन दर्ताका क्रममा क्रमसंख्या विवाद भएपछि तालाबन्दी गरेको हो ।

अनेरास्ववियु सहितका विभिन्न संगठनहरूको तालाबन्दी कारण शंकरदेवमा पनि स्ववियु निर्वाचन अनिश्चित भएको छ । उनीहरूले नेविसंघले तीन सय फर्जी विद्यार्थी भर्ना गरेर निर्वाचन प्रभावित गर्न खोजेको आरोप लगाएका छन् । यस्तै, प्रमुख प्रतिपक्षी नेकपा (माओवादी केन्द्र)निकट अखिल क्रान्तिकारीले विश्वभाषा र पशुपति क्याम्पसमा तालाबन्दी गरेपछि निर्वाचन कार्यतालिका प्रभावित भएको छ । अखिल क्रान्तिकारीले दुवै क्याम्पसहरूमा मतदान नामावलीमा प्रश्न उठाएको छ । विद्यार्थी संगठनहरूबीच समझदारी जुट्न नसक्दा वाल्मीकि संस्कृत विद्यापीठमा निर्वाचन प्रयोजनका लागि संगठन दर्ताको काम नै अवरुद्ध भएको छ । त्यस्तै, कोटेश्वर बहुमुखी क्याम्पसमा संगठनबीचको विवादका कारण मनोनयन दर्ता नै हुन सकेको छैन ।

देशभरका अधिकांश क्याम्पसमा मंगलबार उत्साह र शान्तिपूर्ण तरिकाले स्वतन्त्र विद्यार्थी युनियन (स्ववियु) को निर्वाचनको उम्मेदवारी दर्ता भएको थियो । समितिका संयोजक तथा त्रिभुवन विश्वविद्यालयका रेक्टर खड्ग केसीका अनुसार ६२ आंगिकमध्ये ५० भन्दा बढी क्याम्पसमा उम्मेदवारी दर्ता शान्तिपूर्ण तरिकाले भएका थिए ।

कार्यतालिकाअनुसार बिहीबार उम्मेदवारी फिर्तासहित अन्तिम नामावली प्रकाशन र चैत ५ गते स्ववियु निर्वाचन हुनेछ । काठमाडौं उपत्यकाका २२ मध्ये पाँचवटा क्याम्पसमा उम्मेदवारी दर्ताको प्रक्रिया अवरुद्ध बनेको निर्वाचन समितिका सदस्यसचिव पशुपति अधिकारीले जनाउनुभयो । उहाँका अनुसार नेपाल ल, पद्मकन्या, सरस्वती, पब्लिक युथ र विश्वभाषा क्याम्पसमा निर्वाचन प्रक्रिया अघि बढ्न नसकेको हो । शंकरदेव र आयुर्वेद क्याम्पसमा मतदाता संख्यामा विवाद देखिए पनि समाधान गरेर ढिला गरी प्रक्रिया थालिएको निर्वाचन समितिहरूले जनाएका छन् । शंकरदेवमा तालाबन्दीको कारण अनलाइन उम्मेदवारीको व्यवस्था गरिएको क्याम्पसले जनाएको छ ।

यसअघि २०७९ मा पनि सबै क्याम्पसमा स्ववियु निर्वाचन हुन सकेको थिएन । निर्वाचनमा भाग लिन केन्द्रीय निर्वाचन समितिमा २५ विद्यार्थी संगठन दर्ता भएका छन् । स्ववियु निर्वाचनमा उम्मेदवार बन्न २८ वर्ष नपुगेको उमेरको हद तोकिएको छ । स्ववियु अध्यक्ष, सचिव, कोषाध्यक्ष र केही सदस्य प्रत्यक्ष निर्वाचन प्रणालीबाट निर्वाचित हुनेछन् भने उपाध्यक्ष, सहसचिव र केही सदस्य समानुपातिक निर्वाचन प्रणालीअनुसार निर्वाचित हुनेछन् । क्याम्पसमा रहेका विद्यार्थी मतदाताको संख्याका आधारमा स्ववियुको कार्यसमितिको संख्या कायम हुने व्यवस्था गरिएको छ । निर्वाचनका लागि त्रिविले आचारसंहितासमेत जारी गरेको छ । क्याम्पस हाताभित्र भित्तेलेखन, माइक प्रयोग, तुल फ्लेक्स तथा पोष्टर टाँस्न निषेध गरिएको आचारसंहितामा उल्लेख छ । घोषणापत्र र उम्मेदवारको नामावली पर्चा भने एकैरङ र साइजको कागजमा प्रचारप्रसार गर्न पाइने व्यवस्था गरिएको छ । यसपटक निर्वाचनको पर्यवेक्षण गर्ने व्यवस्थासमेत मिलाइएको छ ।