नेपाल पत्रकार मञ्चको महाधिवेशनमा दर्जन बढीलाई पुरस्कार एवं सम्मान प्रदान

ललितपुर । नेपाल पत्रकार मञ्चले पत्रकार, सञ्चारकर्मी तथा विभिन्न व्यक्तित्वलाई सम्मान एवं पुरस्कार अर्पण गरेको छ ।
मञ्चको सातौं महाधिवेशनको अवसरमा आयोजित विशेष समारोहमा चार महिला पत्रकारसहित १५ जना पत्रकार, सञ्चारकर्मी तथा व्यक्तित्वहरूलाई पुरस्कार र सम्मान अर्पण गरिएको हो । ललितपुरस्थित डिलाइट पार्टी भेन्यूको सभाहलमा सम्पन्न कार्यक्रममा पत्रकारितामा सक्रिय योगदान दिने विशिष्ट व्यक्तित्वलाई नगदसहित सम्मान गरिएको थियो ।

कार्यक्रममा ‘क्रियाशील पत्रकारिता पुरस्कार’ नेपाल टेलिभिजनकी नायब महाप्रबन्धक आरती चटौतलाई प्रदान गरिएको थियो । उहाँलाई २५ हजार नगद राशिसहित सम्मान गरिएको थियो । त्यस्तै ‘प्रताप स्मृति पत्रकारिता पुरस्कार’ अन्नपूर्ण पोष्ट दैनिककी समाचार सम्पादक रामकला खड्कालाई प्रदान गरिएको थियो । उहाँलाई १५ हजार नगद राशीसहित सम्मान गरिएको थियो । ‘बल्लभ भण्डारी स्मृति पत्रकारिता पुरस्कार’ न्यूज २४ मा कार्यरत टंककला तिमिल्सेनालाई प्रदान गरिएको थियो । उहाँलाई पाँच हजार १११ नगद रुपैयाँसहित सम्मान अर्पण गरिएको थियो । त्यस्तै महिला प्रकाशक सीतादेवी श्रेष्ठलाई लामो समयदेखि पत्रकारितासम्बद्ध प्रकाशन क्षेत्रमा योगदान पुर्‍याएको भन्दै विशेष सम्मान प्रदान गरियो । श्रेष्ठ मध्याहृन दैनिकको प्रकाशक हुनुहुन्छ ।

कार्यक्रममा अन्य पत्रकार तथा सञ्चारकर्मीलाई पनि नगदसहित सम्मान गरिएको थियो । चन्द्रसूर्यवाणी डटकम तथा क्राइम चेक साप्ताहिकका सम्पादक सन्तोषकुमार मिश्रलाई गौरीनारायण श्रेष्ठ मध्याहृन पत्रकारिता पुरस्कार प्रदान गरिएको थियो । उहाँलाई ११ हजार १११ नगद रुपैयाँसहित सम्मान गरिएको थियो ।

यस्तै, अन्नपूर्ण टाइम्सका सम्पादक तथा नेपाल फोटो पत्रकार समूहका महासचिव घनश्याम श्रेष्ठलाई डा.चुडाबहादुर श्रेष्ठ स्मृति पत्रकारिता पुरस्कार प्रदान गरिएको थियो । उहाँलाई पाँच हजार १११ नगद रुपैयाँसहित सम्मान गरिएको थियो । यसैगरी चेतनराज पाण्डेलाई नाजिर उद्दीन मियाँ स्मृति पत्रकारिता पुरस्कार प्रदान गरिएको थियो भने जनमत दैनिकका प्रदेश प्रमुख लक्ष्मण यादव, पत्रकार शिरोमणि दवाडी, संस्थापक महासचिव बैकुण्ठ भण्डारी, गिरिजाप्रसाद अधिकारी, सामुदायिक रेडियो प्रशारक संघ (अकोराव)का उपाध्यक्ष नविनरसिंह नेपाली, गैरसरकारी संस्था महासंघका उपमहासचिव किरण थापा, क्यानका उपाध्यक्ष चिरञ्जीवी अधिकारी, मोबाइल वितरक संघका अध्यक्ष रघुनाथ त्रिपाठी (गृहनाथ) र सामाजिक अभियन्ता डा.पियारत्न महर्जनलाई दोसल्ला र सम्मानपत्र प्रदान अर्पण गरिएको थियो ।

प्रतिनिधिसभा सदस्य तथा पूर्वमन्त्री उदयशमशेर राणाको प्रमुख आतिथ्यमा भएको कार्यक्रममा बागमती प्रदेशका युवा तथा खेलकुद मन्त्री मीनकृष्ण महर्जन, नेपाल पत्रकार महासंघका महासचिव रामप्रसाद दाहाल, संघका उपाध्यक्ष विपिन आचार्य, कार्यक्रम संयोजक युवराज विद्रोही, महासचिव विमल थापा, उपाध्यक्ष चन्द्रमणि भट्टराईलगायतले आ–आफ्ना भनाइ राख्नुभएको थियो ।

महाधिवेशनले आगामी कार्यकालका लागि युवराज विद्रोहीको अध्यक्षतामा १७ सदस्यीय नयाँ नेतृत्व चयन गरेको छ । जसअनुसार उपाध्यक्षमा विमल थापा, महासचिव रघु त्रिपाठी, कोषाध्यक्ष गीता थापा, सचिवहरूमा प्रितम सागर कर्माचार्य, सन्तोष मिश्र, कमला नेपाल निर्विरोध निर्वाचित हुनुभएको छ । यस्तै सदस्यहरूमा प्रज्ज्वल थापा, जितेन्द्र श्रेष्ठ (जेन), श्री श्यामबाबु आचार्य, टंककला तिमल्सिना, सुशीला गौतम, अञ्जु श्रेष्ठ, लक्ष्मी भट्ट, केशव बस्नेत, केशवराज पौडेल र मिलन थापा रहनुभएको छ ।