एकताको सन्देश दिँदै एकै मञ्चमा राजसंस्था पक्षधर

काठमाडौं । राष्ट्रिय प्रजातन्त्र पार्टी नेपालले सोमबार रत्नपार्कको शान्ति बाटिकामा आयोजना गरेको सभाले राजावादी आन्दोलनमा ‘अभूतपूर्व’ एकताको सन्देश दिएको छ । लामो समयदेखि विभाजित रहेका राजावादी धारका प्रमुख नेताहरू पहिलोपटक एउटै मञ्चमा उभिएर एकताको प्रतिबद्धता जनाएका छन् । कमल थापाको निम्तोमा राप्रपा अध्यक्ष राजेन्द्र लिङ्देन सभाको अन्तिम चरणमा रत्नपार्क पुग्नुभएको थियो । लिङ्देन आउनासाथ उहाँले छोटो सम्बोधन गर्नुभयोे र तल झर्नुभयो । त्यसपछि कमल थापाले आफ्ना चोटिलो अभिव्यक्तिमार्फत माहोललाई थप रोचक बनाउनुभयो । भाषण सकिएपछि थापाले सबै प्रमुख नेताहरूलाई पुनः मञ्चमा बोलाउनुभयो । थापाले सबैभन्दा पहिले राजेन्द्र लिङ्देनलाई निम्त्याउँदै भन्नुभयोे, ‘हामी सबै एक छौँ र एक रहनेछौँ भन्ने सन्देश दिनका लागि म आग्रह गर्न चाहन्छु राप्रपाका अध्यक्ष माननीय राजेन्द्र लिङ्देनलाई मञ्चमा आइदिन आग्रह गर्दछु ।’

लिङ्देन मञ्चमा उक्लिनुभयो, हाँस्दै हात हल्लाउनुभयो र थापासँग हात समातेर उचाल्नुभयो । त्यसपछि नवराज सुवेदी, केशरबहादुर विष्ट, बिपी कांग्रेसका महामन्त्री देवेन्द्र पौडेल र शिवसेना नेपालकी उपाध्यक्ष गंगा चौधरी समेतको मञ्चमा उपस्थिति थियो । सबै नेताहरूले एक-अर्काको हात समातेर एकताको सन्देश प्रकट गरे । कार्यक्रममा थापाले राप्रपाको खुलेर प्रशंसा गर्दै भन्नुभयो, ‘राप्रपा अहिले देशको सबैभन्दा ठूलो र बलियो राष्ट्रवादी शक्ति हो । सबैलाई समेटेर अघि बढ्नुपर्ने जिम्मेवारी राप्रपाले लिनुपर्छ र त्यसका लागि माननीय राजेन्द्र लिङ्देनजी अगाडि बढ्नुपर्छ ।’

दुवै नेताले एकढिक्का भएर अघि बढ्नुपर्नेमा जोड दिएका थिए । गत २५ फागुनमा पूर्वराजा ज्ञानेन्द्र शाहको स्वागतमा देखिएको राजावादी उत्साह र १५ चैतको तीनकुने प्रदर्शनपछि केही कमजोर बनेको आन्दोलनलाई पुनः सशक्त बनाउने उद्देश्यले यो सभा आयोजना गरिएको हो । सभामा राप्रपाका वरिष्ठ नेता धवलशमशेर राणा, महामन्त्री कुन्ती शाही, जनआन्दोलन समिति संयोजक नवराज सुवेदी, पञ्चायतकालीन नेता केशरबहादुर विष्टलगायत नेताहरूको उल्लेख्य उपस्थिति थियो । सबैले एक भएर अगाडि बढ्ने संकल्प व्यक्त गरेका छन् । नेताहरूको एकताको सन्देशले राजसंस्था समर्थक पनि उत्साहित भएका छन् ।

लोकतन्त्रका नाममा निरंकुशता र लुटतन्त्र हाबी : लिङ्देन
राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङ्देनले लोकतन्त्रका नाममा हाल देशमा निरंकुशता र लुटतन्त्र हाबी भएको आरोप लगाउनुभएको छ । सोमबार (वैशाख १५) काठमाडौंमा राप्रपा नेपालले आयोजना गरेको कार्यक्रममा उहाँले यस्तो आरोप लगाउनुभएको हो । ‘अहिले प्रजातन्त्र, लोकतन्त्रको नाममा देशमा जुन प्रकारको निरंकुशता र लुटतन्त्र हाबी भइरहेको छ, त्यसको अन्त्यको लागि हामीबाहेक अर्को विकल्प र शक्ति छैन । सिंगो देशले हामीलाई आशाको नजरले हेरिरहेको छ,’ उहाँले भन्नुभयो । उहाँले सबै प्रकारका आग्रह–पूर्वाग्रह त्यागेर देशलाई निकास दिन तयार हुनुपर्नेमा जोड दिनुभयो । यसका निम्ति आफ्नो पार्टी तयार रहेको उहाँले बताउनुभयो । ‘राजसंस्थाको आवाज उठाउने हाम्रा साथीहरूलाई खोजीखोजी कस्टडीमा राखिएको छ । लोकतन्त्र र मानव अधिकारको कुरा गर्नेहरूले चैत १५ गते लोकतन्त्र र मानव अधिकारको खिल्ली उडाए,’ उहाँले भन्नुभयो । अलोकतान्त्रिक र मानव अधिकारविरोधी गतिविधिका विरुद्धमा सशक्त गतिविधि अघि बढाउन जरुरी रहेको उहाँको भनाइ थियो । ‘लोकतन्त्रको नामको लुटतन्त्रको विरुद्धमा जुटौँ । चैत १५ गतेको घटनाको न्यायिक छानविनको लागि सशक्त आवाज उठाऔँ,’ लिङ्देनले भन्नुभयो । राजसंस्था र हिन्दूराष्ट्र पुनःस्थापना र संघीयता खारेजका पक्षमा गरिने सबै कार्यक्रममा राप्रपाले ऐक्यबद्धता जनाउने उहाँले बताउनुभयो ।

हिन्दूराष्ट्र र राजसंस्थाको माहोल बन्यो, अन्तिम धक्का बाँकी : थापा
राप्रपा नेपालका अध्यक्ष कमल थापाले देशमा हिन्दूराष्ट्र र राजसंस्था स्थापनाका निम्ति माहोल बनेको बताउनुभएको छ । सोमबार काठमाडौंमा आयोजित प्रदर्शनमा उहाँले ‘अन्तिम धक्का’ आवश्यक रहेकामा जोड दिनुभयो । ‘हिन्दूराष्ट्र र राजसंस्था स्थापना हुने माहोल बन्दै गइरहेको छ । जनता स्वस्फूर्त आइरहेका छन् । हाम्रो संगठनात्मक प्रयासबाट भन्दा पनि एकातिर गणतन्त्र पक्षधरको असफलता र अर्कोतर्फ हिन्दूराष्ट्र र राजसंस्थाको लोकप्रियताले गर्दा माहोल तयार भइसकेको छ । अन्तिम धक्काको मात्रै आवश्यकता छ,’ उहाँले भन्नुभयो । उहाँले गणतन्त्रवादीले राज्यशक्तिको दुरुपयोग गरेको, हिन्दूराष्ट्र र राजसंस्था पक्षधरलाई दबाउन खोजेको आरोप लगाउनुभयो । आफूहरूले निरंकुश व्यवस्था नभनेको उहाँले जिकिर गर्नुभयो । उहाँले आफूहरू राजासहितको प्रजातन्त्रको मान्यतामा रहेको बताउनुभयो । जनताका अनुहारमा हाँसो ल्याउन सके मात्र मूल्य-मान्यताको रक्षा हुने उहाँको भनाइ थियो । उहाँले पूर्वराजाको बदनाम गरिएको, राजसंस्था समर्थक नेता-कार्यकर्तामाथि झुटा मुद्दा लगाइएको जिकिर गर्नुभयो । विचारलाई निषेध गर्ने गरी कानुन बनाउन लागेको भन्दै उहाँले आपत्ति जनाउनुभयो ।

तीनकुने घटना सरकारको निर्दयी, क्रूर र तानाशाही कदम : सुवेदी
राजतन्त्र र हिन्दूराष्ट्र फर्काउने उद्देश्यले गठित संयुक्त जनआन्दोलन समितिका संयोजक नवराज सुवेदीले एक महिनाअघि काठमाडौंको तीनकुनेमा भएको घटनालाई सरकारको तानाशाही कदम भएको बताउनुभएको छ । राष्ट्रिय प्रजातन्त्र पार्टी (राप्रपा), नेपालले सोमबार काठमाडौंको रत्नपार्कमा आयोजना गरेको कार्यक्रममा उहाँले तीनकुनेमा सरकारले निर्दयी, क्रूर, तानाशाही कदम चालेको बताउनुभयो ।

‘तीनकुनेमा एक महिनाअघि जुन घटना घट्यो, त्यो निर्दयी, क्रूर, तानाशाही यो सरकारको कदम थियो,’ सुवेदीले भन्नुभयोे, ‘कार्यक्रम सुरु हुनुभन्दा पहिले राष्ट्रिय गान बजाइँदै थियो, अन्धाधुन्द गोली चलाइयो, टियर ग्यास हानियो ।’ सुवेदीले राजावादी टुटफुट नभएको दाबी पनि गर्नुभयो । राजावादी र हिन्दूवादी सबै एक भएको उहाँले जनाउनुभयो । उहाँले बन्दीहरूलाई तत्काल रिहा गर्न मागसमेत गर्नुभयो । सरकारले नेपाली जनताको मुखमा ताल्चा लगाउन ऐन बनाउन खोजिरहेको जनाउँदै उहाँले त्यसको विरोध गर्न आफूहरू जम्मा भएको बताउनुभयो ।