एन्फाको वार्षिक क्यालेन्डर सार्वजनिक

काठमाडौं । अखिल नेपाल फुटबल संघ (एन्फा)ले सन् २०२५ का लागि राष्ट्रिय तथा अन्तर्राष्ट्रिय फुटबल र फूटसल प्रतियोगिता समावेश गर्दै वार्षिक क्यालेन्डर सार्वजनिक गरेको छ । काभ्रेको धुलिखेलमा शुक्रबार भएको एन्फा साधारण सभाले क्यालेन्डर पारित गरेको हो । वर्षभरी घरेलु फुटबल प्रतियोगितालाई व्यस्त राख्ने गरी एन्फाले वार्षिक क्यालेन्डर तयार गरेको छ ।

पुरुष फुटबलतर्फ फिफा इन्टरनेशनल विन्डोअन्तर्गत नेपालले मार्च २१ मा सिंगापुरसँग मैत्रीपूर्ण खेल खेल्ने छ । त्यसपछिको मार्च २५ मा मलेसियाविरुद्ध एएफसी एसियन कप छनोट खेल हुनेछ । यी दुवै खेलहरू भइसकेका छन् । जुन १० मा नेपालले लाओससँग एसियन कप छनोटको अर्को खेल खेल्नेछ ।

सेप्टेम्बर १ देखि ९ सम्म मैत्रीपूर्ण खेलहरू हुनेछन् भने अक्टोबर ९ मा नेपालले भियतनामसँग र अक्टोबर १४ मा पुनः भियतनामसँग दोस्रो खेल खेल्नेछ । नोभेम्बर १८ मा नेपालले मलेसियासँग प्रतिस्पर्धा गर्नेछ भने मार्च ३१, २०२६ मा नेपालले लाओससँग खेल्ने तालिका छ । महिला फुटबलतर्फ फिफा विन्डोअन्तर्गत मार्च ३१-अप्रिल ८, मे २६-जुन ३, अक्टोबर २०-२८ र नोभेम्बर २४-डिसेम्बर २१ भित्र दुईवटा मैत्रीपूर्ण खेल र त्रिकोणात्मक प्रतियोगिता हुने उल्लेख गरिएको छ ।

चिनियाँ नयाँ वर्षको अवसरमा फेब्रुवरी १० मा नेपाल र चीनबीच मैत्रीपूर्ण खेल हुनेछ । युवास्तरमा २०२५ को साफ यू-१९ पुरुष च्याम्पियनसिप श्रीलंकामा मे ८ देखि १८ सम्म हुनेछ । त्यसैगरी साफ च्याम्पियनसिप २०२५ असार/श्रावण महिनामा भारतमा आयोजना हुनेछ । उक्त प्रतियोगिता एएफसी एसियन कप २०२६, फिफा महिला विश्वकप २०२७ (ब्राजिल) र ओलम्पिक छनोट २०२८ (अमेरिका)को तयारीसँग पनि सम्बन्धित हुनेछ ।

 एन्फाको यो वर्षको बजेट एक अर्ब ५६ करोड ।

‘ए’ डिभिजन लिग पुसमा हुने

 महिला फ्रेन्चाइज लिग मंसिरमा

पहिलोपल्ट महिला फुटसल च्याम्पियनसिप आयोजना गर्ने

महिला लिग तीन महिना चल्ने

साफ यू-२० महिला च्याम्पियनसिप २०२५ जुलाई १ देखि ११ सम्म बंगलादेशमा हुनेछ । यस्तै अन्य प्रतियोगिताहरूमा एएफसी यू-२० महिला एसियन कप छनोट, एएफसी यू-१७ महिला तथा पुरुष एसियन कप छनोट, साफ यू-१७ महिला तथा पुरुष च्याम्पियनसिप, एएफसी यू-२३ एसियन कप (साउदी अरब, सेप्टेम्बर १-९) लगायत मितिहरू समावेश गरिएको छ ।

त्यस्तै घरेलु फुटबल तथा फुटसल प्रतियोगिताको वार्षिक कार्यतालिका पनि सार्वजनिक गरेको छ । सार्वजनिक तालिका अनुसार विभिन्न उमेर समूह, लिग तथा विद्यालयस्तरीय प्रतियोगिताहरूको आयोजनाको तयारी गरिएको छ ।

एन्फाले सुरुमा एन्फा प्रेसिडेण्ट लिग २०२५ को आयोजना ५ जेठदेखि २४ जेठ २०८१ (१८ मे-७ जुन २०२५) सम्म गर्ने घोषणा गरेको छ । यो प्रतियोगितामा सातवटै प्रदेशका लिग च्याम्पियनहरू समावेश हुनेछन् । त्यसैगरी, एन्फा कप लिग कम नकआउट फुटबल च्याम्पियनसिप २० वैशाखदेखि ३ जेठ २०८२ सम्म ‘ए’ डिभिजन क्लबहरूको सहभागितामा सञ्चालन हुनेछ ।

विद्यालय तहका खेलहरूमा पनि विशेष ध्यान दिइएको छ । यू-१४ र यू-१७ पुरुष तथा यू-१४ र यू-१६ महिला अन्तर विद्यालय जिल्लास्तरीय प्रतियोगिता १० वैशाखदेखि १० जेठ २०८२ सम्म देशभरिका ४९ जिल्लामा सञ्चालन गरिनेछ । त्यसपछि, जिल्ला विजेताबीच ५ भदौदेखि २५ भदौसम्म प्रदेशस्तरीय प्रतियोगिता हुनेछ भने, त्यसपछि २२ असोजदेखि ३१ असोजसम्म राष्ट्रिय प्रतियोगिता आयोजना गरिनेछ ।

राष्ट्रिय लिग २०२५ को आयोजना १९ श्रावणदेखि १० असोज २०८१ (४ अगस्ट-२६ सेप्टेम्बर २०२५) सम्म गरिनेछ । त्यसबाहेक, क्लबस्तरका प्रतिष्ठित लिगहरूमा शहीद स्मारक ‘सी’ डिभिजन लिग ६ पुष २०८१ देखि १५ फाल्गुन २०८२ सम्म, ‘ए’ डिभिजन लिग १६ डिसेम्बर २०२५ देखि १४ जुन २०२६ सम्म, र ‘बी’ डिभिजन लिग ४ मार्च २०२६ देखि १४ मे २०२६ सम्म सञ्चालन हुनेछ ।

महिला तथा यूथ फुटबलमा पनि विविध कार्यक्रम समावेश गरिएको छ । महिला लिग २०२५ ७ सेप्टेम्बरदेखि २४ मंसिर २०८२ सम्म हुनेछ भने, महिला लिगको छनोट चरण १ असारदेखि १६ असारसम्म सञ्चालन हुनेछ । यसैगरी, यू १४ र यू १७ महिला लिग, यू१६ र यू१८ पुरुष लिग, तथा ललित स्मारक यू १८ लिग समेत तालिकामा समावेश छन् ।

फुटसलतर्फ पनि एन्फाले यो वर्ष पनि विशेष सक्रियता देखाएको छ । फुटसल लिग क्वालिफायर २०२५ को पहिलो राउण्ड २७ अप्रिलदेखि १५ मेसम्म, र दोस्रो राउण्ड २० मेदेखि ५ जुनसम्म सञ्चालन हुनेछ । यी चरणहरूमा उत्कृष्ट प्रदर्शन गर्ने टिमहरू ‘ए’ डिभिजन फुटसल लिग (मध्य जुलाईदेखि मध्य अगस्ट २०२५) मा सहभागी हुनेछन् । त्यसैगरी, एन्फा अन्तर कलेज फुटसल च्याम्पियनसिप २०२५ २ नोभेम्बरदेखि २७ नोभेम्बरसम्म र महिला फुटसल च्याम्पियनसिप मंसिरको मध्यतिर आयोजना गरिनेछ । यी दुवै प्रतियोगिता काठमाडौंमा आयोजना गरिनेछ ।

साधारणसभाले नयाँ बजेट पनि अनुमोदन गरेको छ । एन्फाको यो वर्षको बजेट एक अर्ब ५६ करोड रहेको छ । यो गत वर्षको भन्दा बढी रकम हो । गत वर्षको फिफा र एएफसीको भौतिक पूर्वाधारको खर्च गर्न नसकेको बजेटलाई यो वर्ष निरन्तरता दिने र सो बजेट समेत जोडिँदा बजेटको आकार ठूलो भएको एन्फा प्रवक्ता सुरेश शाहले जानकारी गराउनुभयो ।

अघिल्लो वर्षको फिफाबाट प्राप्त अनुदानमध्ये पूर्वाधारतर्फको ४७ करोड ७६ लाख ७१ हजार ५४२ रुपैयाँ बजेट यो पटकलाई सारिएको पनि प्रवक्ता शाहले बताउनुभयो । अघिल्लो आर्थिक वर्षमा एन्फाको बजेट एक अर्ब ३२ करोड रुपैयाँको हाराहारीमा रहेको थियो ।

एन्फा अध्यक्ष पंकज विक्रम नेम्वाङले पेश गरेको २०२५ को वार्षिक कार्यक्रमलाई साधारणसभाले पारित गरेको प्रवक्ता शाहले जानकारी दिनुभयो । यो कार्यक्रमलाई एन्फाले वार्षिक क्यालेन्डर भनेको छ । २०२५ का लागि पुरुष, महिला युवा लगायतको कुल १६ कार्यक्रम छ । जसमा एन्फाले आयोजना गर्न नसकेको लिग कम नकआउट पनि सामेल छ ।