
काठमाडौं । राजसंस्था पुनःस्थापना पक्षधर आगामी जेठ १५ गते काठमाडौंमा हुने प्रदर्शनको तयारीमा जुटेका छन् । राजसंस्था पुनःस्थापना गर्न गठित संयुक्त जनआन्दोलन समितिले प्रदर्शनमा सहभागी हुन आहृवान गरेको छ । प्रदर्शनमा सहभागी हुन काठमाडौं उपत्यका बाहिरका जनतालाई पनि आहृवान गर्ने निर्णय गरेको हो । समितिका संयोजक नवराज सुवेदीको संयोजकत्वमा आइतबार बसेको बैठकले जेठ १५ गतेको प्रदर्शनमा सहभागी हुन उपत्यका बाहिरका जनतालाई पनि आहृवान गर्ने निर्णय गरेको हो । बैठकमा राष्ट्रिय प्रजातन्त्र पार्टी (राप्रपा) अध्यक्ष राजेन्द्र लिङ्देन, राप्रपा, नेपालका अध्यक्ष कमल थापा लगायतको उपस्थिति थियो । जनआन्दोलन समितिले यसअघि नै जेठ १५ गते काठमाडौंमा प्रदर्शन गर्ने घोषणा गरिसकेको थियो । ‘जेठ १५ गतेको आन्दोलनमा सहभागी हुन काठमाडौं बाहिरका जनतालाई काठमाडौं आउन आहृवान गर्ने,’ समितिको निर्णयमा भनिएको छ, ‘काठमाडौंका जनता र सबै वर्ग, पेसा र समुदायलाई सक्रिय सहभागिताका लागि आहृवान गर्ने ।’ आन्दोलन पूर्णतया शान्तिपूर्ण रहने समितिले जनाएको छ ।
समितिले आफूहरूको प्रदर्शनको अनुगमन गर्न राष्ट्रिय मानव अधिकार आयोगलाई आग्रह गर्ने निर्णय पनि भएको संयोजक सुवेदीले जारी गरेको विज्ञप्तिमा उल्लेख छ । विचार र अभिव्यक्ति स्वतन्त्रता निषेध गर्न कानुन बनाउने सरकारको तयारीको विरोध गर्ने निर्णय पनि बैठकले गरेको छ । तीनकुने घटनामा पक्राउ परेकाहरूलाई तत्काल रिहाइको माग गर्ने निर्णय पनि समितिले गरेको छ ।
यस्तै, संवैधानिक राजसंस्था र सनातन हिन्दू अधिराज्यप्रति आस्था राख्ने प्रबुद्ध व्यक्तिहरूको भेला जेठ ६ गते गर्ने तथा काठमाडौं उपत्यकाका तीनै जिल्लाका आम जनतालाई आन्दोलनमा सहभागी हुन आहृवान र जागृत गर्ने उद्देश्यका साथ जेठ ८, ९, १० र ११ गते काठमाडौं उपत्यका जनजागरण यात्रा गर्ने निर्णयसमेत भएको छ । यात्राको शुभारम्भ काठमाडौंको साँखुमा जेठ ८ गते गर्ने र जेठ ११ गते चाँगुनारायणमा समापन गर्ने तय भएको सुवेदीले बताउनुभयो । यस्तै, जेठ १३ गते बृहत् युवा स्वयंसेवक भेला गर्ने तथा आन्दोलनमा काठमाडौं बाहिरका जनताको व्यापक सहभागिता जुटाउने गरी आवश्यक तयारी गर्ने निर्णयसमेत भएको छ ।
संयुक्त जनआन्दोलन समितिले राजसंस्था पुनःस्थापनाको आन्दोलनलाई सफल बनाउन गाउँगाउँबाट सुझाव लिने भएको छ । संयुक्त जनआन्दोलन समितिको आइतबार बसेको बैठकले आगामी जेठ १५ गतेदेखि सुरु हुने राजसंस्था पुनःस्थापनाको आन्दोलन सफल बनाउन सुझाव लिने निर्णय गरेको हो । यस्तै, संयुक्त जनआन्दोलन समितिमा आबद्ध दल, संघसंस्था, अभियन्ताहरूले आपसी समझदारीमा जेठ ७ गतेभित्र जिल्ला, पालिकाहरूमा ‘संयुक्त आन्दोलन समिति’ गठन गर्न आहृवान गर्ने पनि निर्णय गरेको छ ।
राजसंस्था फर्काउने वातावरण अनुकूल बन्दै गएको छ : सुवेदी
राजसंस्था पुनःस्थापना गर्न गठित संयुक्त जनआन्दोलन समितिका संयोजक नवराज सुवेदीले राजसंस्था फर्काउने अभियानको वातावरण अनुकूल बन्दै गएको ब्रिफिङ गर्नुभएको छ । आइतबार बसेको समितिको बैठकमा वातावरण अनुकूल भएकाले सबै मिलेर आन्दोलन सफल बनाउनुपर्ने उहाँले बताउनुभयो । ‘वातावरण अत्यन्त अनुकूल भएको छ । अब सबै मिलेर आन्दोलन सफल बनाउनु पर्दछ,’ उहाँले भन्नुभयो, ‘संवैधानिक राजसंस्था र सनातन हिन्दू अधिराज्य पुनःस्थापना हुने सम्भावना बलियो भएको छ ।’ सुवेदीले आन्दोलन घोषणा सभापछि पहिलोपटक सबै राष्ट्रवादी शक्तिहरू एकै ठाउँमा उभिएको सन्देश गएको उहाँको भनाइ थियो ।
फेरि अर्को बेलुनमा हावा भर्ने दुःस्साहस नगरियोस् : प्रचण्ड
नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले जेठ १५ गते अर्को बेलुनमा हावा भर्ने दुःस्साहस नगर्न राजसंस्थावादीलाई चेतावनी दिनुभएको छ । किराती र लिम्बूवान राष्ट्रिय मुक्ति मोर्चा, नेपालको संयुक्त राष्ट्रिय सम्मेलन उद्घाटन समारोहलाई सम्बोधन गर्ने क्रममा उहाँले ‘खबरदार’ भन्दै राजावादीहरूलाई आन्दोलनमा नउत्रन चेतावनी दिनुभएको हो । ‘सुनारको सय चोट, लोहारको एकै चोट भनेजस्तो एक चोट हामीले हानेपछि उनीहरूको बेलुन फुटेको छ,’ प्रचण्डले भन्नुभयो, ‘अहिले फेरि अर्को बेलुनमा हावा भर्ने रे जेठ १५ गतेदेखि । खबरदार, त्यो हुनेवाला छैन ।’
नेपालका उत्पीडित, वर्ग, जाति, क्षेत्र समुदाय, जो पहिचान र अधिकारको चेतनाद्वारा जागेको र कसैले पनि जागेको शक्तिलाई रोक्न नसक्ने उहाँको भनाइ थियो । ‘नेपालका उत्पीडित, वर्ग, जाति, क्षेत्र समुदाय, जो पहिचान र अधिकारको चेतनाद्वारा जागेका छन्, जागेका जनतालाई कुनै शक्तिले पनि रोक्नसक्ने छैन,’ उहाँले भन्नुभयो, ‘नेपाली जनता विजयी हुनेछन् । त्यो दुःस्साहस नगर्न चेतावनी दिन चाहन्छु, कथित राजावादीहरूलाई ।’ गत चैत १५ गते काठमाडौंको तीनकुनेमा भएको प्रदर्शनले राजावादीहरू अझै उस्तै हत्यातर्फ नै उद्धत देखिएको प्रचण्डले आरोप लगाउनुभयो । ‘तीनकुनेमा राजावादीहरूको एउटा वितण्डा देखियो । मैले त त्यतिबेलै भने १२ वर्ष कुकुरको पुच्छर ढुंग्रामा राखे पनि बांगाको बांगै भनेजस्तो । ती हत्यारा, मण्डले गुण्डाहरू अहिले पनि उही मण्डले गुण्डागर्दी हत्या, आतंकमा नै गए,’ उहाँले भन्नुभयो, ‘त्यसकारण जनतालाई छर्लंग भयो । देशभरी के हो राजावादीको कथित आन्दोलन भनेको के हो ? माओवादीलगायत समाजवादीहरूले गणतन्त्र र समाजवादको पक्षमा जाने भएको के हो ?’ प्रचण्डले राप्रपाका सांसदलाई नक्कली राजाको कुरा नगर्न भन्दै रियल राजा (वीरेन्द्र)को वंशनाश भएको विषयमा छानविन गरौँ भन्ने आँट छ ? भन्दै प्रश्नसमेत गर्नुभयो ।
कुनै पनि जेठ १५ मा राजावादीका सपना पूरा हुँदैनन् : प्रधानमन्त्री
प्रधानमन्त्री केपी शर्मा ओलीले राजा फर्काउने राजावादीहरूको सपना कहिल्यै पूरा नहुने बताउनुभएको छ । आइतबार प्रतिनिधिसभामा नीति तथा कार्यक्रममाथि उठेका प्रश्नको जवाफ दिने क्रममा उहाँले राजावादी पार्टी र संगठनहरूले जेठ १५ गतेबाट अनिश्चितकालीन आन्दोलन घोषणा गरेर राजा फर्काउने भन्दै लागि रहेका बेला प्रधानमन्त्रीले राजावादीका सपना पूरा नहुने बताउनुभएको हो । ‘यसपल्टको जेठ १५ गते होइन, अब आउने कुनै पनि जेठ १५ गते पर्खनुस्, तपाईंहरूको सपना साकार हुने छैन । प्रतिगामी सपना काम लाग्दैन,’ उहाँले भन्नुभयो । बदलिँदो समयलाई ख्याल गर्दै अघि बढ्न उहाँले राजावादीहरूलाई आग्रह गर्नुभयो । इतिहासमा मिल्किसकेको राजतन्त्रको पछि लाग्नभन्दा संविधानअनुसार अघि बढ्न उहाँले सुझाव दिनुभयो । ‘समयलाई चिनौँ, समयानुसार अघि बढौँ । बंगलादेशमा पनि बितेको राजा त फर्काएनन् त, त्यहाँ पनि राजा थिए नि । श्रीलंकामा पनि राजा फर्काएको होइन । लोकतन्त्रभित्रको कुरा हो । लोकतन्त्र, संविधान, प्रणाली र शान्तिपूर्ण राजनीति भित्रको कुरा गर्न सिके हुन्थ्यो,’ उहाँले भन्नुभयो । प्रधानमन्त्री ओलीले गत १५ चैतमा तीनकुने क्षेत्रमा भएको हिंसात्मक घटनाको आयोजक को हो ? भन्दै राजावादीहरूसँग प्रश्न गर्नुभयो । ‘जुडीबुटी उद्योगले दिक्क लागेर आत्मदाह गरेको हो ? त्यत्रा घर आफैँ जलेका हुन् ? आहृवान कसले गरेको थियो चैत १५ गतेको ? त्यस बितण्डा (हिंसाको अर्थमा)को आयोजक को थियो ? अहिले कसैले जिम्मेवारी नै लिँदैन,’ उहाँले भन्नुभयो, ‘अहिले कोही माइबाप नै निस्किँदैन । त्यस दिनको घटना जन्माउने को हो ? माता-पिता को हुन् ? पत्तो छैन अहिले त । तपाईं हो भन्दा म त होइन भन्छ, सबै निर्दोष छु भन्छन् । के ती घर आफैँ दशा लागेर जले ? जडीबुटीको औषधि कारखाना दिक्क लागेर आत्मदाह गरेको हो त्यसले ?’
शिव सेनाका अध्यक्ष पक्राउ
राजावादी तथा हिन्दूवादी संस्था शिवसेनाका अध्यक्ष अनिल बस्नेतलाई प्रहरीले पक्राउ गरेको छ । चैत १५ गते काठमाडौंको तीनकुनेमा राजावादीहरूले गरेको हिंसात्मक प्रदर्शनमा संलग्न रहेको आरोपमा बस्नेतलाई जिल्ला प्रहरी परिसर काठमाडौंले पक्राउ गरेको हो । बस्नेतलाई सुकेधाराबाट पक्राउ गरिएको प्रहरी परिसर काठमाडौंले जनाएको छ । बस्नेतविरुद्ध प्रहरीले पहिल्यै पक्राउ अनुमति लिइसकेको थियो । पक्राउका लागि प्रहरीले अदालतबाट अनुमति लिए पनि उहाँ फरार रहँदै आउनुभएको थियो । तीनकुने घटनामा २ जनाको ज्यान गएको थियो भने सरकारी तथा निजी सम्पत्तिमा पनि तोडफोड र आगजनी भएको थियो ।
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच