काठमाडौं । काठमाडौंमै बसेर विभिन्न संस्थाका नक्कली कागजात बनाउने एक गिरोहलाई प्रहरीले पक्राउ गरेको छ । काठमाडौं उपत्यका अपराध अनुसन्धान कार्यालयको टोलीले विशेष सूचनाका आधारमा बुधबार तारकेश्वर नगरपालिका-७ फुटुङमा रहेको एक कार्यालयमा छापा मारेको थियो । त्यहाँ छापा मार्दा कार्यालय नै खडा गरेर सरकारी कागजात बनाउने गरेको पाइएको बिहीबार पत्रकार सम्मेलनमा प्रहरीले जानकारी गराएको छ ।
प्रहरीले घटनास्थलबाट तीन जनालाई पक्राउ पनि गरेको छ । पक्राउ पर्नेमा गोरखाको भीमसेन थापा गाउँपालिका-१ घर भई हाल काठमाडौंको तारकेश्वर नगरपालिका-२ बस्ने ४६ वर्षीय अञ्जन बयलकोटी, ओखलढुंगाको चम्पादेवी गाउँपालिका-७ घर भई हाल काठमाडौंको बूढानीलकण्ठ नगरपालिका-१२ बस्ने २८ वर्षीय निर्मल खड्का र मकवानपुरको कैलाश गाउँपालिका-२ छ्याङ्दुङ् घर भई हाल काठमाडौंको चन्द्रागिरि नगरपालिका-१ दहचोक बस्ने २३ वर्षीया अञ्जु खत्री रहेकी छन् ।
अनुसन्धान अनुसार बयलकोटीले विगत आठ वर्षदेखि सरकारी तथा गैरसरकारी कार्यालयका कागजात, स्थानीय तहका सिफारिश पत्र, विभिन्न शैक्षिक संस्थाका प्रमाणपत्र, जग्गाधनी पुर्जा र सवारी चालक अनुमति पत्रलगायतका कागजातहरू किर्ते गरी नक्कली बनाई प्रयोग गर्दै आएका थिए । उनले नक्कली कागजात डिजाइन गर्न दुईजना सहयोगीलाई मासिक १० हजारदेखि १५ हजार रुपैयाँ तलबमा राखी कार्य सञ्चालन गर्दै आएको प्रहरीले जनाएको छ ।
उनीहरूले डिपेन्डेन्ट भिसा, विवाह प्रमाणपत्रदेखि बैंकबाट ऋण लिने प्रयोजनका लागि नक्कली जग्गाधनी पुर्जा बनाइदिने गरेको खुलेको छ । त्यसै विद्यार्थी भिसामा जापान जान चाहनेका लागि सहकारी संस्थाका नक्कली स्टेटमेन्ट बनाएर कुरियरमार्फत जापान पठाउने गरेको पनि फेला परेको छ । कार्यालयका सूचना अधिकारी प्रहरी उपरीक्षक काजीकुमार आचार्यका अनुसार उनीहरूले विभिन्न शैक्षिक संस्था तथा सरकारी कार्यालयका होलो ग्रामसमेत उपलब्ध गराउने, जापान लगायतका देशहरूमा कामदार भिसाका लागि विभिन्न तहका शैक्षिक प्रमाणपत्र तथा अनुभवका कागजात बनाइदिने गरेको अनुसन्धानबाट खुलेको छ । साथै, विदेशमा बस्ने नेपाली नागरिकहरूका लागि पिआर तथा ग्रीनकार्ड आवेदन प्रयोजनमा मनमोहन मेमोरियल अस्पताल, सल्यान जिल्ला अस्पताल, वीर अस्पताल आदिका नक्कली मेडिकल कार्ड बनाउने गरेको समेत फेला परेको छ ।
भिजिट भिसाका लागि ‘क’ वर्गका सबै बैंकका नक्कली स्टेटमेन्ट बनाइदिने काममा पनि उनीहरूको संलग्नता रहेको खुलेको छ । पक्राउ परेकाहरूको साथबाट ४२ थान माइग्रेसन सर्टिफिकेट, ६० थान क्यारेक्टर सर्टिफिकेट, ११० थान एकेडेमिक ट्रान्सक्रिप्ट, पाँच थान विवाह दर्ता प्रमाणपत्र, ५० थान प्रोभिजनल सर्टिफिकेट, १० थान जग्गाधनी दर्ता प्रमाणपत्र, विभिन्न सहकारी संस्थाका लेटरप्याड, बैंक तथा सहकारीका स्टेटमेन्ट पाना, स्थानीय तहका सिफारिस पत्रहरू बरामद गरिएको छ । उनीहरूलाई थप अनुसन्धान तथा आवश्यक कारबाहीका लागि जिल्ला प्रहरी परिसर, भद्रकाली पठाइएको कार्यालयले जनाएको छ ।
यो खबर पढेर तपाईलाई कस्तो महसुस भयो ?
0
Like
Like
0
Love
Love
0
Happy
Happy
0
Surprised
Surprised
0
Sad
Sad
0
Excited
Excited
0
Angry
Angry
बिक्रीमा विद्यावारिधि ?
युवा जनशक्ति निर्यात गर्ने देश
गल्तीलाई आत्मसात गर्ने कि अझै
योगचौतारी नेपाल स्वस्थ समाज निर्माणमा
हिमालय टाइम्स र नियमित लेखनका
प्राकृतिक चिकित्सालय र योग चौतारीबीच