जनतासँग जोडिने माओवादीको प्रयास

काठमाडौं । गत असारमा सत्ताविमुख भएको नेकपा माओवादी केन्द्र जनतासँग जोडिन कसरत गरिरहेको छ । कहिले नेपाली कांग्रेस त केहिले नेकपा एमालेलाई उपयोग गरेर निरन्तर सत्तामा रहेको माओवादी केन्द्र १० महिना पहिलो विपक्षीको भूमिकामा पुगेपछि विभिन्न विशेषण दिएर पार्टी संगठन र जनताको माझमा जाने प्रयत्नमा जोड दिइरहेको छ । फागुन दोस्रो सातादेखि वैशाख तेस्रो सातासम्म तराई-मधेस हुलाकी मार्ग लक्षित ‘जनतासँग माओवादी’ जनजागरण अभियान चलाएको माओवादी केन्द्रले आजदेखि मध्यपहाडी लोकमार्ग अभियान सुरु गर्दै छ । माओवादी केन्द्रले यो अभियानलाई ‘जनतासँग माओवादीः मध्यपहाडी लोकमार्ग जनजागरण अभियान’ नाम दिएको छ । सुदूरपश्चिमको बैतडीस्थित पाटनबाट सुरु हुने अभियान आज (शुक्रबार) उद्घाटन गरिने माओवादी केन्द्रले जनाएको छ ।

जेठ महिनाभरि अभियान सञ्चालन गर्ने माओवादीको लक्ष्य छ । कार्यक्रमको स्वरूपअनुसार मध्यपहाडी लोकमार्गमा पर्ने स्थानहरूमा पार्टीका प्रत्येक प्रदेश समितिले एक/एक स्थानमा जनसभा आयोजना गर्नेछन् । त्यस्तै, जिल्ला समन्वय समितिहरूले एक/एक स्थानमा जनसंवाद कार्यक्रम सञ्चालन गर्नेछन् । कोशी प्रदेशका जिल्लाहरूमा हाल भइरहेको जनसभाहरूलाई यसै अभियानको हिस्सा बनाइनेछ र बाँकी जिल्लाहरूमा उपयुक्त समयमा जनसभाहरू गरिने माओवादी केन्द्रले जनाएको छ । अभियानमार्फत माओवादीले मध्यपहाडी लोकमार्गसँग जोडिएका जनसमुदायसँग प्रत्यक्ष संवाद, राजनीतिक सन्देश प्रसार तथा स्थानीय समस्या पहिचान गर्न खोजेको जनाएको छ । अभियानका लागि माओवादी केन्द्रका अध्यक्ष पुष्पकमल दाहाल प्रचण्डसहितका शीर्ष नेताहरू बैतडी पुगिसकेका छन् ।

मध्यपहाडी लोकमार्गअन्र्तगत अहिलेका लागि जेठ १० गतेसम्मको कार्यक्रम निश्चित भएको छ । माओवादी केन्द्रका महासचिव देव गुरुङका अनुसार (जेठ २ गते आज) बैतडीको पाटनमा अभियानको उद्घाटन हुनेछ । आजै डोटीको दिपायलमा कार्यक्रम पनि हुनेछ । जेठ ३ गते अछामको मंगलसेनमा जनसंवाद र जेठ ४ गते दैलेखको सदरमुकाममा जनसभा हुनेछ । जेठ ५ गते जाजरकोट खलंगामा जनसंवाद तथा जेठ ६ गते पश्चिम रुकुमको चौरजहारीमा जनसभा र मुसिकोटमा जनसंवाद हुनेछ । यसैगरी, जेठ ७ गते पूर्वी रुकुमको रुकुमकोटमा जनसंवाद र रोल्पाको थवाङमा जनसभा हुनेछ भने जेठ ८ गते वागलुङमा जनसंवाद, जेठ ९ गते पर्वतको कुश्मामा जनसंवाद तथा जेठ १० गते कास्कीको पोखरामा जनसभा हुनेछ । बाँकी जिल्लाहरूको कार्यक्रम पछि तय गरिने महासचिव गुरुङले जानकारी दिनुभएको छ । अभियानका क्रममा पार्टी अध्यक्ष प्रचण्ड लगायतको टोली हुनेछ भने प्रदेश र सम्बन्धित जिल्ला पार्टीले आवश्यक समन्वय गरेर जनतालाई जोड्ने कार्य गर्ने बताइएको छ । बाँकी जिल्लाहरूमा अनुकूल समयमा जनसभाहरू आयोजना गर्नेछ । वैशाख २१ गते बसेको माओवादी पदाधिकारी बैठकले जेठ २ गतेबाट दोस्रो चरणको अभियान सञ्चालन गर्ने निर्णय गरेको थियो । महासचिव देव गुरुङको संयोजकत्वमा उपमहासचिवहरू गिरिराजमणि पौडेल र वर्षमान पुन रहेको तीन सदस्यीय कार्यदल गठन गरेको थियो । कार्यदलले सम्बन्धित प्रदेशका पदाधिकारीसँग समन्वय गरी अभियानको खाका बनाएको हो ।

यसअघि माओवादीले हुलाकी मार्ग केन्द्रित जनतासँग माओवादीः तराई-मधेस जनजागरण अभियान सञ्चालन गरेको थियो । उक्त अभियान सफलतापूर्वक सम्पन्न भएको माओवादीको जिकिर छ । तराई मधेस जागरण अभियानलाई माओवादी केन्द्रले पार्टीको पुनर्जीवनको रूपमा चित्रण गरेको छ । हुलाकी राजमार्ग केन्द्रित तराई-मधेस जागरण अभियानको क्रममा करोडभन्दा बढी जनतासँग प्रत्यक्ष संवाद गरेको माओवादी केन्द्रका अध्यक्ष प्रचण्डले दाबी गर्नुभएको छ ।

खुट्टा अभियानमा, नजर भने सत्तातिरै
जनतासँग जोडिने भन्दै नेकपा माओवादी केन्द्रले जागरण अभियान चलाए पनि नजर भने सत्तातिर देखिएको छ । जागरण अभियानमा नागरिकसँग आफ्नो कुरा राख्नेभन्दा पनि वर्तमान सरकार र सत्तागठबन्धनकै आलोचनामा नेताहरूका भाषण केन्द्रित हुने गरेका छन् । हुलाकी राजमार्ग केन्द्रित तराई–मधेस जागरण अभियान चलिरहेकै बेला अध्यक्ष प्रचण्डले कांग्रेस नयाँ गठबन्धन बनाउन तयार भए निःसर्त समर्थन गर्ने बताउनुभएको थियो । उहाँको यो भनाइले नेपालको राजनीतिमा तरंग ल्याए पनि परिणाम आउन सकेन । कांग्रेस-एमालेबीच नेपाल राष्ट्र बैंकको गभर्नरलगायत राजनीतिक नियुक्तिमा भएका खटपटलाई आधार मानेर प्रचण्डले अनौपचारिक रूपमा नयाँ गठबन्धनको कार्ड फाल्नुभएको थियो । तर, त्यसले सरकार ढल्ने अवस्था भएन । कांग्रेस सभापति शेरबहादुर देउवासँग चैत दोस्रो साता भएको अनौपचारिक संवादले प्रचण्डको बोली फेर्ने आधार बनेको थियो । देउवा र प्रचण्डबीच त्यस बेला दुईपटक संवाद भएको स्रोतको दाबी छ । फागुन दोस्रो साता झापाबाट तराई मधेस केन्द्रित अभियान चितवनसम्म आइपुग्दा दाहाल ०८४ सम्म प्रतिपक्षमा रहेर जनतासँग अभियान चलाउने बताउँदै आउनुभएको थियो । तर, देउवासँग संवाद भएपछि कांग्रेस नयाँ गठबन्धन बनाउन तयार भए निःसर्त समर्थन गर्न तयार रहेको सार्वजनिक गर्नुभएको थियो । प्रचण्डको भनाइले एमाले सशंकित मात्र भएन प्रधानमन्त्री केपी शर्मा ओलीले देउवासँग उत्पन्न आशंका मेटाउन लामो छलफल गर्नुभयो । माओवादी फागुन १२ मा झापाबाट सुरु गरेको तराई मधेस जागरण अभियान वैशाख १८ मा कञ्चनपुर समापन गर्दासम्म माओवादी र विशेष गरी प्रचण्डमा सत्ता मोह पलाइसकेको छ । जागरण अभियानको अवधिमा अध्यक्ष प्रचण्डसहित उपमहासचिव वर्षमान पुनलगायत नेताहरूको भनाइले खुट्टा सडकमा भए पनि माओवादीको ध्यान सत्तातिरै भएको छर्लङ्गै भएको छ । ओली सरकार नयाँ वर्ष सुरु भएपछि ढल्ने दाबी गर्दै आउनुभएका अध्यक्ष प्रचण्ड अब भने सरकार परिवर्तनको मिति तोक्न छोड्नुभएको छ ।